¿Kijtojka Biblia keniuj yeskiaj akin nemiskiaj itech nejin tonalmej?

Tein Biblia kijtoua

Kemaj. Biblia ipa kijtojka ke akin nemiskiaj itech nejin tonalmej kichiuaskiaj tein amo kuali yetok uan yejua ika amo kuali monejnemiltiskiaj (2 Timoteo 3:1-5).a Sayoj ke itech Biblia no moijtojka ke amo nochin ijkon kichiuaskiaj, ta onkaskiaj akin kinekiskiaj kitakamatiskej Dios uan monejnemiltiskiaj kemej kiyolpaktia (Isaías 2:2, 3).

Itech nejin tamachtilis tiknankiliskej nejin netajtanilmej:

¿Keniuj kijtojka Biblia ke miakej tanemiliskiaj uan monejnemiltiskiaj itech nejin tonalmej?

Biblia kijtojka keniuj yeskiaj miakej axkan porin sayoj inintech tanemiliskiaj. Amo motsakuiliskiaj, sayoj yejuan motasojtaskiaj uan kitemoskiaj moyolpaktiskej yejuan uan amo Dios (2 Timoteo 3:2-4).

Nejin tein moijtojka mochiujtok axkan. Miakej sayoj inintech tanemiliaj, tein uelis kinpaleuis, uan no kinekij kimachiliskej ke yolpakij ika tein kichiuanij. Kemej moijtojka itech Biblia axkan miakej sayoj kitemoskiaj tein yejuan kinyolpaktia, uan nejin se taman tein semi moita. Uan kemej sayoj inintech tanemiliaj amo kiitaj ox amo kuali tein kichiujtokej uan amo kipatiuitaj tein kuali tein oksekin kinextiaj. Amo motasojkamatij ika tein kipiaj nion kitasojkamatij tein oksekin kichiuaj por yejuan (2 Timoteo 3:2, 3).

Akin sayoj inintech tanemiliaj no kinextiaj uan kichiuaj okseki taman tein Biblia no kijtojka ke miakej kinextiskiaj itech nejin tonalmej. Biblia kijtojka ke:

Kitemoskej motomintiskej. Miakej kitasojtaj tomin. Kinemiliaj ke se kipias miak tomin uan miak taman yejua tein okachi kuali (2 Timoteo 3:2).
Moueyimatiskej. Miakej ‘moueyichiuaj ininselti uan moueyimatij’ (2 Timoteo 3:2, 4). Moueyinekij ika tein kimatij uan tein uelij kichiuaj uan no ika tomin tein kipiaj.
Tetakajkayauiliskej. Miakej teuijuikaltiaj uan tetakajkayauiliaj (2 Timoteo 3:2, 3). Yejuan amo kipoujkaitaj Dios nion oksekin uan kintakajkayauiliaj.
Amo takakiskej. Miakej “tekauaskej”, uan “amo kinekiskej moyektenkauaskej iniuan oksekin”, “kinchiuiliskej tein amo kuali inintasojikniuan uan amo takakiskej” (2 Timoteo 3:2-4). Uan kinextiaj keman amo kinekij kitemoskej keniuj kiyektaliskej se kuejmol nion kichiuaskej tein kijtojkej.
Kichiuaskej tein tel fiero. Miakej kinextiaj keman teisa amo kiuelitaj uan niman kualanij, uan kemansa hasta tateuiaj o kinchiuiliaj tein amo kuali oksekin (2 Timoteo 3:3).
Taixnamikiskej. Jesús kijtoj ke itech nejin tonalmej “okachi mochiuas tein amo kuali”, Yejua ika okachi miakej taixnamikiskiaj (Mateo 24:12; nota). No kijtoj ke moteuiskiaj uan takuejmolchiuaskiaj (Lucas 21:9; nota).
Amo kintasojtaskej ininchankauan. Sekin ‘amo kintakamatij inintatuan’ uan ‘amo kintasojtaj ininchankauan’, yejua ika miakej tajyouiaj porin ininchankauan kinchiuiliaj tein amo kuali uan xa hasta kinteuiaj (2 Timoteo 3:2, 3).
Kinextiskej ke semi taneltokaj sayoj ke amo melauak. Miakej sayoj kitemouaj kinextiskej ke “semi taneltokaj” (2 Timoteo 3:5). Sayoj ke amo kitakamatij Dios, ta kichiuaj tein kiniluia akin kinixyekana itech inintaneltokalis, porin kiniluia tein yejuan kinekij kikakiskej (2 Timoteo 4:3, 4).

¿Keniuj taijtakoskia maj sekin sayoj inintech tanemilikan?

Miakej sayoj inintech tanemiliaj, uan ika tein kichiuaj kintajyouiltiaj uan kinijtakouaj oksekin porin kichiuaj maj amo kuali momachilikan (Eclesiastés 7:7). Sekin akin kinekij motomintiskej kinkajkayauaj oksekin uan kinkuiliaj inintomin. Miakej akin amo kintasojtaj ininchankauan ininka mauiltiaj, yejua ika akin kipanouaj nejin kinkui depresión uan sekin xa hasta kinemiliaj momiktiskej. Akin kikauaj oso kikajkayauaj ininnamik kichiuaj maj amo kuali momachilikan uan semi kintajyouiltiaj.

¿Keyej miakej okachi kichiuaj tein amo kuali yetok?

Biblia kijtoua keyej miakej kichiuaj tein amo kuali:

Miakej amo kitasojtajok Dios nion kintasojtaj oksekin, ta sayoj inintech tanemiliaj (Mateo 24:12).
Amokuali Satanás, kikixtijkej de iluikak uan kiualpantamotkej nikan taltikpak (Apocalipsis 12:9, 12). Yejua ika kichiuani maj miakej sayoj inintech tanemilikan (1 Juan 5:19).

¿Toni moneki tikchiuaskej keman sekin kichiuaj tein amo kuali yetok?

Biblia kijtoua: “Amo iniuan ximouika” (2 Timoteo 3:5). Nejin amo kijtosneki ke amo moneki tikinnojnotsaskej, ta kijtosneki ke amo moneki semi timouikaskej iniuan akin sayoj inintech tanemiliaj uan amo kitakamatij Dios (Santiago 4:4).

¿Nochin okachi kichiuaskiaj tein amo kuali yetok?

Amo. Biblia kijtojka ke onkaskiaj sekin tein kintayokoltiskia “nochi tein tel amo kuali tein mochiujtok” (Ezequiel 9:4). Amo sayoj inintech tanemiliskiaj uan kitakamatiskiaj itanauatiluan Dios. Ika tein kichiuaskiaj kinextiskiaj ke mochikauaj kichiuaskej tein kuali (Malaquías 3:16, 18). Mochikauaskiaj kuali mouikaskej iniuan oksekin uan amo tapaleuiskiaj keman moteuiaj nion takuejmolchiuaskiaj (Miqueas 4:3).

¿Amo akin kichiuasok tein kuali?

Amo, amo nochin kichiuaskej tein amo kuali yetok. Dios kinixpolos nochin akin amo kinekij kitakamatiskej (Salmo 37:38). Biblia kijtoua ke onkas “se yankuik taltikpak”, nejin kijtosneki ke akin nemiskej itech taltikpak kichiuaskej tein Dios kiyolpaktia uan kuali nemiskej nochipaya (2 Pedro 3:13; Salmo 37:11, 29). Uelis tikneltokaskej ke yekmelauj mochiuas, porin axkan Biblia kinpaleuijtok miakej maj kipatakan kemej nemij uan maj kichiuakan tein Dios kiyolpaktia (Efesios 4:23, 24).

a Tein Biblia kijtojka uan kemej axkan tinemij kinextia ke tietokej “itech tonalmej keman tatamitiya”, keman “semi ouij” uan “tamouilil” yeskia (2 Timoteo 3:1). Komo tikonneki tikonmatis okachi, xikonlero tamachtilis ¿Toni kinextia ke tinentokej “itech tonalmej keman tatamitiya”?