¿Toni kijtoua Biblia keman ika tajtoua nenamiktilis?

Tein Biblia kijtoua

Dios kinchijchiuak yekinika takat uan yekinika siuat uan satepan kinnamiktij. Yejuatsin kiixtalij nenamiktilis para maj kualtsin senyetokan se takat uan se siuat uan iniuan ininkoneuan keman kinpiaskejya (Génesis 1:27, 28; 2:18).

Dios kineki maj akin monamiktijkejya yolpakikan (Proverbios 5:18). Yejua ika, itech Biblia yejuatsin kinmaka tanauatilmej uan kinyolmajxitia tein kinpaleuis maj kuali senyetokan.

Itech nejin tamachtilis tikitaskej nejin:

• ¿Katiyejua itanauatiluan Dios para nenamiktilis?

• ¿Keniuj kiita Dios keman se takat uan se siuat mokauaj oso kitsayanaj amat ininixpan tekiuanij?

• ¿Moneki se monamiktis ininixpan tekiuanij para maj Dios kiyolpakti?

• ¿Toni kijtoua Biblia ke moneki kichiuas takat uan siuat akin monamiktijkejya?

• ¿Kinnauatia Dios akin monamiktijkejya maj kinpiakan konemej?

• ¿Uelis nechpaleuis Biblia keman nimonamiktis?

• Tajkuilolmej itech Biblia tein ika tajtouaj nenamiktilis

¿Katiyejua itanauatiluan Dios para nenamiktilis?

Dios nochipa kinekini maj sayoj monamiktikan se takat uan se siuat (Génesis 2:24). Dios amo kiuelita maj aksa kinpia miakej itakauan oso isiuauan nion maj ome takamej oso ome siuamej monamiktikan, oso maj se takat uan se siuat sennemikan komo amo monamiktijkej (1 Corintios 6:9; 1 Tesalonicenses 4:3). Jesús kinmachtij itatojtokakauan ke monekia kitakamatiskej tein Dios kiixtalij para akin kinekij monamiktiskej (Marcos 10:6-8).

Dios kiita ke semi moneki maj akin monamiktiaj nochipa senyetokan. Keman se takat uan se siuat monamiktiaj moiluiaj ke amo mokajkayauaskej uan ke nochipa senyetoskej. Dios kichia maj kichiuakan tein motenkaujkej (Marcos 10:9).

¿Keniuj kiita Dios keman se takat uan se siuat mokauaj oso kitsayanaj amat ininixpan tekiuanij?

Kemansa, takat uan siuat xa amo senyetoskej seki tonalmej, kemej neskayot, keman semej moneki yas okseko porin teisa kinpanok ichankauan. Sayoj ke keman kipiaj kuejmolmej, Biblia amo tayolmajxitia maj mokauakan, ta kinyolchikaua maj kiyektalikan ininkuejmoluan (1 Corintios 7:10).

Biblia kijtoua ke sayoj uelis mokauaskej ininixpan tekiuanij komo semej auilnemik (Mateo 19:9). Sayoj ke, komo se takat uan se siuat kiixtaliaj mokauaskej oso kitsayanaskej amat ininixpan tekiuanij porin kipiakej okse taman kuejmol, nion semej uelis moixmatis iuan aksa oso oksepa monamiktis (Mateo 5:32; 1 Corintios 7:11).

¿Moneki se monamiktis ininixpan tekiuanij para maj Dios kiyolpakti?

Dios kineki maj akin kichiuaj kemej Cristo kitakamatikan tanauatilmej tein kiixtaliaj tekiuanij tein kijtouaj maj se monamikti (Tito 3:1). Nochipa keman uelis, se takat uan se siuat moneki monamiktiskej ininixpan tekiuanij. Keman kichiuaj kinextiaj ke kintakachiuaj tekiuanij uan ke ijkon kemej Dios, kiitaj ke nenamiktilis moneki uejkauas nochipaya.a

¿Toni kijtoua Biblia ke moneki kichiuas takat uan siuat akin monamiktijkejya?

• Tein moneki kichiuaskej nochin omen. Takat uan siuat moneki motasojtaskej uan motakachiuaskej (Efesios 5:33). Moneki mosentekaskej uan monextiliskej netasojtalis uan nion tepitsin mokajkayauaskej (1 Corintios 7:3; Hebreos 13:4). Komo kinpiaj ininkoneuan, nochin omen moneki kuali kiniskaltiskej (Proverbios 6:20).

  

  ¿Uan akoni moneki kinixpanoltis kalyetonij uan akoni tekitis kalijtik? Biblia amo senkis kijtoua toni moneki kichiuaskej. Takat uan siuat moneki kiixpejpenaskej tein okachi kinpaleuis nochin kalyetonij.

• Tein moneki kichiuas takat. Biblia kijtoua ke takat “kiixyekana isiuatsin” (Efesios 5:23). Nejin kijtosneki ke moneki kinixyekanas ichankauan uan kiixpejpenas tein kipaleuis isiuatsin uan ikoneuan.

  

  Moneki kinpaleuis ichankauan maj kuali yetokan, maj yolpakikan uan maj kuali mouikakan iuan Dios (1 Timoteo 5:8). Keman kikaua maj isiuatsin kipaleui, kikaki tein kinemilia uan tein kimachilia keman taixpejpena, kinextia ke kipatiuita ikualneskayouan uan tein ueli kichiua (Proverbios 31:11, 28). Biblia kijtoua ke takat moneki kichiuas nochi nejin ika netasojtalis (Colosenses 3:19).

• Tein moneki kichiuas siuatsin. Biblia kijtoua ke “siuatsin moneki kitakachiuas itakatsin ika nochi iyolo” (Efesios 5:33). Dios semi kiyolpaktia maj siuamej kipoujkaitakan tekit tein kinmakatok inintakatsin.

  

  Siuamej moneki kinpaleuiskej inintakauan maj kuali taixpejpenakan uan maj kinkauakan maj yejuan taixyekanakan (Génesis 2:18). Biblia kuali ininka tajtoua siuamej akin kichiuaj tekit tein Dios kinmakatok (Proverbios 31:10).

¿Kinnauatia Dios akin monamiktijkejya maj kinpiakan konemej?

Amo. Maski ne uejkauj Dios kinnauatij sekin maj kinpianij konemej, axkan akin tikchiuaj kemej Cristo amo monekiok tiktakamatiskej nejon tanauatil (Génesis 1:28; 9:1). Jesús amo keman kiniluij itatojtokakauan maj kinpianij konemej, uan yekinika imomachtijkauan amo no kiniluijkej akin monamiktijkajya ke monekia kinpiaskej. Takat uan siuat moneki kiixpejpenaskej ox kinpiaskej konemej oso amo.

¿Uelis nechpaleuis Biblia keman nimonamiktis?

Kemaj, porin tein Biblia tayolmajxitia uelis mitsonpaleuis kuali xionmouika iuan motakatsin oso mosiuatsin desde keman namonamiktiskej, amo xikpiakan seki kuejmolmej uan xikmatikan keniuj nankiyektaliskej kuejmolmej tein nankipiaskej.

Biblia uelis kinpaleuis akin monamiktijkejya maj kichiuakan nejin:

• Maj kinextikan ke yekmelauj motasojtaj (1 Corintios 13:4-7; Colosenses 3:14).

• Maj amo mokualantikan porin tatamamej (1 Corintios 10:24).

• Maj tekakikan (Santiago 1:19).

• Maj motakachiuakan (Romanos 12:10).

• Maj motapojpoluikan (1 Pedro 4:8).

• Maj amo mokauakan (Marcos 10:9).

• Maj amo yolijsiuikan (Efesios 4:2, 3).

• Maj mosenpaleuikan (Eclesiastés 4:9).

• Maj kichiuakan tein kinpaleuis maj nochipa senyetokan (El Cantar de los Cantares 8:7).