Keniuj uelis kuali tinemiskej maski amo techajsisok tomin
Kemansa tinochin amo techajsi tomin para uelis timoixpanoltiskej. Nochi tapatiyoua keman momoyaua se ueyi kokolis, keman mochiua se tetsauit, keman takuejmolchiuaj tekiuanij uan keman onkak neteuilis. Keman panoua nejon amo se kimati toni se kichiuas, sayoj ke tein kijtoua Biblia uelis techpaleuis para uelis tinemiskej ika amo miak taman.
1. Amo itech xiontanemilijtook tein tikonpiaya.
Tein kijtoua Biblia: “Nikmati keniuj se nemi [...] keman se kitelpias uan keman amo teyi se kipias” (Filipenses 4:12).
Maski axkan amo semi tikonpiasok tomin kemej achto, uelis tikpatas seki taman para mitsonajsis tomin. Amo itech xiontanemilijtook tein tikonpiaya uan xikonpata seki taman para kualtsin tinemis. Ijkon uelis tikonitas tein mitsonpaleuis uan tein kipaleuis mochankauan para kualtsin nanyetoskej.
¿Tikmati de se apoyo tein kitemakatok tekiuaj oso oksekin tein uelis titajtanis? Niman xiontajtani porin kemansa niman tami.
2. Ximosenpaleuikan kemej kalyetouanij.
Tein kijtoua Biblia: “Amo kuali kisa teisa tein moixtalia keman amo se kinixejekoltia oksekin, sayoj ke kuali kisa keman miakej teyolmajxitiaj” (Proverbios 15:22).
Xikonilui mosiuatsin oso motakatsin uan mokoneuan tein panotok. Komo tikiniluia ke amo mitsajsiok tomin, kinpaleuis maj kiajsikamatikan tein panotok uan maj kiitakan toni uelis kipataskej para mitspaleuiskej. Komo nochin mokalyetouanij amo kiauilouaj tomin uan kieujtiouij, okachi namechajsis.
3. Xikonixtali kanachi tomin tikuis.
Tein Biblia kijtoua: Xikixejeko “kanachi tomin monekis” (Lucas 14:28).
Keman amo teajsiok tomin kemej achto, okachi moneki se kiitas keniuj se kikui nochi se itomin. Yejua ika xikonita kanachi tomin tikonkui. Yekinika, xikonijkuilo kanachi tomin tikontanis itech se metsti. Satepan, xikonijkuilo nochi tein tikixtaua uan nochi tein ipa tikoua maski axkan mopatas seki taman. No xikonxelo tepitsin tomin tein uelis mokuis komo teisa panoua oso komo aksa kokolispeua.
Uelis tikonchiuas nejin: Keman tikonijkuilos nochi tein tikixtaua uan tein tikoua, amo xikonelkaua tikonijkuilos nochi hasta tein tikonitas ke amo semi moneki. Xa tikonmojkaitas keman tikonitas kanachi tomin tikonkui para tikouas seki taman tein amo semi moneki. Se takat kiitak ke xijxiujtika kikuitoya tel miak tomin para kikouas sayoj seki chicles.
4. Xikonita toni okachi moneki uan xikonpata tein monekis.
Tein kijtoua Biblia: “Xikyekitakan toni okachi tayekantok” (Filipenses 1:10).
Xikonita kanachi tomin tikontani uan kanachi tomin tikonkui para titakouas oso tikonixtauas teisa. Uan xikonita ox uelis amo tikouasok oso tikonixtauas teisa tein amo moneki para amo tikontamis nochi tomin tein tikontani. Xikonita nejin taman tein ueliskia tikonchiuas:
Tikonpia carro. Komo tikpia ome carros, ¿uelis tikonnamakas se? Komo tikonpia se carro tein tel tagastaroua, ¿uelis tikonpatas ika se tein amo semi tagastaroua? Oso xa hasta uelis tikonnamakas mocarro uan tikuis combi oso camioneta oso se bicicleta para tias kansaika.
Tein ika timoixpetania. ¿Ueliskia seki metsti amo tikuisok televisión de cable tein moixtaua uan Internet? Oso ¿ueliskia tiktemos se tein amo semi patiyoj?
At, luz uan gas. Xiontajto iuan mochankauan keniuj amo nankiauiloskej at, luz uan gas. Maski xa moitas ke amo semi tapaleuis komo se taseuia keman amo se kikuitok luz uan komo amo se kiauiloua miak at keman se maltia oso se mopaka, sayoj ke komo ijkon tikonchiua tikonitas ke amo miak titaxtauasok.
Tein se kikua. Nochipa xitakualchiua kalijtik uan amo xiakan xitakuatij calle. Xikonixtali toni nankikuatij itech semana. Keman uelis, xikoua miak taman uan xikonkuakan nochi tein mokauas. Achto xikonita toni tikouati uan amo xikouaok okse taman. Xikoua seki taman tein tikuas tein mochiua kampa tinemi. Xa nejon okachi amo patiyoj ke okseki taman. Uan amo xikoua tein amo mitsonpaleuis. Xa uelis titatokas mokaltsintan.
Tasal oso tilmaj. Amo xikoua tasal sayoj porin tikonuelitak ta xikoua tein yekmelauj mitsonpolojtok. Xikoua tasal keman amo semi patiyoj oso maski kikuikejya. Xikonuatsa motasal komo kualtsin takistok uan amo xikonkui secadora para amo titeltaxtauas.
Tein uelis tikouas. Achto ke tikouas teisa, xionmotajtani: “¿Nechajsis notomin? ¿Yekmelauj motelneki?”. ¿Uelis nikuisok seki taman tein nikpia uan amo nikinpatas kemej celular oso carro? Uan komo seki taman amo tikonkuiok, ¿uelis tikonnamakas? Komo tikonchiua nejin, mitsonpaleuis amo xikonpia miak taman uan xionmotaniliok tepitsin tomin.
Tein uelis tikonchiuas: Komo amo mitsonajsiok motomin uelis tikonkauas seki taman tein patiyoj uan amo mitsonpaleuia kemej tiontachichinas, tionteltayis tein teuintij oso tikonauilos motomin ika seki taman tein amo moneki. Komo tikonchiua nejin taman, mitsonpaleuis maj mitsonajsi motomin, uan okachi kuali xionnemi.
5. Xikonmati tein kijtoua Biblia.
Tein kijtoua Biblia: “Yolpakij akin kiajsikamatij ke moneki maj Dios kinixyekana” (Mateo 5:3).
Biblia techiluia toni uelis techpaleuis: “Akin kinextia ke tamatkej kipaleuia maj kuali yeto, kemej tomin tapaleuia maj kuali se yeto, sayoj ke akin kinextia ke tamatkej uan kiixmati Dios, okachi kipia ipatiuj porin kipaleuia maj kisentoka yolto” (Eclesiastés 7:12). Biblia uelis techpaleuis maj tiknextikan ke titamatinij. Miakej kiitanij ke tein Biblia kijtoua kinpaleuiani maj amo semi motekipachokanok keman amo kinajsi inintomin (Mateo 6:31, 32).