KUEJMOLMEJ TEIN AXKAN ONKAK

2 | Xikonyekpia motomin

¿KEYEJ SEMI MONEKI?

Miakej kinouijmaka kiajsiskej tein ika moixpanoltiskej mojmostaj. Uan okachiok porin mochiuaj miak kuejmolmej noyampa. ¿Keyej ijkon panoua?

Keman mochiuaj kuejmolmej itech se altepet, okachi patiyoua tein kikuaskej uan kampa nemiskej.
Amo semi onkakok tekit uan amo kuali kintaxtauiaj.
Tetsaujmej kiuejuelouaj kalmej kampa nemij uan tanamakaj taltikpakneminij. Nejin kichiua maj miakej kipanokan tatasojtilis.

¿Tikonmatia?

Komo kuali tikontekitiltia motomin, okachi kuali tikonixnamikis se kuejmol.
Tomin amo nochipa uelis techpaleuis porin tomin tein aksa motanilia uan moeuilia, uan tataman tein kipia amo nochipa kipias ipatiuj.
Tomin amo uelis techpaleuis maj tiyolpakikan oso maj kuali timouikakan kemej kalyetouanij.

¿Toni uelis tikonchiuas?

Biblia kijtoua: “Komo tikpiaj tein tikuaskej uan tein timotaliliskej, maj ika nejon tiyolpakikan” (1 Timoteo 6:8, TNM).

Para se yolpakis amo moneki maj se kipia nochi tein se kineki, ta uelis tiyolpakiskej komo tikpiaj sayoj tein techpoloua. Tikelnamikiskej nejin techpaleuis okachiok keman amo tikpiaskej miak tomin.

Xa moneki amo tikonkouas miak taman. Komo semi tiontakojkoua uan tionmotauikaltia, tikonpias miak kuejmolmej.

KENIUJ TIKIXNAMIKISKEJ: Seki tayolmajxitilismej

Uelis tikonyekpias motomin keman tikonpanos se ouijkayot komo tikonchiua nejin

AMO SEMI XIONTAKOUA

Amo semi xiontakoua

Amo xikonkoua teisa komo amo yekmelauj mitsonpoloua. Xionmotajtani: “¿Yekmelauj moneki maj nikpia se carro? ¿Uelis niktokas seki taman tein nikuas para amo nikouas?”.
Achto ke tikonkouas teisa, xionmotajtani: “¿Yekmelauj nechpoloua? ¿Uelis nikixtauas?”.
Komo ueli, xiontajtani nepaleuil tein kitemakaj tekiuanij.

“Iniuan nochankauan tikitakej keniuj tiktekitiltiayaj tomin, uan tikixtalijkej amo semi tikuiskej keman timoixpetaniskej. No peuak tikchijchiuaj takual tein amo semi patiyoj” (Gift).

XIKONIXTALI KENIUJ TIKONTEKITILTIS TOMIN

Xikonixtali keniuj tikontekitiltis tomin

Biblia kijtoua: “Akin ika nejmachkayot niman kiixtalia keniuj kichiuas teisa yekmelauj kuali kisas, sayoj ke nochin akin moijsiuiliaj yekmelauj kipiaskej tatasojtilis” (Proverbios 21:5). Tomin tein tikontani mitsonajsis komo tikonijkuiloua keniuj tikontekitiltis.

Yekinika, xikonijkuilo kemej kanachi tikontanis itech se metsti.
Ojpatika, xikonijkuilo toni tikonkoua itech se metsti uan kuali xikonita keniuj tikontekitiltia tomin.
Expatika, xikonita kanachi tikontani uan kanachi tikontekitiltia. Komo tikonita ke okachi miak tomin tein tikontekitiltij ke tein tikontani, xikonpata tein monekis.

“Mejmetstika, tikijkuilouaj kanachi tomin tiktanij uan kanachi tiktekitiltiaj. No tikeujtiouij para tikuiskej keman monekis oso keman tikpiaskej se ouijkayot. Ijkon, amo semi timotekipachojtokej porin tikmatij ke tikeujtokej tepitsin tomin” (Carlos).

AMO XIONMOTAUIKALTI UAN XIKONEUA TOMIN

Amo xionmotauikalti uan xikoneua tomin

Xikonixtali amo tionmotauikaltis. Okachi kuali xikoneua tomin para tikonkouas sayoj tein moneki.
Sejse metsti xikoneujtiuj tepitsin tomin para keman monekis oso keman tikonpias se ouijkayot.

KUALI XIONTEKITI

Biblia kijtoua: “Itech nochi taman tekit chikauak onkak tein kuali” (Proverbios 14:23).

Kuali xiontekiti

Maski amo tikonuelita tekit tein tikonpia, xikonita ke mitsonpaleuia xikontani tomin.
Xionmochikaua kuali tiontekitis uan maj kiitakan ke titakuaujtamach. Nejon mitsonpaleuis xikonsentoka xikonpia tekit uan komo mitsonkuiliaj, amo ouij tikonajsis okse.

“Nikchiua tein yeski tekit, maski amo semi nikuelita oso amo nechtaxtauiaj kemej niknekiskia. Nimochikaua kuali nitekitis, kemej yeskia para nejua” (Dimitri).

¿Tikontemojtok tekit?

Xiontanotsa kampa tikonitas ke onkak tekit, maski amo kitematiltiaj ke kintemojtokej tekitinij. Xikonilui mochankauan uan akin iniuan tionmouika ke tikontemojtok tekit.
Xikonchiua tein yeski tekit, maski amo se tekit tein tikonuelitas.