¿Uelis techpaleuis Biblia keman amo techajsis tomin?

Tein Biblia kijtoua

Kemaj. Maj tikitakan naui taman tein Biblia kijtoua tein uelis mitsonpaleuis komo tionmotauikaltij oso amo mitsonajsi tomin.

1. Xikonkoua sayoj tein monekis. Biblia kijtoua ke komo kuali tiknemiliaj tein tikchiuaskej, kuali kisas tein tikixtaliskej sayoj ke komo tikijsiujkachiuaj teisa, amo kuali techkisas (Proverbios 21:5). Amo sayoj xikonkoua teisa porin tikonuelitak oso porin tikonitak ke amo semi patiyoj. Xikonixtali kanachi tomin tikuis uan amo xikgastaro okachi.

2. Amo xionmotauikalti komo amo moneki. “Akin taneui teisa mochiua itakeual [de] akin tetaneujtia.” (Proverbios 22:7.) Komo tiontauika tomin uan amo ueliok tikonixtaua, xikontemo okse taman kemej uelis tiontaxtauas. Biblia kiniluia akin amo kiyeknemilijkej keman motauikaltijkej maj kitemokan tajtoskej iuan akin kintaneujtij tomin uan ijkon kimatiskej tein uelis kichiuaskej para uelis taxtauaskej (Proverbios 6:1-5). Maski amo niman kuali mitsonnankiliskej, tejuatsin xikonsentoka xiktemo tein uelis tikonchiuas.

3. Amo xikonita ke tomin yejua tein okachi moneki. Biblia kijtoua ke akin sayoj kineki motomintis uelis kipanos tein amo kuali uan amo yolpakis (Proverbios 28:22). Komo aksa tenexikoluia uan kitelnejneki tomin, nejon uelis kichiuas maj moijtako uan maj tajyoui.

4. Xionyolpaki ika tein tikonpia. “Yejua ika, komo tikpiaj tein tikuaskej uan tein timotaliliskej, maj ika nejon tiyolpakikan.” (1 Timoteo 6:8). Tomin amo kichiua maj se yolpaki. Miakej yolpakij uan amo porin kipiaj miak tomin, ta porin ininchankauan uan akin kuali iniuan mouikaj kintasojtaj uan no porin kuali mouikaj iuan Dios (Proverbios 15:17; 1 Pedro 5:6, 7).