Toni uelis nikchiuas para amo semi nimotekipachos
Komo nochipa timotekipachouaj uelis tikokolispeuaskej uan amo tiyolpakiskejok. Uan xa kichiuas maj techpano okseki taman ke tein ika timotekipachojtoyaj.
Tein techpaleuis maj amo semi timotekipachokanok
Amo semi xikonita, xikonlero oso xikonkaki tein amo kuali tein panotok. Amo moneki tikonmatis nochi tein amo kuali tein panotok. Komo nochipa tikitstokej nochi nejon kichiuas maj okachi timotekipachokan uan okachi timouiskej.
Tein kijtoua Biblia: “Sayoj ke akin semi tayokoya semi sioui” (Proverbios 17:22).
“Semi ijsiujka se kinekis se kimatis tein yankuixtok mochiuak, sayoj ke nejon amo tapaleuia. Keman amo nikmati nochi tein panotok, amo semi nimotekipachoua” (John).
Xionmotajtani nejin: ¿Kanachpa moneki tikonitas tein motematiltia para tikonmatis nochi tein panotok?
Xikonchiua tein tionmomattok tikonchiuas. Xikonixtali toni hora tionmeuas, tiontakuas, tikonchiuas tein moneki kalijtik uan toni hora tionkochis. Tikonixtalis toni hora tikonchiuas teisa mitsonpaleuis kuali xinemi uan amo semi xionmotekipachook.
Tein kijtoua Biblia: “Akin tekiti para kiixtalis tein kichiuas, kuali kikisas tein kichiuas” (Proverbios 21:5).
“Keman peuak kokolis COVID-19, nikpatak nochi tein nimomattoya nikchiuas uan peuak nimoixpetania ika miak taman tein amo nechpaleuiaya. Kemej niknekia kuali nikuis notiempo, nikixtali nochi tein nikchiuaskia sejse tonal” (Joseph).
Xionmotajtani nejin: ¿Tikonixtalijya toni tikonchiuas sejse tonal? ¿Tikonmachilij ke tionyolpakik keman tamik tonal porin tikonchiuak nochi tein tikonixtalijka?
Xikonnemili tein kuali. Komo sayoj tikonnemilijtok keniuj okachi kuali tikonchiuaskia teisa oso toni uelis mitsonpanos satepan, kichiuas okachi xionmotekipacho. Okachi kuali, xikonelnamiki seki taman tein mitsonpanouani uan tikontasojkamati.
Tein kijtoua Biblia: “Nochipa ximotasojkamatikan” (Colosenses 3:15).
“Keman nikleroua Biblia amo nitanemilia itech tein amo kuali ta niknemilia tein kuali. Maski kijtouanijya maj ijkon se kichiua, tein melauj kemaj tapaleuia” (Lisa).
Xionmotajtani nejin: ¿Sayoj tikonnemilijtok tein amo kuali tein mitsonpanouani uan tikonelkaua nochi tein kuali tein tikonpia?
Xiontanemili itech oksekin. Keman semi timotekipachojtokej sayoj tiknekij tietoskej toselti. Maj amo tikchiuakan nejon, ta maj tiknemilikan keniuj uelis tikinpaleuiskej oksekin.
Tein kijtoua Biblia: “Amo xiktemokan tein sayoj namejuan namechpaleuis, ta no tein kinpaleuis oksekin” (Filipenses 2:4).
“Tikinpaleuis oksekin kichiua xiyolpaki. Tikchiua seki taman para maj kuali momachilikan uan amo semi tiknemiliaok tein mitstekipachojtok. Amo tikemantiok para timotekipachojtos” (Maria).
Xionmotajtani nejin: ¿Tikonixmati aksa akin kineki maj kipaleuikan? ¿Toni uelis tikonchiuas para tikonpaleuis?
Xionmoyekpia. Xikonchiua ejercicio uan kuali xionmoseui. Kuali xiontakua. Komo tionmoyekpia mitsonpaleuis xionyolpaki uan amo semi xionmotekipachook.
Tein kijtoua Biblia: “Keman tikchikauaj tonakayo techpaleuia itech seki taman” (1 Timoteo 4:8).
“Nokoneuj uan nejua amo semi ueli tikisaj para tikchiuaskej ejercicio, yejua ika tikixtalijkej tikchiuaskej nikan kalijtik. Nejon techpaleuia maj kuali tietokan uan maj kuali timouikakan” (Catherine).
Xionmotajtani nejin: ¿Tikonita ke moneki kuali tiontakuas uan tikonchiuas ejercicio para kualtsin tionyetos uan amo tionkokolispeuas?
Miakej kinpaleuiani kichiuaskej nochi nejin tein tikitanij para amo semi motekipachoskej. ¿Uan toni no kinpaleuiani? Kimatiskej nochi tein Biblia kijtoua ke mochiuas satepan, tein kemaj uelis tikneltokaskej. Xikonlero tamachtilis “¿Toni kichiuas iTekiuajyo Dios?”.