Amo xionmotekipacho

TEIN TAYOLMAJXITIA BIBLIA: “Amo ximoyolkuejmolojtinemikan” (Mateo 6:25).

¿Toni kijtosneki? Jesús kijtoj nejon tajtolmej itech tamachtilis tein kitemakak itech se tepet. Se diccionario tein ika tajtoua Biblia, kinextia ke tajtol griego tein mokepa kemej “ximoyolkuejmolojtinemikan” kijtosneki “tein kimachilia aksa keman kipanoua tatasojtilis, mayan uan okseki taman tein kitekipachoua mojmostaj itech inemilis”. Tein miakpa techtekipachoua yejua tein uelis techpanos satepan. Kuali yetok maj timotekipachokan ika tein timoixpanoltiskej uan maj kuali moajsikan akin tikintasojtaj (Filipenses 2:20). Sayoj ke, keman Jesús kijtoj: “Amo ximoyolkuejmolokan”, kijtosnekia ke maj amo tel senka timotekipachojtokan ika tein uelis panos satepan porin nejon uelis kichiuas maj amo tiyolpakikan itech tonemilis (Mateo 6:31, 34).

¿Tapaleuia nejin tayolmajxitilis? Tein kijtoj Jesús semi taixejekol. Seki amaixmej kijtouaj ke ijkuak aksa amo kichiua maj seui inetekipacholis, tein kiluiaj sistema nervioso simpático kisentoka tekititok chikauak. No kinextiaj ke ijkuak aksa ijkon moajsi uelis kiualkuilis okseki taman kokolismej “kemej úlceras, kokolismej itech se iyolo uan asma”.

Jesús kinextij keyej moneki maj amo semi timotekipachojtokan: porin amo tapaleuia. Yejua kijtoj: “¿Akoni de namejuan uelis momajxitis se molik ok para kachi uejkapantiyas, maski kachi moyolkuejmolos?” (Mateo 6:27). Senkis timotekipachojtoskej amo kichiuas maj okachi kuali timoajsikan nion maj okachi tinemikan. Uan no, amo nochipa mochiua tein amo kuali tein tiknemiliayaj. Kemej kijtoj se takat akin momachtiani nejon: “Se motekipachos ika tein panos satepan sayoj nenkaj, uan tein panos satepan [...] amo nochipa amo kuali kemej tikmouiliayaj maj pano”.

¿Toni uelis techpaleuis maj amo semi timotekipachojtokan? Yekinika, xiontakuaujtamati iuan Dios. Komo Dios kintamaka totomej uan kualtsin kintakentia xochimej, semi melauak ke no kinyekpias akin kiueyichiuaj (Mateo 6:25, 26, 28-30). Uan ojpatika, amo xiontanemilijto ika tein panos satepan. Jesús kijtoj: “Amo ximoyolkuejmolokan den toni mochiuas mosta, porin ne tonal den mosta kualkuis okse ne kuejmololis. Cada se tonal kipia ne ouijkayot” (Mateo 6:34).

Komo tikchiuaj tein Jesús tayolmajxitij, amo tikpiaskej seki kokolismej uan tikpiaskej yolseuilis, tein Dios kitemaka (Filipenses 4:6, 7).