¿Uelis tekiuajyomej kitsakuiliskej maj amo mochiua se ueyi tetsauit? | ¿Toni kijtoua Biblia?

Domingo 20 de noviembre xiuit 2022, tamik nechikol tein kipiakej Naciones Unidas, kampa ika tajtojkej keniuj okachi tona uan okachi kioui (COP27). Akin ompa yetoyaj kisentilijkej tomin para kinpaleuiskej altepemej akin uelis kinijtakos komo okachi tona oso kioui. Maski amo keman kichiujtoyaj nejon, miakej kinemiliaj ke nejin amo tapaleuis maj moyektali kuejmol.

“Nechyolpaktia nikinpaleuis ika tomin akin tajyouiaj keman mochiua se tetsauit [...]. Tikmatij ke amo sayoj nejon moneki [...]. Taltikpak kisentoka uejueliui” (António Guterres, secretario general de las Naciones Unidas; 19 de noviembre xiuit 2022).
“Amo uejkaua taltikpak uelis uejueliuis” (Mary Robinson, akin katka tekiuaj ompa Irlanda uan no katka alta comisionada itech ONU para los Derechos Humanos; 20 de noviembre xiuit 2022).

Telpochmej uan ichpochmej kintekipachoua toni kipanos taltikpak satepan. ¿Uelis tekiuanij mosenpaleuiskej uan kitsakuiliskej maj amo semi tona oso kioui? ¿Toni kijtoua Biblia?

¿Uelis tekiuajyomej mosenpaleuiskej uan kitsakuiliskej tein panotok?

Maski miakej yekmelauj kinekij tapaleuiskej uan kichiuaj miak taman para maj amo kisentoka moijtako taltikpak, Biblia kijtoua ke amo miak tein uelis kichiuaskej. Maj tikitakan ome taman tein kinextia keyej:

“Tein chikotik amo ueli momelaua (Eclesiastés 1:15).

Tein kijtosneki: Tekiuanij amo ueli kichiuaj tein kiixtaliaj porin amo chijchiujtokej kemej uelis moixyekanaskej ininselti. (Jeremías 10:23). Maski tekiuajyomej mosenpaleuiskiaj, amo ueliskia kiyektaliskej kuejmolmej itech nochi taltikpak maski semi mochikauaskej.
“Porin tel miakej sayoj yejuan motasojtaskej; semi kitemoskej motomintiskej [...], amo kinekiskej moyektenkauaskej iniuan oksekin” (2 Timoteo 3:2, 3).

Tein kijtosneki: Biblia achto kijtojka ke miakej sayoj yejuan motasojtaskiaj uan ke amo kinekiskiaj sentekitiskej para kinpaleuiskej oksekin. ¿Melauj ke tikitaj nejon?

Se taman tein techpaleuia maj tikchiakan tein kuali

Tein kijtouaj ke kichiuaskej tekiuanij amo yejua nejon tein kiyektalis taltikpak. Ta Dios kiixtalijya se tekiuaj akin kuali kiixyekanas taltikpak: Jesucristo. Biblia kijtoua nejin:

“Kipias tanauatil para taixyekanas. Kiixmatiskej kemej Kuali Tayolmajxitijkej, Dios akin Chikauak, TePopaj akin nemi Nochipaya, Taixyekankej akin kiualkui Yolseuilis” (Isaías 9:6).

Jesús yejua Tekiuaj itech iTaixyekanalis Dios, tein moajsi iluikak (Mateo 6:10). Yejua kipia chikaualis, tamatilis uan kinejneki kiyekpias taltikpak uan nochin akin ompa nemij (Salmo 72:12, 16). Keman taixyekantos nejin tekiuajyot tein moajsi iluikak kinixpolos “akin kiixpolojtokej taltikpak” uan no kiyektalis (Apocalipsis 11:18; Isaías 35:1, 7).

Komo tikonneki tikonmatis okachi keniuj senkis moyektalis taltikpak, xikonlero tamachtilis “¿Qué dice la Biblia sobre el cambio climático y nuestro futuro?”.