¿Keniuj kinmachtiaj itaixpantijkauan Jehová para kichiuaskej seki tekit?

Tiitaixpantijkauan Jehová techmachtiaj keniuj uelis tikchiuaskej itech tonemilis tein Cristo tamachtij, uan no techmachtiaj para uelis tikteixmatiltiskej kuali tanauatilmej uan titamachtiskej ijkon kemej Jesús tanauatij (Mateo 24:14; 28:19, 20). Nochi nejin timomachtiaj keman timosentiliaj nochi semanas uan itech uejueyi nechikolmej tein mochiua xijxiujtika. Uan itaixpantijkauan Jehová akin kinmakaj okseki tekit tein moneki kichiuaskej itech nechikol oso itech organización kampa tipouij, kiselitij okseki tamachtilis tein mokixtia itech Biblia.

Itech nejin tamachtilis, tikitaskej nejin:

¿Keniuj kinmachtiaj itaixpantijkauan Jehová?

Keman timosentiliaj. Nochin semanas tiitaixpantijkauan Jehová ojpa semana timosentiliaj itech kalmej tein tikchijchiuaj para timosentiliskej. Timosentiliaj itajkotian semana uan no itamian semana. Nochin uelis yaskej uan amo motajtani tomin.

Keman timosentiliaj itajkotian semana. Ompa timomachtiaj keniuj titaleroskej kemej moneki, keniuj titanojnotsaskej uan titamachtiskej sentaixpan uan keniuj titetapouiskej itajtol Dios uan keniuj titamachtiskej. Yejua ika kipanoltiaj tanojnotsmej, tamachtilis kampa kinankiliaj tein kintajtaniaj, kiixnextiaj keniuj tanojnotsaskej uan kiitaj videos. Nochin nejin techpaleuia maj tikteixmatiltikan itajtol Dios uan maj tikinmachtikan ika Biblia akin kineki momachtis. Tinochin akin timosentiliaj techpaleuia tein ompa timomachtiaj uan no techpaleuia maj okachi titakuaujtamatikan iuan Dios uan maj tiktasojtakan toTajtsin uan oksekin taneltokanij.
Keman timosentiliaj itamian semana. Achto motemaka se tanojnots para kikakiskej akin kinyoleuaj maj takakitij. Uan satepan timomachtiaj amatajkuilol Tanejmachtijkej,a uan tiknankilijtiyouij tein tajtantiuj akin kiixyekana tamachtilis. Nejon tein timomachtiaj kimelaua tein Biblia kijtoua oso tein Biblia tayolmajxitia tein techpaleuia maj tikitakan keniuj tiktekitiliskej Dios uan keniuj tinemiskej.

Keman tikpiaj uejueyi nechikolmej. Expa xiuit timiakej timosentiliaj uan ualeuaj de miakkan kampa mosentiliaj. Moixtalia se itokay tein timomachtiskej itech nejon ueyi nechikol uan nochin kinyolpaktia ompa yetoskej. Tikakij tanojnotsmej, technextiliaj keniuj tikchiuaskej teisa, sekin kitetapouiaj tein kinpanouani uan tikitaj videos. Ijkon kemej okseki nechikolmej tein tikpiaj, nejin uejueyi nechikolmej techpaleuiaj maj okachi tikmatikan tein kijtoua Biblia uan maj okachi kuali tikteixmatiltikan itajtol Dios. Nochin uelis yaskej uan amo motajtani tomin.

Seki itaixpantijkauan Jehová kiselitij seki taman tamachtilis

Sekin itaixpantijkauan Jehová kinyoleuaj maj kiselitij seki taman tamachtilis para uelis kichiuaskej seki tekit. ¿Toni taman tamachtilis kiselitij? ¿Keniuj kinpaleuia uan kanachi uejkaua? ¿Uan akonimej uelis yaskej?

Tamachtilis para akin Tekitij kemej Precursor

Keniuj kinpaleuia: Nejin tamachtilis kiseliaj seki itaixpantijkauan Jehová akin tekitij kemej precursor.b Yejuan miak tonalmej kitetapouiaj itajtol Dios. Kinpaleuia maj okachi kuali kiteixmatiltikan itajtol Dios uan maj tamachtikan. Ixyetok toni momachtiskej, kikakij tanojnotsmej, uan no momamachtiaj keniuj moneki kichiuaskej tekit.
Kanachi uejkaua: Chikuasen tonal.
Akonimej kinyoleuaj: Akin kipiaj se xiuit kemej precursor uan akin panokya makuil xiuit keman kiselijkaj nejon tamachtilis.

Tamachtilis para akin kiteixmatiltiaj iTaixyekanalis Dios

Keniuj kinpaleuia: Kinmachtiaj precursores akin ipa uelijya kichiuaj tekit para okachi ueliskej kichiuaskej nejon tekit. Yejuan tel kuali momachtiaj keniuj kiteixmatiltiskej itajtol Dios uan keniuj tamachtiskej. No tel kuali kitemoliaj seki taman tein Biblia tamachtia. Miakej akin kiselitij nejon tamachtilis kinyoleuaj maj yakan tekititij kampa poliujtok maj moteixmatilti itajtol Dios.
Kanachi uejkaua: Ome metsti.
Akonimej kinyoleuaj: Precursores akin tajtanij kiseliskej nejin tamachtilis, kichiujtokej tein motajtani uan ueliskej yaskej tekititiuij kampa monekis.

Tamachtilis para Tayekananij itech Nechikol

Keniuj kinpaleuia: Kinpaleuia akin tekitij tein moixmatij kemej tayekananijc itech nechikol para kimatiskej keniuj kinmachtiskej akin mosentiliaj uan keniuj kinpaleuiskej maj okachi motokikan iuan Dios, uan no kinmachtiaj keniuj kichiuaskej okseki tekit tein kipiaj. No kinpaleuia maj okachi kitasojtakan Dios uan tokniuan (1 Pedro 5:2, 3).
Kanachi uejkaua: Makuil tonal.
Akonimej kinyoleuaj: Kinyoleuaj tayekananij akin yankuixtok peujkej kichiuaj nejon tekit oso akin uejkaujya kichiujtokej nejon tekit uan makuil xiuitya amo kiselijtoyaj nejon tamachtilis.

Se akin kiselito Tamachtilis para Tayekananij kinankilijtok tein tajtankej.

Tamachtilis para Tokniuan Takalpanouanij uan Ininsiuatsin

Keniuj kinpaleuia: Kinpaleuia tokniuan takalpanouanijd maj kuali kichiuakan tekit tein kipiaj itech tataman nechikolmej kampa ixyetok takalpanoskej (1 Timoteo 5:17). No kinpaleuia yejuan uan ininsiuatsin maj kuali kiajsikamatikan tein kijtoua Biblia.
Kanachi uejkaua: Se metsti.
Akonimej kinyoleuaj: Tokniuan takalpanouanij uan ininsiuatsin akin kipiaj se xiuit desde ke peujkej kichiuaj nejon tekit. Uan no oksepa kinyoleuaj keman kiajxitiaj makuil xiuit.

Akin kiselitoj Tamachtilis para Takalpanouanij uan Ininsiuatsin kuali takaktokej.

Tamachtilis para Tayekananij uan Tapaleuianij

Keniuj kinpaleuia: Kinpaleuia tayekananij uan tapaleuianije maj kimatikan kichiuaskej tekit tein kipiaj itech nechikol (2 Timoteo 3:1). Amo miak xiujmej panouaj para oksepa kiseliskej nejon tamachtilis.
Kanachi uejkaua: Se tonal, uan kemansa panoua se tonal.
Akonimej kinyoleuaj: Tokniuan takalpanouanij, tayekananij uan tapaleuianij.

Tamachtilis para akin Tekitij Betel

Keniuj kinpaleuia: Kinpaleuia akin tekitij Betelf maj kimatikan keniuj kichiuaskej tekit tein kipiaj uan no kinpaleuia maj okachi kitasojtakan Dios uan oksekin akin no tekitij ompa.
Kanachi uejkaua: Makuil tonal uan tajko.
Akonimej kinyoleuaj: Akin yekin peuaj tekitij ompa Betel oso akin uejkaujya ompa tekititokej uan panokya makuil xiuit keman kiyoleujkaj maj kiseliti nejon tamachtilis.

Tamachtilis ika Biblia tein monotsa Galaad de iTaixpantijkauan Jehová

Keniuj kinpaleuia: Kinpaleuia maj okachi kitasojtakan itajtol Dios uan no kinpaleuia maj kiitakan keniuj kichiuaskej kemej momachtiaj (1 Tesalonicenses 2:13). Nejon takamej uan siuamej akin yektalnamikij uan kiselitij tamachtilis Galaad, okachi ueli tapaleuiaj maj motamachti ika Biblia uan okachi uelij kichiuaj tekit tein kipiaj itaixpantijkauan Jehová. Akin kiselitij nejon tamachtilis, uelis kintitaniskej maj kiteixmatiltitij itajtol Dios oso maj tekititij itech semej sucursal de itaixpantijkauan Jehová itech país kampa pouij oso okseko.
Kanachi uejkaua: Makuil metsti.
Akonimej kinyoleuaj: Akin tekitij Betel kinyoleuaj sekin akin tekititokej kemej misioneros, precursores especiales, akin tekitij Betel uan akin takalpanouaj itech nechikolmej uan ininsiuatsin. Nejin tamachtilis kiselitij kampa yetok Centro Educativo de la Watchtower, ompa Patterson (Nueva York).

Tamachtilis para akin Taixyekanaj itech Sucursal uan Ininsiuatsin

Keniuj kinpaleuia: Akin taixyekanaj itech sucursalg kinpaleuia maj kimatikan keniuj kiixyekanaskej tekit tein mochiua itech se sucursal uan tekit tein kichiuaj itaixpantijkauan Jehová itech país oso países kampa kiixyekanaj nejon tekit.
Kanachi uejkaua: Ome metsti.
Akonimej kinyoleuaj: Akin tekitij itech ueyi kali kampa kinixyekanaj itaixpantijkauan Jehová, kinyoleuaj sekin akin taixyekanaj itech sucursal. Nejon tamachtilis kiselitij kampa yetok Centro Educativo de la Watchtower, ompa Patterson (Nueva York).

¿Kani kikixtiaj nejon tamachtilis tein kiselitij?

Itech Biblia. Nochipa kikixtiaj itech Biblia tein tamachtiaj itaixpantijkauan Jehová. Tikneltokaj ke Dios kichiuak maj moijkuilo nochi tein kijtoua Biblia uan yejua okachi kuali tamachtilis kipia para nochi taman tein tikchiuaskej kemej itatojtokakauan Cristo (2 Timoteo 3:16, 17).

¿Taxtauaj para kiseliskej nejon tataman tamachtilis?

Amo. Nejon tamachtilis amo moixtaua. Nochi tekit tein kichiuaj itaixpantijkauan Jehová moixtaua ika tomin tein kitemakaj akin kipiaj pakilis tapaleuiskej (2 Corintios 9:7).

a Itech internet, jw.org, tikonajsis Biblia uan seki videos para ika se momachtis Biblia uan okseki tamanok.

b Sekin itaixpantijkauan Jehová kichiuaj tekit tein moixmati kemej precursor. Kipiaj kanachi horas kitemoskej kiteixmatiltiskej itajtol Dios itech se metsti. Yejuan kitemouaj kuali monejnemiltiskej.

c Nejin tayekananij kuali taixejekouaj uan kinmachtiaj ika Biblia akin mosentiliaj uan no kinyolchikauaj. Amo kintaxtauiaj keman kichiuaj nejon tekit.

d Se tokniuj takalpanojkej yejua se tayekankej akin kikui nochi itiempo para yas sejse semana kinpalpanotiuj sejse nechikol tein ixyetok kinkalpanos. Kitemaka tanojnotsmej para kinyolchikauas akin mosentiliaj uan youi kitetapouiti itajtol Dios iniuan.

e Tokniuan tapaleuianij kichiuaj tataman tekit para kipiaskej tein moneki akin mosentiliaj. Ijkon tayekananij okachi uelij tamachtiaj uan kinyolchikauaj tokniuan para kisentokaskej kitasojtaskej Dios.

f Kinotsaj Betel sejse sucursal tein kipiaj itaixpantijkauan Jehová. Akin ompa tapaleuiaj, kikuij nochi inintiempo para tapaleuiskej maj mochiua tekit tein kichiuaj itaixpantijkauan Jehová itech altepemej kampa sucursal kiita nejon tekit.

g Itech sejse sucursal taixyekanaj eyin oso okachi takamej akin yektalnamikij.

¿Keniuj kinpaleuia itaixpantijkauan Jehová nejon tamachtilis tein kiseliaj?

“Nejua semi nipinaua nitajtos uan nechouijmaka nikintapouis tein kijtoua Biblia akin amo nikinixmati. Tein timomachtiaj keman timosentiliaj itajkotian semana, nechpaleuia maj amo semi nechouijmaka nitajtos uan maj ueli okachi kuali nitamachti. Uan no nechpaleuia maj amo semi nechouijmaka nitajtos iniuan oksekin akin mosentiliaj uan akin iniuan nitekiti” (Natasha, Estados Unidos).
“Tamachtilis para akin kiteixmatiltiaj iTaixyekanalis Dios nechpaleuij maj nitetasojta, maj amo niyolijsiui, maj nikualtakat uan maj niknexti okseki taman kemej nejon. Nochi nejin nechpaleuia maj ueli kuali nimouika iniuan oksekin. Nechpaleuij maj nikita keniuj niktemolis tein kijtosneki tein kijtoua Biblia uan maj nitamachti kemej kinyololinis akin nechkakij” (Stephen, Nigeria).
“Tamachtilis para Tayekananij itech Nechikol nechpaleuij maj niyolyemanik ijkon kemej moneki yeski se tayekankej. Itech tanojnotsmej tein nikakik, nikajsikamatik ke semi moneki nikchiuas kemej Jesús kichiuaya” (Luca, Italia).
“Tamachtilis para Tayekananij uan Tapaleuianij nechmachtij ke moneki maj nechitakan oksekin ke uelis nouan tajtoskej keman monekis, maj nikualtakat uan maj nitetasojta. Nechmachtij ke moneki nitapaleuis porin nikneki nikchiuas uan amo sayoj porin moneki nikchiuas” (Samuel, Reino Unido).
“Tamachtilis Galaad techpaleuij maj kemej yeskia timoixitakan itech se espejo keman timomachtijkej itajtol Dios (Santiago 1:22-25). Uelik tikitakej toni moneki tikpataskej itech tonemilis uan keniuj kuali tiktekitiliskej Dios. No techmachtij maj okachi titanemilikan itech oksekin uan maj tiknextikan ke titetasojtaj keman teisa tikchiuaskej oso tikijtoskej” (Elnathan y Princess, Filipinas).