¿Keniuj uelis kualtsin tinemiskej itech taltikpak?
Tein Biblia kijtoua
Amo uejkaua tinochin kualtsin tinemiskej itech taltikpak, sayoj ke nejin amo uelis kichiuas aksa, ta sayoj iTaixyekanalis Dios. Nejin taixyekanalis yetok iluikak uan akin taixyekanas yejua Jesucristo. Xikonita tein Biblia kijtoua.
Dios kitamis “neteuilismej noyampa taltikpak”, uan kijtoua ke “maj yolseujtokan [itech taltikpak] akin Dios kiita ke kiyolpaktiaj” porin ijkon kiixtalij kichiuas (Salmo 46:9; Lucas 2:14).
ITaixyekanalis Dios tein moajsi iluikak taixyekanas itech nochi taltikpak uan kichiuas maj xolalmej uan altepemej amo xexeliujtokanok. Uan kichiuas maj amo akinok mochikoita porin yejua nejon tein axkan kichiua maj miakej moteuikan (Daniel 7:14).
Jesús yejua tekiuaj itech iTaixyekanalis Dios, no moixmati kemej Taixyekankej akin kichiuas maj kualtsin tinemikan uan kualtsin tietokan (Isaías 9:6, 7).
Keman Jesús taixyekantos, nochin akin kisentokasej takuejmolchiuaskej ixpoliuiskej, porin Dios “kitauelita akin kiuelita tateuis” (Salmo 11:5; Proverbios 2:22).
Dios kineki maj akin kitekitiliaj amo tateuikan, yejua ika Biblia kijtoua: “Ininespadas kichiuaskej teposmej tein ika talkaxaniaj uan ininlanzas tein ika se tatejteki”. Amo momijmiktiskejok itech nion se altepet, nion no momachtiskejok tateuiskej (Isaías 2:3, 4).
Itech nochi taltikpak tel miakej itaixpantijkauan Jehová momachtianij keniuj kuali mouikaskej iniuan oksekin (Mateo 5:9). Maski tataman kemej tinemij, titajtouaj uan tikayomej itech miak tataman xolalmej, amo keman timokalakiskiaj itech neteuilis nion tikinteuiskiaj oksekin.
Itaixpantijkauan Jehová kitemojtokej kuali mouikaskej iniuan oksekin