¿Keyej amo tikelnamikij keman Jesús moajokuik?
Tein kijtouaj uan tein melauak
Tein kijtouaj: Itaixpantijkauan Jiova amo kielnamikij keman moajokuik Jesús porin amo kichiuaj kemej Cristo.
Tein melauak: Tikseliaj Jesucristo kemej toTemakixtijkauj uan senkis timochikauaj tiktojtokaskej ‘ineskayot [...] ika miak nejmachkayot’ (1 Pedro 2:21, Traducción del Nuevo Mundo; Lucas 2:11).
Tein kijtouaj: Namejuan amo nankineltokaj ke Jesús oksepa kipiak nemilis.
Tein melauak: Amo sayoj tikneltokaj ke Jesús oksepa kipiak nemilis, ta senkis tikneltokaj ke itech ineajokuilis peua totakuaujtamatilis. Tein melauj, yejua se taman tein tikitaj ke motelneki tikteixmatiltiskej (1 Corintios 15:3, 4, 12-15).
Tein kijtouaj: Amo kinkauaj ininkoneuan maj yolpakikan itech iluimej.
Tein melauak: Tikintasojtaj tokoneuan uan semi timochikauaj kuali tikinojtokaltiskej uan tiktemouaj maj yolpakikan (Tito 2:4).
¿Keyej itaixpantijkauan Jiova amo kielnamikij keman Jesús moajokuik?
Tein momattokej kichiuaskej itech tonal ijkuak kielnamikij keman Jesús moajokuik itech seki altepemej amo mouika iuan tein tamachtia Biblia.
Jesús kijtoj maj tikelnamikikan keman momikilij, amo keman moajokuik. Tiitaixpantijkauan Jiova xijxiujtika tikelnamikij keman momikilij ijkon kemej kinextia calendario tein mokuia ne uejkauj (Lucas 22:19, 20).
Tikajsikamatij ke miak taman tein momattokej kichiuaskej itech tonal ijkuak kielnamikij keman Jesús moajokuik, mouika iuan tachiualismej tein ualeuaj itech taneltokalismej tein amo melaujkej uan amo kiyolpaktiaj Dios. Yejuatsin kijtoua: “Maj sayoj nejua nechueyichiuakan” uan kiyolxokolia komo tikchiuaj tein yejuatsin kiita ke amo kuali yetok (Éxodo 20:5; 1 Reyes 18:21).
Tikyekmatij ke amo tikelnamikiskej keman Jesús moajokuik mouika iuan tein tamachtia Biblia. Uan nejon techyolchikaua maj ‘tikyekpiakan tamatilis tein uelis se kitekitiltis’ uan amo maj tikchiuakan tein oksekin momattokej kichiuaskej (Proverbios 3:21; Mateo 15:3). Uan maski ika miak pakilis tikmelauiliaj tein tikneltokaj akin techtajtania, tikpoujkaitaj tein yejuan kiixpejpenaj kichiuaskej (1 Pedro 3:15).