Mikemej oksepa nemiskej, ¿toni kijtosneki nejon?
Tein Biblia kijtoua
Tajtol griego anástasis tein itech Biblia motajtolkepa kemej “mikemej oksepa nemiskej”, kijtosneki “moajokui”. Keman mikemej oksepa nemiskej, kemej yeskia oksepa moajokuiskej uan nemiskej kemej achto katkaj (1 Corintios 15:12, 13).
Maski itech Antiguo Testamento oso Escrituras Hebreas, amo ixnesi tajtolmej mikemej oksepa nemiskej, kemaj kijtoua ke mikemej uelis oksepa nemiskej. Yejua nejon kijtoj Oseas tein Dios kichiuas: “Namechmakixtis de ichikaualis miketekoch; namechmakixtis den mikilis” (Oseas 13:14; Job 14:13-15; Isaías 26:19; Daniel 12:2, 13).
¿Kani oksepa nemiskej akin momikilijkej? Sekin nemiskej ne iluikak uan ompa tekiuajtiskej iuan Cristo (2 Corintios 5:1; Apocalipsis 5:9, 10). Biblia kijtoua ke yejuan “akin yekinika oksepa nenkej”, oso “akin yekinika oksepa nemis[kej]” (Apocalipsis 20:6; Filipenses 3:11). Nejin kijtosneki ke okseki mikemej no oksepa nemiskej. Semi miakej yeskij uan yejuan nemiskej nikan taltikpak (Salmo 37:29).
¿Toni panos keman oksepa nemiskej? Dios kimakak Jesús chikaualis para maj oksepa kinmaka nemilis akin momikilijkej (Juan 11:25). Ika nejon chikaualis, Jesús kinmakas nemilis “nochin akin yetokej itech miketekochmej”. Keman nemiskej, tanemiliskej kemej achto uan kielnamikiskej tein kichiuayaj keman yoltoyaj (Juan 5:28, 29). Akin oksepa nemiskej nikan taltikpak kipiaskej ininnakayo uan ininomiyo kemej ipa, uan amo kokolispeuaskejok (Isaías 33:24; 35:5, 6). Uan akin nemiskej ne iluikak, amo kipiaskej ininnakayo kemej tejuan, ta yejuan yeskij kemej akin nemij ompa iluikak (1 Corintios 15:42-44, 50).
¿Akonimej Dios oksepa kinmakas nemilis? Biblia tamachtia ke nikan taltikpak “Dios kichiuas maj oksepa nemikan akin yolmelaujkej uan akin amo yolmelaujkej” (Hechos 24:15). Sekin akin yolmelaujkej yejuan kemej Noé, Abrahán, Sara uan oksekin (Génesis 6:9; Hebreos 11:11; Santiago 2:21). Uan akin amo yolmelaujkej yejuan akin amo uelik kiixmatkej Dios uan yejua ika amo kitakamatkej.
Akin amo keman kinekkej kitakamatiskej Dios nion mopatakej, amo oksepa kipiaskej nemilis. Keman momikiliaj, ompa tami nochi (Mateo 23:33; Hebreos 10:26, 27).
¿Kemanian oksepa nemiskej? Biblia kijtoj ke peuaskiaj nemiskiaj ne iluikak keman mokepaskiaya Cristo, uan yejua mokepak itech xiuit 1914 (1 Corintios 15:21-23). Uan nikan taltikpak peuas oksepa nemiskej keman tekiuajtitos Jesucristo mil xiujmej, uan keman no mochiuas se xochital nikan taltikpak (Lucas 23:43; Apocalipsis 20:6, 12, 13).
¿Keyej uelis tikneltokaskej ke mikemej oksepa nemiskej? Biblia techtapouia de chiknauin akin oksepa nenkej uan miakej kinitakej keman oksepa nenkej (1 Reyes 17:17-24; 2 Reyes 4:32-37; 13:20, 21; Lucas 7:11-17; 8:40-56; Juan 11:38-44; Hechos 9:36-42; 20:7-12; 1 Corintios 15:3-6). Okachi tikakinij de Lázaro. Kiuikayaya naui tonal keman momikilijka uan Jesús kichiuak maj oksepa nemi ininixpan miakej (Juan 11:39, 42). Akin kitauelitayaj Jesús amo uelik kijtojkej ke amo melauj oksepa nemik Lázaro uan hasta kitemojkej kimiktiskej Jesús uan Lázaro (Juan 11:47, 53; 12:9-11).
Biblia kijtoua ke Dios kipia chikaualis para oksepa kinmakas nemilis akin momikilijkejya. Kemej amo teyi kielkaua, ueli kielnamiki senkis nochi. Uan kemej kipia nochi chikaualis, amo teyi uelis kitsakuilis maj kichiua (Job 37:23; Mateo 10:30; Lucas 20:37, 38). Amo sayoj ueli kinmaka nemilis akin momikilijkejya, ta no kineki kichiuas. Ijkon kijtoua Biblia ke kimachilia toDios: “Semi tiknekis oksepa tikitas tein momauan kichijchiujkej” (Job 14:15).
Tein sekin kinemiliaj ke mochiuas keman oksepa nemiskej mikemej
Tein sekin kinemiliaj: Teisa tein kisentokaya yoltoya keman momikilij, oksepa mosentilis iuan inakayo keman oksepa nemis.
Tein melauj: Biblia kijtoua ke akin momikilia amo kipia teisa tein kisentoka yoltok (Génesis 2:7; Ezequiel 18:4). Yejua ika keman aksa oksepa nemi, amo mosentilia iuan inakayo teisa tein kisentokaya yoltoya keman momikilij, ta oksepa nemi ijkon kemej katka achto ke momikiliskia.
Tein sekin kinemiliaj: Sekin akin oksepa nemiskej, niman oksepa kinixpoloskej.
Tein melauj: Biblia kijtoua ke “akin kichiujkej tein amo kuali, kiixtaliskej tein kinnamiki kiseliskej” (Juan 5:29). Nejin tajtolmej kijtosneki ke kiixtaliskej tein kinnamikis kiseliskej keman moitas toni kichiujkej satepan ke oksepa nenkej, amo tein kichiujkej achto ke momikiliskiaj. Jesús kijtoj: “Mikemej kikakiskej itajtol iKoneuj Dios, uan akin kitakamatiskej, nemiskej” (Juan 5:25). Komo yejuan kikakij itajtol Cristo, oso kichiuaj tein kinmachtia, inintokay moijkuilos “kampa ixnesij akin nemiskej” (Apocalipsis 20:12, 13).
Tein sekin kinemiliaj: Oksepa kipiaskej ininnakayo tein kipiayaj achto ke momikiliskiaj.
Tein melauj: Keman aksa momikilia, inakayo palani uan amo teyi mokauaok (Eclesiastés 3:19, 20).