¿Yekmelauj nemi Dios?

Tein Biblia kijtoua

Biblia kiyeknextia ke Dios yekmelauj nemi. Uan no, techmachtia ke para titakuaujtamatiskej iuan Dios, moneki tikyeknemiliskej keyej tikmatij ke nemij Dios uan amo sayoj tikneltokaskej tein oksekin kijtouaj (1 Juan 5:20; Romanos 12:1). Maj tikitakan toni kijtoua Biblia tein kinextia ke Dios yekmelauj nemi.

• Kemej nochi tein onkak kuali chijchiujtok, nejon kinextia ke aksa kichijchiuak. Biblia kijtoua: “Se kali kichijchiuak aksa, sayoj ke akin kichijchiuak nochi yejua Dios” (Hebreos 3:4). Nejin tein kijtoua Biblia amo ouij para se kiajsikamatis, uan miakej akin moueyimachtijkej kiitaj ke melauj tein kijtoua.a

• Tinochin tiknekij tikmatiskej keyej tinemij, uan keman amo tikmatij, amo kuali timomachiliaj. Ijkon timomachiliaj porin Biblia kijtoua ke “moneki maj Dios kinixyekana”, nejon kijtosneki ke tiknejnekij tikixmatiskej toDios uan tikueyichiuaskej (Mateo 5:3; Apocalipsis 4:11). Nejin kinextia ke nemi se Dios akin techtasojta, akin techchijchiuak maj tiknekikan tikixmatiskej uan ijkon maj tiyolpakikan (Mateo 4:4).

• Miak taman tein Biblia kijtojka ke mochiuaskia, mochiuak ijkon kemej ijkuiliujtoya uan nejin panok miak xiujmej satepan ke moijkuiloj. Kemej nochi mochiuak ijkon kemej moijtojka, nejon kinextia ke amo takamej inintanemilil tein kijkuilojkej (2 Pedro 1:21).

• 

  Akin kijkuilojkej Biblia kimatiaj seki taman tein ijkuak amo akin kimatia. Ne uejkauj, miakej kinemiliayaj ke se elefante, se kuakouej oso okse tapial kimamajtoya taltikpak. Sayoj ke amo yejua tein tamachtia Biblia. Kijtoua ke Dios “kipilojtok taltikpak ejekaixko” (Job 26:7). Uan no Biblia kijtoua ke taltikpak “ololtik” oso “youaltik” (Isaías 40:22). Miakej kineltokaj ke akin kijkuilojkej itech Biblia keniuj chijchiujtok taltikpak, uelik kimatkej porin Dios kinmatiltij.

• Biblia kinankilia miak taman tein motajtaniaj akin amo kineltokaj ke Dios nemi, kemej nejin: Komo Dios yolkuali uan kipia nochi chikaualis, ¿keyej mochiua tein amo kuali uan titajyouiaj? ¿Keyej taneltokalismej kichiuaj maj onka kuejmolmej? (Tito 1:16). Biblia kinankilia nejin uan okseki taman tein timotajtaniaj, uan tein tanankilia uelis kinpaleuis maj kineltokakan ke Dios yekmelauj nemi.