¿Mosentiliaj itaixpantijkauan Jiova iniuan okseki taneltokalismej?
Tiitaixpantijkauan Jiova tikuelitaj titajtoskej ika tein tikneltokaj iniuan akin kipiaj okse taneltokalis, sayoj ke amo titaueyichiuaj iniuan. Biblia kijtoua ke akin yekmelauj kichiuaj kemej Cristo moneki senyetoskej, yejua ika moneki kineltokaskej sayoj se taman (Efesios 4:16; 1 Corintios 1:10; Filipenses 2:2). Amo sayoj moneki maj kiitakan ke moneki motasojtaskej, moikneliskej, motapojpoluiskej uan kinextiskej okseki kualneskayomej. Tiitaixpantijkauan Jiova timomachtiaj Biblia ika miak nejmachkayot uan tein tikneltokaj senkis ompa tikixtiaj. Komo amo tikchiuaskiaj, totakuaujtamatilis nenkaj yeskia (Romanos 10:2, 3).
Biblia kijtoua ke komo akin kichiua kemej Cristo taueyichiua iuan aksa akin kipia okse taneltokalis, tamati “keme se yunta de kinsenilpia iuan se kuakuoue uan se burro” (2 Corintios 6:14-17). Kemej amo sayoj se taman tein kineltokaskiaj, itakuaujtamatilis akin kichiua kemej Cristo moijtakoskia. Yejua ika, Jesús kiniluij imomachtijkauan maj amo mosentilikan iniuan akin kipiaj okse taman taneltokalis (Mateo 12:30; Juan 14:6). Uan no, Tanauatil tein Dios kinmakak israelitas itechkopa Moisés, kinauatiaya maj amo sentaueyichiuakan iniuan okseki altepemej (Éxodo 34:11-14). Kemej kinekiaj kitakamatiskej nejin tanauatil, seki xiujmej satepan israelitas amo kiselijkej ininnepaleuil akin nemiaj ompakauin porin nejon kichiuaskia maj taueyichiuakan iniuan akin kipiayaj okse taneltokalis (Esdras 4:1-3).
¿Tajtouaj itaixpantijkauan Jiova iniuan akin pouij itech okseki taneltokalismej?
Kemaj. Ijkon kemej Pablo se imomachtijkauj Jesús, tiknekij tikajsikamatiskej kemej tanemiliaj uan tein kineltokaj “oksekin taka” (1 Corintios 9:19-22). Uan keman iniuan titajtouaj, timochikauaj tiknextiskej “moisyot” ika tein kineltokaj, ijkon kemej tayolmajxitia Biblia (1 Pedro 3:15).