¿Toni kijtosneki tanauatil “Xiktakachiua mopaj uan momaj”?
Tein Biblia kijtoua
Miakpa itech Biblia tikajsij nejin tanauatil “Xiktakachiua mopaj uan momaj” (Éxodo 20:12; Deuteronomio 5:16; Mateo 15:4; Efesios 6:2, 3). Para uelis tiktakamatiskej moneki tikchiuaskej nejin:
Maj se kinpatiuita. Keman titanemiliaj itech tein totatuan toka kichiujkej tiknextiaj ke tikintakachiuaj. Uan no tiknextiaj ke tikinpatiuitaj keman tikintakamatij ijkuak techyolmajxitiaj (Proverbios 7:1, 2; 23:26). Biblia kijtoua ke konemej moneki yolpakiskej porin inintatuan kuali kinixyekanaj (Proverbios 17:6).
Mokauaj maj kinixyekanakan. Telpochmej uan ichpochmej, kintakachiuaj inintatuan keman mokauaj maj kinixyekanakan. Colosenses 3:20 kiniluia: “Konemej, xikintakamatikan namotatuan itech nochi, porin nejon kiyolpaktia toTekotsin”. Keman Jesús katka telpoch nochipa kintakamatik itatuan (Lucas 2:51).
Maj kintakachiuakan inintatuan (Levítico 19:3; Hebreos 12:9). Miakpa ika tein tikijtouaj uan kemej tikinnankiliaj kinextia ox tikinpoujkaitaj. Xa kemansa tetatmej kinouijmakas kuali kinixyekanaskej ininkoneuan uan nejon ueliskia kichiuas maj amo kinpoujkaitakan. Maski ijkon, konemej uelis kinextiskej ke kinpoujkaitaj komo amo eliuis kinnankiliaj (Proverbios 30:17). Biblia kijtoua ke se ueyi tajtakol komo aksa amo kuali ininka tajtoua itatuan (Mateo 15:4).
Maj se kinyekpia. Keman okachi xiuejkejya tetatmej xa monekis maj kinyekpiakan, no kintakachiuaj keman kintemoliaj tein kikuaskej oso tein kinpoloua (1 Timoteo 5:4, 8). Achto ke Jesús momikiliskia kitemoj maj aksa kiyekpia imomaj (Juan 19:25-27).
Tein sekin kinemiliaj keman se kintakachiua tetatmej
Tein sekin kineltokaj: Konemej kintakachiuaj inintatuan keman yejuan kisentokaj kintakamatij hasta keman monamiktijkejya.
Tein melauj: Biblia kinextia ke namikuanij moneki kuali mouikaskej uan amo kinkauaskej maj ininchankauan mokalakikan itech ininnenamiktilis. Génesis 2:24 kijtoua: “takat kikauas itat uan inan, [uan sayoj] nemis iuan isiuatsin” (Mateo 19:4, 5). Sayoj ke, namikuanij uelis kiseliskej tayolmajxitilis tein kinmakaj inintatuan uan ininmontatuan (Proverbios 23:22). Namikuanij yejuan kiixtaliaj hasta kani mokalakiskej ininchankauan (Mateo 19:6).
Tein sekin kineltokaj: Tetatmej sayoj yejuan akin kipiaj tanauatil.
Tein melauj: Tein melauj, Dios kimakak tanauatil tepopaj para maj kinixyekana ichankauan, sayoj ke itanauatil amo semi ueyi kemej itanauatil Dios. Keman sekin akin kipiayaj se ueyi tanauatil kiniluijkej itatojtokakauan Jesús maj amo kitakamatikan Dios,yejuan tanankilijkej: “Dios yejua taixyekankej akin moneki tiktakamatiskej uan amo tein oksekin technauatiaj maj tikchiuakan” (Hechos 5:27-29). No ijkon, konemej moneki kintakamatiskej inintatuan “kemej toTekotsin kineki”, nejin kijtosneki, kintakamatiskej itech tein amo kitapanauilia itanauatiluan Dios (Efesios 6:1).
Tein sekin kineltokaj: Konemej kintakachiuaj inintatuan keman yejuan kisentokaj itech inintaneltokalis.
Tein melauj: Biblia tayolmajxitia maj kitemokan ox tein kinmachtijkej itech inintaneltokalis yejua tein melauj (Hechos 17:11; 1 Juan 4:1). Akin kitemoua tein melauj xa peuas momachtis itech okse taneltokalis. Biblia ininka tajtoua miakej akin kitekitilijkej Dios kemej Abrahán,Rut uan tatitanil Pablo, yejuan amo kineltokayaj tein inintatuan kineltokayaj, (Josué 24:2, 14, 15; Rut 1:15, 16; Gálatas 1:14-16, 22-24).
Tein sekin kineltokaj: Uelis tikintakachiuaskej totatuan komo tikchiuaj kemej yejuan keman tikinelnamikij uan tikinueyichiuaj akin momikilijkejya.
Tein melauj: Biblia kijtoua: “Xikueyichiua moDios Jehová, uan sayoj yejua xiktekitili” (Lucas 4:8). Dios amo kiyolpaktia maj tikinueyichiuakan akin momikilijkejya. Uan no, Biblia tamachtia ke akin momikilijkejya “amo teyi kimatijok”. Yejua ika, yejuan amo kimatij ox tikinueyichiujtokej oso amo. Uan amo no ueli techpaleuiaj nion techijtakouaj (Eclesiastés 9:5, 10; Isaías 8:19).