¿Keyej kitokaytiaj Jesús iKoneuj Dios?

Tein Biblia kijtoua

Itech Biblia miakpa ixnesi ke Jesús yejua “iKoneuj Dios” (Juan 1:49). Tajtol “iKoneuj Dios” teajsikamatiltia ke Dios yejua akin techchijchiuak uan akin techmakatok tonemilis. Nejin kijtosneki ke Dios no kichijchiuak Jesús (Salmo 36:9; Apocalipsis 4:11). Biblia amo kijtoua ke Dios tePopaj porin kinpia ikoneuan ijkon kemej tetatmej kinpiaj ininkoneuan nikan taltikpak.

Biblia no kijtoua ke ángeles “ikoneuan Dios akin melauak” (Job 1:6). No ijkon, techmachtia ke Adán, yekinika takat katka “ikoneuj Dios” (Lucas 3:38). Sayoj ke Biblia kinextia ke Jesús yejua iKoneuj tein okachi tayekantok porin yejua akin yekinika kichijchiuak uan amo akin kipaleuij.

• ¿Nemik Jesús iluikak achto ke ualaskia nikan taltikpak?

• ¿Toni tekit kichiuaya Jesús achto ke ualaskia nikan taltikpak?

¿Nemik Jesús iluikak achto ke ualaskia nikan taltikpak?

Kemaj. Achto ke ualaskia Jesús nikan taltikpak, nemia iluikak kemej se ángel. Yejua kijtoj “ke ualpantemok de ne iluikak” (Juan 6:38; 8:23).

Dios yekinika kichijchiuak Jesús. Biblia kijtoua de Jesús nejin:

• “Yejua tayekankakonet de nochi tein Dios kichijchiuak” (Colosenses 1:15).

• Yejua, “akin Dios achto kichijchiuak” (Apocalipsis 3:14).

Yejua Jesús akin moijtouaya itech Biblia ke nemia tel uejkaujya (Miqueas 5:2; Mateo 2:4-6).

¿Toni tekit kichiuaya Jesús achto ke ualaskia nikan taltikpak?

Kipiaya se ueyi tekit ompa iluikak. Ijkon Jesús kiteajsikamatiltij keman kiluij Dios: “NoTajtsin xinechueyitali mouan ijkon kemej nietoya achto ke nemiskiaj akin nemij nikan taltikpak” (Juan 17:5).

Kipaleuij iPopaj maj kichijchiuani nochi taman tein onkak. Jesús tekitik iuan Dios “kemej se tekitikej tein ixmach” (Proverbios 8:30). Keman Biblia ika tajtoua Jesús, kijtoua: “Porin itechkopa, Dios kichijchiuak nochi okseki taman ne iluikak uan nikan taltikpak” (Colosenses 1:16).

Itechkopa Jesús, Dios kichijchiuak nochi taman kemej ángeles uan nochi tein onkak iluikak uan nikan taltikpak (Apocalipsis 5:11). Uelis tikijtoskej ke Dios uan Jesús sentekitikej. Kemej se akin kiixyekana tekit uan se tapaleuijkej. Akin kiixyekana tekit kijtoua keniuj mochiuas uan tapaleuijkej yejua akin kichiua tekit.

Katka Tajtoltsin. Keman ika motajtoua Jesús achto ke ualaskia nikan taltikpak, Biblia kitokaytia “Tajtoltsin” (Juan 1:1). Nejin kijtosneki ke Dios kititania iKonetsin maj kitemakati tanauatilmej tein kinekia kinmatiltis akin nemiaj ompa iluikak.

Nesi ke itenkopa Jesús, Dios kinnojnotsak akin moajsiaj nikan taltikpak. Xa Jehová tajtoj itenkopa Tajtoltsin oso Jesús, keman kinmakak tanauatilmej Adán uan Eva ompa Edén (Génesis 2:16, 17). Xa yejua Jesús katka ángel akin kinixyekanak israelitas keman panokej taluakyan uan yejua akin monekia kitakamatiskej (Éxodo 23:20-23).a