Kalmej tein kiueyitaliaj toUeyi Tamachtijkauj

Kemej Jehová kipaktia kinmachtis itekitikauan, inechikol kitemaka tataman tamachtilis tein kinpaleuis tokniuan maj uelikan kichiuakan tekit tein kinmaka. Semej yejua Tamachtilis para akin kiteixmatiltiaj iTaixyekanalis Dios. Yankuixtok, inechikol Jehová amo sayoj kiitani keniuj okachi kuali kinmachtiskej, ta no maj moajsi kalmej kampa okachi kuali uelis momachtiskej. Kitemouaj maj kipia nochi tein monekis tein kinpaleuis momachtianij uan tamachtianij. ¿Keniuj ika tomin tein kitemakaj mochiua nochi nejon?

Okachi miakej kinmachtiaj kampa kuali tachijchiujtok

Itech miak xiujmej tokniuan kiseliayaj tataman tamachtilis itech Kali kampa tiMosentiliaj oso Kali kampa mochiua Uejueyi Nechikolmej. Sayoj ke yankuixtok kinchijchiuanij oso kinyektalianij kalmej tein kikuij sayoj para momachtiskej. ¿Keyej? Maj tikitakan eyi taman keyej.

Okachi monekij tapaleuianij. Tokniuj Christopher Mavor, semej akin kinpaleuia Tokniuan akin kiixyekanaj tanojnotsalis den Oloch Taojtokaltianij, kijtoj: “Akin tekitij itech sucursales techmatiltianij ke moneki okachi tokniuan akin tanojnotsaskej. Itech xiuit 2019 sucursal de Brasil kiixejekoj ke moneki kemej 7,600 tokniuan akin kiselitoj Tamachtilis para akin kiteixmatiltiaj iTaixyekanalis Dios akin tapaleuiskej kampa sucursal kiixyekana tekit”. Sucursal de Estados Unidos kiitani ke moneki maj tapaleuikan miakej precursores akin kimatij kinmachtiskej okseki tokniuan keniuj tanojnotsaskej kampa miakej panouaj, kampa ajsij barcos uan itech cárceles. No moneki tokniuan akin tapaleuiskej Kampa Moixtalia uan Moixyekana Kalchiualis uan Tayekananij akin Tetajtouiaj itech Tapajtiloyamej. Uan akin kiseliaj Tamachtilis para akin kiteixmatiltiaj iTaixyekanalis Dios semi tapaleuiaj maj mochiua nejon tekit.

Okachi tajtanij kiseliskej tamachtilis. Itech miak sucursales ajsij tel miak solicitudes uan amo ueliok nochin kinyoleuaj maj kiselitij tamachtilis. Ompa sucursal de Brasil kiselijkej kemej 2,500 solicitudes itech sayoj se xiuit. Kemej amo akiaj nochin para kinmachtiskej, sayoj uelik kinmachtijkej 950 tokniuan.

Okachi moajsi kampa mokauaskej. Keman tokniuan kinmachtiaj itech se Kali kampa tiMosentiliaj oso Kali kampa mochiua Uejueyi Nechikolmej, kitemouaj maj mokauakan ininchan tokniuan. Uan kuali yetok ijkon kampa sayoj se taman tamachtilis motemaka itech se xiuit. Sayoj ke kampa tataman tamachtilis motemaka, xa tokniuan amo ueli kinkalotiaj momachtianij miak metsti itech se xiuit. Yejua ika moixtalij maj yeto kalmej kampa mokauaskej tokniuan tein amo uejka yetokej de kampa momachtiskej uan chijchiujtokej kemej uelis kuali momachtiskej ompa.

Moneki millones de dólares para mochijchiuas kali kampa momachtiskej uan no kampa mokauaskej uan kipiaskej tein kinpolos tamachtianij uan kemej 30 momachtianij, okachiok komo kampa tachijchiuatij semi tapatiyoj oso moneki okseki taman.

Kani yetokej kalmej uan keniuj chijchiujtokej

Kitemouaj maj tokniuan kinmachtikan tatenoj den altepet kampa taseujtos sayoj ke maj panokan teposmej tein kinuikas kampa moneki yaskej. No kitemouaj kampa moajsij miakej tokniuan akin uelis kinpaleuiskej maj kipiakan tein moneki akin momachtitij uan akin uelis kiyektaliskej kalmej uan okseki taman.

Nejin kalmej kipia seki taman kemej bibliotecas, kampa momachtiskej, computadoras uan impresoras. No kipia kampa sentakuaj momachtianij uan tamachtianij. No kipia kampa kichiuaskej ejercicio uan kampa moixpetaniskej.

Okachi moneki maj yeto kali kampa kiseliskej tamachtilis. Troy, se tokniuj akin tekiti Kampa Moixtalia uan Moixyekana Kalchiualis noyampa taltikpak ompa Warwick (Nueva York), kimelaua: “Tikintajtanijkej akin tekitij Kampa kiitaj tataman tamachtilis tein motemaka maj techpaleuikan maj tikixtalikan keniuj moneki chijchiujtos kali para kuali momachtiskej. Techiluijkej keniuj maj ueyi, toni moneki kipias, tanex tein moneki kipias ijkon kemej teposmej para audio uan video”. Zoltán, se tokniuj akin kinmachtia akin kiteixmatiltiaj iTaixyekanalis Dios ompa Hungría, kijtoj: “Keman amo tikpiayaj micrófonos, tikiniluiayaj momachtianij maj tajtouanij chikauak. Sayoj ke axkan kipiaya se micrófono sejse escritorio, yejua ika amo monekiok maj tajtokan chikauak”.

“Jehová techyoleuak”

¿Keniuj kinpaleuiani momachtianij uan tamachtianij nejin taman tein yankuik? Angela, akin kiselij Tamachtilis para akin kiteixmatiltiaj iTaixyekanalis Dios ompa Palm Coast (Florida, Estados Unidos), kijtoua: “Semi taseujtok kampa techmachtiaj. Kuali kinemilijkej keniuj kichijchiuaskej kali kampa techmachtiaj uan kampa timokalotiaj. Ijkon kuali timomachtiaj uan kuali tikakij tein techmachtiaj”. Tokniuj Csaba, akin kitemaka tataman tamachtilis ompa Hungría, kiuelita takuas iniuan momachtianij. Yejua kijtoua keyej: “Tokniuan okachi kijtouaj tein kipanouanij. Uan ijkon okachi ueli tikinixmatij uan ueli tikinmachtiaj kemej okachi kinpaleuis”.

Momachtianij uan tamachtianij kiitaj ke inechikol Dios kitemouani maj okachi kuali moajsi kalmej kampa momachtiskej uan nejon se itatiochiualis “toUeyi Tamachtijkauj”, Jehová (Isaías 30:20, 21). Ompa Filipinas kiyektalijkej se kali kemej kampa uelis kiseliskej tamachtilis. Uan se tokniuj siuat akin ompa kiselij Tamachtilis para akin kiteixmatiltiaj iTaixyekanalis Dios kijtoua: “Kemej tachijchiujtok kichiuak maj tikmachilikan ke amo sayoj katka timomachtianij, ta ke Jehová techyoleuak. Yejuatsin kineki maj yekmelauj techpakti timomachtiskej”.

Ika tomin tein nankitemakaj, ueli mochijchiuaj, moyektaliaj uan moyankuiliaj kalmej kampa kinmachtiaj tokniuan. Uan nejon tomin no ueli motemaka itech donate.jw.org. ¡Semi tiktasojkamatij ijkon xitapaleuikan!