¿Toni kinolinia oksekin maj kichiuakan keman techitaj?
1. ¿Toni kinoliniaya maj kichiuakan imomachtijkauan Jesús keman kiitayaj yejua?
1 Jesús kijtoj: “Ximomachtikan de nejua” (Mat. 11:29). Moyekita ke amo sayoj kijtouaya, ta kichiuaya tein tamachtiaya. Maj timonemilikan toni kinoliniaya imomachtijkauan maj kichiuakan keman kiitayaj Jesús. Itajtoluan katka yemankej, katka kualtakat uan tetasojtakej (Mat. 8:1-3; Mar. 6:30-34). Katka yolyemanik (Juan 13:2-5). Keman iuan yayaj itech tanojnotsalis, kiitayaj ke katka se tel tekitikej tein kuali kitenextiliaya iTajtol Dios (Luc. 8:1; 21:37, 38). ¿Toni kinolinia oksekin maj kichiuakan keman techitaj itech tanojnotsalis?
2. ¿Keniuj kinpaleuia taltikpakneminij tokuali neketsalis, kuali tajtolmej tein tikuij uan netasojtalis tein tiknextiaj?
2 Itech tanojnotsalis. Akin tikinnojnotsaj uelis kintelpaleuis tokuali neketsalis, kuali tajtolmej tein tikuij uan netasojtalis tein tiknextiaj (2 Cor. 6:3; Fili. 1:27). No kiitaj ke nochipa tikuij Biblia, uan kiuelitaj maj kuali tikinkakikan keman tajtouaj. Maj tikelnamikikan ke kuali neskayot tein tikauaj itech nejon, kintelpaleuia akin techkakij maj kuali kiselikan iTajtol Dios.
3. Tein tikchiuaj itech tanojnotsalis, ¿keniuj uelis kintelpaleuis oksekin tokniuan?
3 Tokniuan. Maj tiknemilikan keniuj kintelpaleuia tokniuan kuali neskayot tein tikauaj. Keman titanojnotsaj ika ueyi tanejnekilis, oksekin no ijkon kichiuaskej. Kemej se tepos ueli motentia ika okse tepos, no ijkon komo kuali timomachtiaj tein ika titajtotij itech tanojnotsalis, kinpaleuis oksekin maj okachi uelikan tanojnotsakan (Pro. 27:17). Komo tikijkuilouaj nochi tein kipanotok akin kineki kimatis okachi uan oksepa niman tikalpanouaj, oksekin kinolinis maj no ijkon kichiuakan. Keman tikchiuaj itekiyo Dios kemej moneki, kintelpaleuia oksekin tokniuan (2 Tim. 4:5).
4. ¿Keyej moneki tikitaskej toni neskayot tikinkauiliaj oksekin?
4 Ika tein tikitakej achto, ¿melauj ke moneki tikitaskej toni neskayot tikinkauiliaj oksekin? Kuali neskayot tein tikauaj, kiyolpaktis Jiova uan uelis tikijtoskej kemej tatitanil Pablo: “Xichipaujkanentinemikan ijkon kemej nejua [...]. Porin nejua nichipaujkanemi ijkon kemej Totekotsin Cristo” (1 Cor. 11:1).