Se nepaleuil tein kipiaj kalyetouanij

1. ¿Keniuj neseuilis itech sábado kinpaleuiaya kalyetouanij israelitas?

¹ Jiova kinextij netasojtalis keman tanauatij maj moseuikan itech tonal sábado, uan nejon kintelpaleuij kalyetouanij israelitas. Yejuan kikauayaj imin tekiuj uan ueliaj tanemiliayaj itech nochi taman tein kuali tein Jiova kinmakatoya uan no itech imin yekuikalis iuan yejuatsin. Tetatmej ueliaj kinnextiliayaj Tanauatil imin koneuan uan ijkon yejuan ueliskiaj kiuikaskiaj itech imin yolo (Deu. 6:6, 7). Tonal sábado tapaleuij maj itekitikauan Jiova kipianij se tonal nochi semanas keman kiueyichiuaskiaj yejuatsin.

2. ¿Toni kinextij Jiova ijkuak tanauatij maj moseuikan sábado?

² Kemej tikmatij, axkan Jiova amo kintajtaniaok kalyetouanij maj moseuikan itech tonal sábado. Sayoj ke nejon tanauatil techmachtia se taman tein kinextia Dios. Yejua nochipa kitelneki maj itekitikauan kipiakan se yekuikalis iuan yejuatsin tein kinpaleuis maj kuali yetokan (Isa. 48:17, 18). Axkan tonalmej, ¿keniuj kinextia ke kitelneki maj tikpiakan nejon yekuikalis? Se taman, ika Youak keman tiTaueyichiuaj kemej Kalyetouanij.

3. ¿Keyej moixtalij maj tikpiakan Youak keman tiTaueyichiuaj kemej Kalyetouanij?

³ ¿Keyej moixtalij Youak keman tiTaueyichiuaj kemej Kalyetouanij? Itech enero 2009, Nemachtil ika Amaix imiuan tein Monechikouaj, peuak mochiua itech tonal keman tikpiaj Escuela tein Techmachtia iTekiyo Dios uan Nechikol tein Techmachtia iTekiyo Dios. ¿Keyej ijkon mochiuak? Se taman porin ijkon kalyetouanij ueliskiaj kipiaskiaj itech sejse semana Youak keman Taueyichiuaj kemej Kalyetouanij, uan kichikauaskiaj imin yekuikalis iuan Dios. Nochin kalyetouanij kinyoleujkej, komo ueli, maj imin nemachtil kemej kalyetouanij kipanoltikan itech youak keman achto yayaj itech nemachtil ika amaix, uan ijkon moseujkamachtiskiaj Biblia uan okseki tamachtilis tein kinpaleuis kalyetouanij.

4. ¿Moneki uejkauas sayoj se hora nemachtil? Xikonmelaua.

⁴ Achto ke tiyaskiaj itech Nemachtil ika Amaix imiuan tein Monechikouaj, monekia tikchiuaskej seki taman kemej tikpataskej totaken, tiyaskej, uan okseki taman tein techuikiliaya tiempo. Timiakej amo sayoj techuikiliaya se hora keman tiyayaj itech nejon nechikol. Axkan ke mosentilij nejon nechikolmej, tikpiaj se youak keman uelis tikueyichiuaskej Jiova kemej kalyetouanij. Yejika moneki maj amo sayoj se hora tiuejkauakan, ta moneki tiknemiliskej tein kinpoloua tochankauan uan kanachi tiempo uelis momachtiskej uan ijkon tikixtaliskej tiempo tein monekis tikuiskej.

5. ¿Moneki mosenmachtiskej itech nochi tiempo tein kiixtaliaj taueyichiuaskej? Xikonmelaua.

⁵ ¿Moneki mosenmachtiskej itech nochi tiempo tein kiixtaliaj? Keman namikuanij uan kalyetouanij tein kipiaj konemej kisenitaj tataman tamachtilis ika Biblia, moyolchikauaj se iuan okse (Rom. 1:12). Kalyetouanij okachi kualtsin mouikaj. Yejika, tel tayekantok maj kisenitakan tataman tamachtilis itech Youak keman Taueyichiuaj kemej Kalyetouanij. Sayoj ke sejse tein pouij itech kalyetouanij no uelis momachtiskej tepitsin imin sejselti. Se neskayot, satepan ke mosenmachtiskej, kalyetouanij uelis senyetoskej uan kisentokaskej momachtiskej imin sejselti, xa motamimachtiskej tein moitas itech nechikolmej oso kiixtajtoltiskej revistas. Sekin kalyetouanij kinemiliaj senkis amo kixotaltiskej televisión nejon youak.

6. ¿Keniuj uelis motemakas nemachtil?

⁶ ¿Keniuj moneki motemakas nemachtil? Amo nochipa moneki mochiuas ika netajtanilmej uan tanankililmej. Sekin kalyetouanij momachtiaj kemej tikchiuaj itajkotian semana itech nechikol, uan ijkon kinpaleuia maj kiuelitakan yetokan itech Youak keman Taueyichiuaj kemej Kalyetouanij. Kixejxelouaj se tamachtilis uan tataman kipanoltiaj. Se neskayot, kisenixtajtoltiaj Biblia, momachtiaj seki tamachtilis tein moitas itech nechikolmej uan momamachtiaj keniuj tanojnotsaskej. Itech página 6 motemaka seki tayolmajxitilis.

7. ¿Keniuj kichiuaskej tetatmej maj nochin kuali momachilikan?

⁷ ¿Keniuj kichiuaskej tetatmej maj nochin kuali momachilikan? Konemej okachi kuali momachtiaj komo monextia netasojtalis uan mochiua nemachtil kampa kualtsin yetoskej. Uelis kemansa namomachtiskej kalampa komo takistok. No uelis tepitsin namoseuiskej keman monekis. Sekin kalyetouanij kitaliaj teisa tein kikuaskej oso tayiskej keman tamis imin nemachtil. Tetatmej moneki mopiaskej maj amo kinajuakan niono maj kinmelauakan imin koneuan itech Youak keman Taueyichiuaj kemej Kalyetouanij, maski xa monekis kikuiskej tepitsin tiempo uan ijkon kimelauaskej se amo kuali tachiualis oso kuejmol tein kiitaj ke kipiaj imin chankauan. Sayoj ke komo kiitatij se kuejmol tein tetekipachoj, xa okachi kuali maj kiitakan iuan konet iselti itech okse tonal uan ijkon amo mopinaujmatis imin ixpan iikniuan. Itech Youak keman tiTaueyichiuaj kemej Kalyetouanij maj amo momachili ke niono uelis timooliniskej oso maj tikmachilikan ke tel uejkaua, ta moneki nesis ke tiyolpakij kemej Dios akin tikueyichiuaj (1 Tim. 1:11).

8, 9. ¿Toni monekis achto momachtiskej tetatmej?

⁸ ¿Keniuj tepopaj uelis momachtis tein moitas? Kalyetouanij kintelpaleuis komo tepopaj achto momachtia tein moitas itech Youak keman Taueyichiuaj kemej Kalyetouanij uan kijtoua keniuj mopanoltis kemej okachi kinpaleuis (Pro. 21:5). Semi kuali komo tetakauj kitajtania inamik toni uelis moitas (Pro. 15:22). Uan no, ¿keyej amo kemansa nankintajtaniaj namokoneuan toni kiuelitaskiaj kiitaskej? Komo ijkon nankichiuaj, namechpaleuis xikmatikan toni kinekij momachtiskej uan toni kintekipachoua.

⁹ Itech miak semanas, tepopaj amo moneki miak tiempo momachtijtos tein kiitaskej. Xa kalyetouanij kiuelitaskej maj amo mopata seki taman tein kiixtalijkej kiitaskej, ijkon tepopaj amo monekis kipatas nochi programa itech sejse semana. Yejua xa kiitas ke kitelpaleuia maj momachti tein kiitaskej okse semana komo kichiua satepan ke tamis imin nemachtil, ta kipiasok itech itanemilil tein kinpoloua ichankauan itech taueyichiualis. Sekin tetatmej kijkuilouaj ika ome eyi tajtolmej itech amat tein momachtiskej uan kitaliaj kampa nochin uelis kiitaskej, kemej itech refrigerador. Nejon kinpaleuia maj kichiakan ika miak pakilis nejon tonal, kinmatiltia tein kiitaskej, uan no uelis achto momachtiskej komo moneki.

10. ¿Toni uelis kichiuaskej itech Youak keman Taueyichiuaj kemej Kalyetouanij akin moajsij imin selti?

¹⁰ Komo aksa moajsi iselti. Akin moajsij imin selti uelis momachtiskej yejuansaj itech Youak keman Taueyichiuaj kemej Kalyetouanij. Itech inemachtil tein kipias no moneki kiixtajtoltis Biblia, momachtis tein moitas itech nechikolmej uan kiixtajtoltis La Atalaya uan ¡Despertad! Sekin tanojnotsanij no kinemiliaj kitemoskej itech amaixmej se tema tein kiixtaliaj. Kemansa, uelis kiyoleuaskej okse tanojnotskej oso kalyetouanij uan ijkon uelis kisenitaskej se tamachtilis ika Biblia tein kinpaleuis.

11, 12. ¿Toni seki taman tein kuali tikseliaj keman nochipa tikpiaj Youak keman tiTaueyichiuaj kemej Kalyetouanij?

¹¹ ¿Toni tein kuali tikseliaj keman nochipa tikpiaj Youak keman tiTaueyichiuaj kemej Kalyetouanij? Akin ika nochi imin yolo kiueyichiuaj Jiova kemej kiyolpaktia, okachi motokiaj iuan yejuatsin. Uan no, kalyetouanij akin sentaueyichiuaj okachi kuali mouikaj. Se takat uan siuat namikuanij kijkuilojkej tatiochiualismej tein kiseliaj: “Kemej tinamikuanij tein amo tikpiaj konemej uan titekitij kemej precursores, tikchiaj ika miak pakilis Youak keman tiTaueyichiuaj kemej Kalyetouanij. Tikmachiliaj ke okachi kuali timouikaj tejuan uan no iuan toTajtsin tein nemi iluikak. Axkan keman timeuaj itech tonal keman tikixtalijtokej timosenmachtiskej timoiluiaj: ‘¿Tikmati toni tikpiatij nejin tonal? ¡Youak keman tiTaueyichiuaj kemej Kalyetouanij!’”.

¹² Tikixtaliskej tonal keman titaueyichiuaskej kemej kalyetouanij no kinpaleuia akin kipiaj miak tekit. Se temomaj akin iselti kiniskaltijtok ome okichpipil uan tekiti kemej precursora regular kijkuiloj: “Achto semi amo timomachtiayaj kemej kalyetouanij. Sayoj kemansa tikchiuayaj porin nitelsioujtoya. Noselti amo nikmatia kemanian nikchiuas nejon. Yejika namechtajkuilouilia porin nikneki nikteltasojkamatis Youak keman tiTaueyichiuaj kemej Kalyetouanij. Ueliya nochipa tikpiaj tonemachtil kemej kalyetouanij uan tikselijtokej miak taman tein kuali”.

13. ¿Keniuj monextis nepaleuil tein techualkuilia youak keman titaueyichiuaj?

¹³ Ijkon kemej katka tonal sábado, Youak keman tiTaueyichiuaj kemej Kalyetouanij se netetayokolil tein kitemaka Jiova uan semi kinpaleuia kalyetouanij (Sant. 1:17). Ijkon kemej kalyetouanij israelitas kikuiaj sábado no ijkon kinpaleuiaya maj kichikauakan imin yekuikalis iuan Jiova. Uan axkan, kemej tikuiskej Youak keman tiTaueyichiuaj kemej Kalyetouanij, no ijkon techualkuilis tein kuali (2 Cor. 9:6; Gál. 6:7, 8; Col. 3:23, 24). Komo kuali tikuij nejin youak, tochankauan no uelis kijtoskej kemej salmista: “Nejua nikita ke tel kuali maj nimotoki iuan Dios. Itech toTajtsin Jiova akin okachi Ueyi Taixyekankej nikpia nonepaleuil” (Sal. 73:28).

[Tajtolmej itech página 5]

Itech Youak keman tiTaueyichiuaj kemej Kalyetouanij maj amo momachili ke niono uelis timooliniskej oso maj tikmachilikan ke tel uejkaua, ta moneki nesis ke tiyolpakij kemej Dios akin tikueyichiuaj

[Tajtolmej itech página 6]

XIKONTEKITILTI

Tein uelis tikchiuaskej itech Youak keman tiTaueyichiuaj kemej Kalyetouanij

Biblia:

• Maj tiksenixtajtoltikan Biblia tein moneki tikitaskej itech sejse semana. Komo tein tikixtajtoltitij kinamiki, se maj kiixtajtolti tein kijtoj tetapouijkej, uan oksekin uelis kiixtajtoltiskej tein kijtojkej tataman taltikpakneminij.

• Maj timochiuakan kemej taltikpakneminij tein ixnesij itech Biblia tein moixtajtoltijtok.

• Maj achto tikixtajtoltikan tosejselti capítulos tein ixyetok moitas uan maj tikixtikan se oso ome netajtanilmej. Satepan maj tiksentemokan tanankililmej.

• Itech sejse semana maj tikijkuilokan itech se tarjeta se versículo tein kiualkui Biblia, maj tikijtokan itech totanemilil kemej ijkuiliujtok uan maj tikmelauakan. Maj tiksentilikan miak tarjetas, uan itech sejse semana maj tikitakan kanachi textos ueli tikelnamikij.

• Maj tiktalikan grabación ika Biblia uan maj tiktojtokatiyakan itech toBiblia.

Nechikolmej:

• Maj timosenmachtikan seki tamachtilis tein moitas itech nechikolmej.

• Maj timomachtikan nekuikatilmej tein moitas okse semana.

• Komo semej tikpiatij se tamachtilis itech Escuela tein Techmachtia iTekiyo Dios oso se demostración itech Nechikol tein Techmachtia iTekiyo Dios, maj tikitakan keniuj uelis mopanoltis oso maj timomamachtikan imin ixpan kalyetouanij.

Tein kinpoloua kalyetouanij:

• Maj no tikitakan tamachtilis tein kiualkui amaixmej Los jóvenes preguntan oso Aprendamos del Gran Maestro.

• Maj no timomachtikan uan maj tiknextikan keniuj konemej uelis kiixnamikiskej se ouijkayot tein uelis kipiaskej itech escuela.

• Maj tikpiakan se nemachtil kampa tetatmej mochiuaj kemej konemej uan konemej kemej tetatmej. Konemej kitemouaj se tamachtilis uan ika kinpaleuiaj imin tatuan.

Tanojnotsalis:

• Maj timomachtikan uan maj tiknextikan toni ika peuas titajtoskej itech tanojnotsalis itamian semana.

• Maj tikixtalikan tekimej tein kemaj uelis tikchiuaskej kemej kalyetouanij tein techpaleuis maj okachi titanojnotsakan itech tonalmej keman moelnamiki imikilis Jesús oso itech vacaciones.

• Itech ome eyi minuto, tisejsemej maj tiktemokan itanankililuan tataman netajtanilmej tein uelis kichiuaskej itech tanojnotsalis, uan maj monexti keniuj tikchiuaskej.

Okseki tayolmajxitilis:

• Maj tiksenixtajtoltikan se tamachtilis tein kiualkui yankuik revistas.

• Tisejsemej maj achto tikixtajtoltikan se tamachtilis tein semi tikuelitaskej itech nejon yankuik revistas uan maj tikijtokan tanemilil.

• Kemansa maj tikyoleuakan se tanojnotskej oso namikuanij maj yeto touan keman titaueyichiuaj kemej kalyetouanij uan xa uelis tikinchiuiliskej netajtanilmej.

• Maj tikitakan se video tein tikseliaj itech nechikol uan maj ika titajtokan.

• Maj tiksenitakan tamachtilis “Los jóvenes preguntan” oso “Actividades para la familia” tein kiualkui amaix ¡Despertad!

• Maj tiksenitakan tamachtilis “De padres a hijos” oso “El rincón del joven” tein kiualkui amaix La Atalaya.

• Maj tikixtajtoltikan uan maj ika titajtokan se taxelol tein kiualkui yankuik Anuario, oso yankuik amaix tein kisak itech ueyi nechikol tein uejkaua eyi tonal tein yankuixtok tikpiakej.

• Satepan ke tiyaskej itech se ueyi nechikol, maj ika titajtokan tein okachi techpaleuis.

• Maj tikitakan teisa tein Jiova kichijchiuak uan maj ika titajtokan keniuj techpaleuia nejon maj tikixmatikan Jiova.

• Maj tiksenchiuakan se tekit kemej se maqueta, se mapa oso se tekit itech se amat.