Tanojnots 92
Jesús kinajokuik mikemej
ICHPOCH tein tikita nikan kipia 12 xiujmej. Jesús kimakitskijtok, imomaj uan ipopaj ompa yetokej. ¿Tikmati keyej tel yolpaktokej? Tikitatij.
Ipopaj nejin ichpoch katka se takat tayekankej tein motokaytij Jairo. Se tonal iichpoch kokolispeuak, uan kitekkej tepech. Sayoj ika, amo pajtik, ta okachi ueyipeuak. Jairo uan inamik moteltekipachojtoyaj, ta moitaya ika ichpoch yaya momikiliti. Uan ipa setsin katka. Yejika Jairo kitemoto Jesús. Yej kikakka mouiskatekimej tein kichiuaya Jesús.
Keman Jairo kiajsik Jesús, tel miakej taltikpakneminij kiyoualojtoyaj. Sayoj ika Jairo tatajko panok uan motankuaketsak iixpan Jesús. Kiiluij: ‘Noichpoch motelkokoua’. Ompa, kitataujtij: ‘Tiouij ika kualtakayot uan xikpajtiti’. Jesús kijtoj ika yaskia.
Keman nejnemiaj, nochin kinekiaj kinetechoskej Jesús, yejika motojtopeuayaj. Ompa sepasaj Jesús motsakuilij uan tajtanik: ‘¿Akoni nechmatokak?’ Jesús kimachilij ika kisak ichikaualis uan yejika kimatik ika aksa kimatokak. ¿Akoni katka? Se siuat tein kiuikaya 12 xiujmej ika se kokolis. ¡Motokij uan kimatokak itaken Jesús uan pajtik!
Nejin kichiuak maj Jairo momachiliani kuali, porin kiitak ika Jesús amo ouij kipajtiaya aksa. Sayoj ika se tanauatijkej ajsik uan kiiluij Jairo: ‘Amo xikuejmolook Jesús. Moichpoch momikilijya’. Jesús kikakik nejon uan kiiluij Jairo: ‘Amo ximotekipacho, moichpoch kuali yetos’.
Keman ajsikej ichan Jairo, taltikpakneminij tel chokatoyaj. Sayoj ika Jesús kijtoj: ‘Amo xichokakan. Ichpoch amo momikilij. Ta sayoj kochtok’. Sayoj ika yejuan kiueuetskilijkej uan kikejkelojkej Jesús, ta kimatiaj ika ichpoch momikilijkaya.
Ompa, Jesús kalakik kampa yetoya ichpoch iuan tepopaj uan temomaj uan eyi tatitanilmej. Kimakitskij uan kiiluij: ‘¡Ximeua!’ Uan ichpoch oksepa nemik, kemej nikan tikita. ¡Meuak uan nejnemik! Yejika ipopaj uan imomaj tel yolpakkej.
Nejin amo yejua yekinika miket tein Jesús kiajokuik. Ta yekinika kiajokuik ikoneuj se siuat tein amo nemiaok inamik tein kayot katka Naín. Satepan, Jesús no kiajokuik Lázaro, imin ikniuj María uan Marta. Keman Jesús tekiuajtis kemej tekiuaj tein Dios kixtalij, kinajokuis tel miakej mikemej. ¿Melauj ika techyolpaktia nejin?
Lucas 8:40-56; 7:11-17; Juan 11:17-44.