Tanojnots 96

Jesús kinpajtij kokoyanij

KEMAN Jesús panotiaya itech altepemej, kinpajtiaya kokoyanij. Nejin mouiskatekimej momatik itech altepemej tein achka moajsiaj. Yejika, taltikpakneminij kiniuikayaj tein sepoujtikej, ixpopoyomej, koxojmej uan oksekin kokoyanij. Uan Jesús nochin kinpajtiaya.

Panokaya eyi xiuit ijkuak Juan kiauijka Jesús. Uan Jesús kiniluij itatitaniluan ika amo uejkaua yaskia Jerusalén, kampa kimiktiskiaj, uan satepan moajokuiskia tatajko mikemej. Sayoj ika, Jesús kisentokaya kinpajtiaya kokoyanij.

Se tonal Jesús tamachtijtoya itech sábado. Sábado katka se tonal keman moseuiayaj judíos. Siuat tein tikita nikan, tomotsnemia 18 xiujmej, uan amo uelia momelauaya. Yejika, Jesús kipamatokak, uan yej momelauak. ¡Siuat pajtik!

Nejin kichiuak maj kualaninij tayekananij itech taneltokalis. Semej kintsajtsilij taltikpakneminij: ‘Moajsi chikuasen tonal kampa ueli se tekiti. ¡Nejon tonalmej ximopajtikij, uan amo itech sábado!’

Sayoj ika Jesús tanankilij: ‘¡Amo nayolkualmej! Nikmati ika nanochin nankitomaskiaj namoasno uan nankiuikaskiaj maj atiti itech sábado. Yejika, ¿amo monekia pajtis nejin siuatsin, tein mokokouaya 18 xiujmej?’ Nejin tanankilil kinpinaujtij nejon takamej amo yolkualmej.

Satepan, Jesús uan itatitaniluan kisentokakej ojti tein yaya Jerusalén. Keman kiskej Jericó uan ayamo uejka moajsiaj, ome ixpopoyomej kijtojkej chikauak: ‘Jesús, xitechpaleui’.

Jesús kintajtanij ixpopoyomej: ‘¿Toni nankinekij maj namechchiuili?’ Yejuan kijtojkej: ‘ToTekotsin, xitechtachialti’. Jesús kinixtololojmatokak, ¡uan niman uelik tachiakej! ¿Tikmati keyej kichiuak Jesús nochi nejin mouiskatekimej? Porin kintasojtaya taltikpakneminij uan kinekia maj takuaujtamatinij itech. Nejin technextilia ika keman yej tekiuajtis ipan Taltikpak amo akin kokolispeuas.

Mateo 15:30, 31; Lucas 13:10-17; Mateo 20:29-34.