¿Uelis tiontanojnotsas itech tonal domingo?
1. ¿Toni technextilia tein kichiujkej Pablo uan oksekin tanojnotsanij keman yetoyaj Filipos?
1 Katka se tonal sábado keman miakej judíos kayomej Filipos moseuijtoyaj. Pablo uan tein iuan yayaj ompa moajsiaj porin tanojnotstinemiaj. Komo yejuan no moseuiskiaj nejon tonal, amo akin mokuejmoloskia uan ueliskiaj kichiuaskiaj nejon porin miak tonalmejya tanojnotskaj. Sayoj ke kuali kimatiaj ke nejon tonal, judíos kisayaj itech altepet uan ompa kichiuayaj netataujtil, yejika yejuan yajkej kinnojnotsatoj nejon tonal. Tein kichiujkej tapaleuij maj moauianij Lidia uan tein moajsiaj ichan. ¡Nejin tanojnotsanij kimachilijkej se ueyi yolpakilis! (Hech. 16:13-15.) Axkan no ijkon miakej moseuiaj tonal domingo. Yejika, ¿uelis tiontanojnotsas seki horas nejon tonal?
2. ¿Toni ouijkayomej monekik kiixnamikiskej itekitikauan Jiova tein axkan tapaleuia maj tiuelikan titanojnotsakan itech tonal domingo?
2 Ouijkayomej tein monekik kiixnamikiskej. Itech xiuit 1927 kinyoleujkej itekitikauan Dios maj tanojnotsakan seki horas itech tonal domingo, sayoj ke niman peujkej taixnamikij tekiuanij. Ompa Estados Unidos miakej tokniuan kintsakkej, porin kinijtouilijkej ke kitapanauiliayaj tanauatil tein kijtouaya ke monekia moseuiskej domingo, uan no ke takuejmolouayaj uan tanamakayaj maski amo kipiayaj tanauatil. Tokniuan amo mosenkaujkej. Tepitsin satepan ke panok xiuit 1930 kichiujkej tein kitokaytiayaj “campañas de las divisiones” kampa miakej tanojnotsanij tein ualeuayaj itech nechikolmej tein amo uejka moajsiaj, tanojnotsayaj itech xolal tein kiixtaliayaj. Kemansa tel miakej tanojnotsanij moajsiaj uan tekiuanij amo ueliaj nochin kintsakuayaj. ¿Tiktasojkamatij nochi tein monekik kichiuaskej nejon tokniuan tein axkan tapaleuia maj tiuelikan titanojnotsakan itech tonal domingo?
3. ¿Keyej tel kuali maj titanojnotsatij itech tonal domingo?
3 Tel kuali maj se tanojnotsa nejon tonal. Tel miakej amo tekititij domingo yejika miakej amo ijsiujtinemij. Uan no, sekin tein kipiaj imin taneltokalis xa okachi kinekiskej ika tajtoskej Dios nejon tonal. Komo tikpiaj nechikol domingo, titakentoskejya kemej moneki. Yejika, ¿keyej amo tikixtaliaj tikisaskej achto oso satepan ke tikpiaskej tonechikol? Komo moneki, uelis tikuikaskej tepitsin takual.
4. ¿Keniuj timomachiliskej komo titanojnotsatij seki horas itech tonal domingo?
4 Maski titanojnotsatiuij domingo seki horas, uelisok timoseuiskej. Uan kuali timomachilijtoskej porin tikmattoskej ke tikchiujkej itekiyo Dios (Pro. 19:23). Uan no, xa uelis tikajsiskej aksa tein kinekis momachtis ijkon kemej Lidia.