Maj tikteixmatiltikan kuali tanauatilmej ika tratados
1. ¿Keniuj motekitiltianij tratados itech inechikol Dios?
1 Miak xiujmejya, itech inechikol Dios tiktekitiltianij tratados uan ijkon tikmoyauaj kuali tanauatilmej. Itech xiuit 1880, C. T. Russell uan akin iniuan tekitia peujkej kikixtiaj tratados uan kinmakakej akin kiixtajtoltiayaj amaix Watch Tower maj kimoyauanij. Nejin amatsitsin kiitayaj ke motelnekia, yejua ika itech xiuit 1884 keman tokniuj Russell kijkuiloj se nechikol ininixpan tekiuanij tein amo ika motomintiskiaj uan ika kichiuaskia itekiyo Jiova, tajtol tract (“tratado”) motalij itech tokayit: Zion’s Watch Tower Tract Society (tein axkan moixmati kemej Watch Tower Bible and Tract Society of Pennsylvania). Keman ajsik xiuit 1918, Momachtianij ika Biblia kimoyaujkajya panoua 300 millones nejin amatsitsin. Uan axkan, kisentokaj tel tapaleuiaj itech tanojnotsalis.
2. ¿Keyej tel tapaleuiaj tratados?
2 Keyej tel tapaleuiaj. Tratados kipiaj kualtsitsin taixkopimej. Ompa ijkuiliujtok se tanauatil tein teyoltilana maj se kiita uan kijtoua miak ika tepitsin tajtolmej. Taltikpakneminij okachi kinekij kiseliskej se tratado uan amo se revista oso se libro. Uan no, hasta akin yekin peuaj tanojnotsaj uan konemej ueli kitemakaj. Uan kemej amo uejueyi ueli tikuikatinemij kampa yeski.
3. Xikonijto se taman tein tikonpanok oso tein kisak itech se amaix tein kinextia nepaleuil tein kitemakaj tratados.
3 Miakej kiixmatkej Jiova porin kiixtajtoltijkej se tratado. Kemej neskayot, se siuat kayot Haití kiitak se tratado itech ojti, kiajokuik uan, keman kitamiixtajtoltij, kijtoj: “¡Yejua nejin tein melauak!”. Satepan, yajki itech se Kali kampa tiMosentiliaj, peuak momachtia Biblia uan moauij. Nochi nejin mochiuak ika kuali nepaleuil tein kipia iTajtol Dios itech se tratado.
4. ¿Toni tikchiuaskej keman moixtalis maj tiktemakakan tratados itech se metsti?
4 Itech tanojnotsalis tein mochiua kajkalpan. Kemej tratados tel tapaleuiaj keman titanojnotsaj, itech metsti noviembre peuas moixtalis maj kemansa tiktemakakan. Tein tiknekij amo sayoj tiktemakaskej tratados, ta maj tiktekitiltikan kemej techpaleuis maj ika tipeuakan titajtokan. Komo se taltikpaknenkej kineki kimatis okachi, yeski itech yekinika takalpanolis oso itech ojpatika, uelis tiknextiliskej keniuj mochiua se nemachtil ika amaix Tamachtia Biblia oso ika okse amaix tein ika timomachtiaj iniuan taltikpakneminij. ¿Keniuj uelis tiktemakaskej tratados keman titanojnotstoskej kajkalpan? Sejse tratado tataman tamachtilis kipia, yejua ika moneki tikixmatiskej tein kijtoua achto ke tiktemakaskej.
5. ¿Keniuj uelis tiktemakaskej tratados keman titanojnotsaskej kajkalpan?
5 Tein ika titajtoskej iuan se taltikpaknenkej mopatas ijkon kemej tratado tein tikuikaskej uan no tein taltikpakneminij okachi kinekiskej ika tajtoskej. Uelis tikmakaskej se tratado uan ijkon tipeuaskej. Tein kiitas itech ipeujyan xa kiolinis maj kineki kimatis okachi. Komo titanojnotsaj kampa taltikpakneminij amo kiyeknekij tataposkej, uelis tiknextiskej kampa uelis kiitaskej oso uelis titajtaniskej ox uelis tiktaliskej kaltenojtampa uan maj techiluikan tein kinemiliaj ika tein kijtoua amatsin. Komo itokay tratado se netajtanil uelis tiktajtaniskej tein kinemilia ika nejon, oso uelis tikchiuaskej se netajtanil tein kipaleuis maj kineki kimatis okachi uan tapaleuis maj kuali titajtokan iuan. Ijkuak, uelis tikixtajtoltiskej tepitsin tein kijtoua tratado, timotsakuiliskej kampa kipia netajtanil uan tikyoleuaskej maj kijto tein kinemilia. Okachi kuali yeski komo tikixtajtoltiaj itech Biblia tajkuilolmej tein tayekantokej. Satepan ijkuak tikitaskej tepitsin, uelis timotenkauaskej kemanian uan toni hora oksepa tikalpanoskej. Komo tokniuan itech nechikol kikauaj amaixmej itech kalmej kampa amo akin yetok, uelis tikauaskej se tratado kampa amo kiitaskej ojneminij.
6. ¿Keniuj uelis tiktemakaskej tratados keman titanojnotsaskej itech ojti?
6 Keman titanojnotsaskej itech ojti. ¿Tikontekitiltiani tratados keman tiontanojnotsa itech ojti? Seki ojneminij ijsiuij uan amo kinekij motsakuiliskej uan touan tajtoskej, yejua ika ouij tikmatiskej ox yekmelauj kinekij kimatiskej okachi. Maj amo tikinmakakan revistas tein okachi yankuixtok kiskej ta amo tikmatij ox kiixtajtoltiskej, okachi kuali maj tikinmakakan se tratado. Kemej kipia kualtsin taixkopin ipeujyan uan amo miak tajtolmej kiualkui, uelis kinolinis maj kinekikan kiixtajtoltiskej keman tepitsin kemantiskej. Sayoj ke, komo amo ijsiuij, uelis iniuan tikitaskej seki taman tein kipia tratado.
7. Xikonijto seki taman tein kinextia keniuj uelis tiktekitiltiskej tratados keman titanojnotsaskej kampa yeski.
7 Keman titanojnotsaskej kampa yeski. Semi amo ouij titanojnotsaskej kampa yeski ika tratados. Se tokniuj nochipa kiuika seki keman kisa ichan. Keman tajtoua iuan aksa, kemej akin tekiti itech se tanamakaloyan, kiiluia ke kineki kimakas se teisa tein uelis kiixtajtoltis uan kimaka se tratado. Keman seki namikuanij paxalotoj itech altepet Nueva York, kimatiaj ke kinitaskiaj taltikpakneminij akin kayomej itech tataman uejueyi altepemej. Yejua ika, kiuikakej folleto Naciones uan miak tratados itech tataman tajtolmej. Ompa, keman kitenkakiaj aksa tajtojtok itech okse taman tajtol, kemej akin tanamakatoya itech ojti, akin tokotsyetoya ompakauin oso akin moajsia kampa takualnamakaj, kimakayaj se tratado itech itajtol.
8. ¿Keyej tratados moneskayotiaj kemej xinach?
8 “Xiktoka moxinach.” Tratados uelis moneskayotiskej kemej xinach. Keman tatokaj, koujtajtekitinij miak xinach kitokaj porin amo kimatij kani ixuas. Eclesiastés 11:6 kijtoua: “Kualkan xiktoka moxinach, uan hasta tiotak amo ximomaseui; porin amo tikmati kani kuali kisas nejin, nikan oso nepa, oso nochi ojkan kuali kisas”. Yejua ika, maj tiksentokakan ‘tikmoyauakan taixmatilis’ tein kitemakaj nejin amatsitsin (Prov. 15:7).
[Tanemilil itech página 3]
Kemej tratados tel tapaleuiaj keman titanojnotsaj, itech metsti noviembre peuas moixtalis maj kemansa tiktemakakan