Makuil taman tein techpaleuis maj tikpiakan akin tikmachtiskej
1. ¿Toni moneki tikchiuaskej komo ouij techkisa tikajsiskej se akin kineki momachtis ika Biblia, uan keyej?
1 ¿Ouij mitsonkisa tikonajsis se akin kineki momachtis ika Biblia? Amo xionmosenkaua ta xikonsentoka xikontemo. Jiova kintatiochiuia akin kisentokaj kichiuaj itanejnekilis (Gál. 6:9). Nikan moajsi makuil taman tein mitsonpaleuis.
2. ¿Keniuj uelis tikajsiskej se akin tikmachtiskej komo tiktajtaniaj ox kineki kiselis se nemachtil ika Biblia?
2 Xikontajtani taltikpaknenkej ox kiuelitaskia kiselis se nemachtil ika Biblia. Miakej taltikpakneminij kimatij ke tiktemakaj amaix Tanejmachtijkej uan ¡Despertad!, sayoj ke xa amo kimatij ke no tiktemakaj nemachtilmej ika Biblia. Keman oksepa tionkisas tiontanojnotsatiuj kajkalpan, ¿uelis tikontajtanis taltikpaknenkej ox kineki kiselis se nemachtil ika Biblia? No uelis tikoniluis akin tikonkalpanoua. Komo mitsoniluiaj ke amo, uelis tikonsentokas tikonuikilis amaixmej uan tikonsentokas tikonpaleuis maj kineki kimatis okachi. Se tokniuj miak xiujmej kinuikiliaya revistas seki namikuanij. Se tonal kinkauilito tein okachi yankuixtok kiskaj, uan keman iniuan monauatij, kinemilijtiuetsik kintajtanis: “¿Nankiuelitaskiaj nankiseliskej se nemachtil ika Biblia?”. Kiiluijkej ke kemaj, uan amo kichiaya nejon tanankilil. Axkan yejuan moauijkejya.
3. ¿Keyej moneki maj amo tiknemilikan ke akin youij nechikolmej kiseliajya se nemachtil ika Biblia?
3 Xiontajto iniuan akin youij nechikolmej. Amo xikonnemili ke nochin akin youij nechikolmej kiseliajya se nemachtil ika Biblia. Se tokniuj kijtoua: “Panoua tajko akin nikinmachtiani ika Biblia nikinajsini keman iniuan nitajtoua akin youij nechikolmej”. Se siuat akin semi pinaujkej katka, kiuikaya kaxtol xiuit yaya nechikolmej iniuan iichpochuan, akin moauijkajya. Ajsia keman yaya peuatiya nechikol uan kisaya niman keman tamia. Se tonal, se tokniuj siuat kitajtanij ox kinekiskia kiselis se nemachtil ika Biblia. Siuat kiiluij ke kemaj uan satepan moauij. Tokniuj kijtoua: “¡Nimotayokoltia porin panok kaxtol xiuit uan niktajtanij ox kinekia kiselis se nemachtil!”.
4. ¿Keniuj uelis tikajsiskej se akin tikmachtiskej ika Biblia komo tikijtouaj ke uelis titapaleuiskej?
4 Xikonijto ke uelis tiontapaleuis. Se tokniuj siuat kinuika okseki tokniuan kampa tamachtiaj ika Biblia. Keman tami nemachtil, komo kikaua tokniuj akin kiuika, kitajtania taltikpaknenkej ox kiixmati aksa akin no kiuelitaskia kiselis se nemachtil ika Biblia. Okse taman, keman tikmakaskej amaix Tamachtia Biblia se akin tikalpanojtokej, uelis tiktajtaniskej ox kiixmatij aksa akin no kiuelitaskia kiixtajtoltis amaix. Kemansa, se tanojnotskej oso se precursor amo uelis kimachtiskej se aksa akin kiajsikej itech tanojnotsalis. Uelis tikoniluis ke tejuatsin kemaj tionuelis tikonmachtis nejon taltikpaknenkej.
5. ¿Keyej moneki tiktajtaniskej inamik se tokniuj ox kinekiskia momachtis ika Biblia?
5 Xiontajto iuan inamik se tokniuj. ¿Moajsij itech nechikol tanojnotsanij akin ininnamik amo itaixpantijkauj Jiova? Sekin amo kiuelitaj maj ininnamik kinnojnotsa ika Biblia, sayoj ke kemaj kinekiskiaj maj aksa akin amo ichankauj kimachti. Tel tapaleuis komo achto tiktajtaniaj tokniuj uan ijkon tikmatiskej keniuj uan kemanian uelis iuan titajtoskej inamik.
6. ¿Keyej motelneki tikchiuaskej netataujtil keman tiktemouaj se akin kinekis kiselis se nemachtil ika Biblia?
6 Xikontajtani Jiova maj mitsonpaleui. Amo keman xikonnemili ke netataujtil amo semi tapaleuis (Sant. 5:16). Jiova motenkaua techkakilis tonetataujtiluan komo tein tiktajtaniaj mouika iuan itanejnekilis (1 Juan 5:14). Se tokniuj akin tel amo kemantia kitajtanij Jiova maj kipaleui maj kiajsi se akin uelis kimachtis. Inamik motajtaniaya ox ueliskia kixelos tonal uan kimachtis aksa, okachiok komo akin kimachtia kipia miak kuejmolmej. Yejua ika, ika se netataujtil kiiluij Jiova toni kitekipachouaya. Yejuatsin kinankilij ininnetataujtiluan ome semana satepan keman se tokniuj siuat akin kichiua tekit kemej precursor itech nechikol kiajsik se takat akin kinekia momachtis ika Biblia uan kiiluij tokniuj akin kinekia kimachtis aksa maj yejua kimachti. Inamik tokniuj kijtoua: “Akin kimachiliaj ke amo keman ueliskej kimachtiskej aksa ika Biblia, nikinyolchikaua maj nochipa kichiuakan netataujtil uan maj senkis kijtokan toni kintekipachoua. Amo keman tiknemiliayaj ke titelyolpakiskiaj”. Komo amo tionmosenkaua, tejuatsin no uelis tikonajsis se aksa akin kinekis momachtis ika Biblia uan tikonmachilis yolpakilis tein kiualkui keman tikonpaleuis se aksa maj nejnemi itech ojti tein kiajxitis “tech ne yek nemilis” (Mat. 7:13, 14).