Makiskej keman ualaj se tetsaujkakiouit

JKON kemej momiakilijtiayaj taltikpakneminij, tajtakol uan tein amo kuali momiakilijtiaya noyampa. Enoc akin pane sayoj yejua kitekitiliaya Dios nikan taltikpak, kijtoj ke Jiova kinixpoloskia nochin tein amo yolkualmej. Sayoj ke amo kikakkej itanejmachtilis, uan okachiok momiakilij tein amo kuali. Uan no, seki ángeles tein kinekepilijkej Jiova, kikaujkej tekit tein kipiayaj ne iluikak, mochiujkej kemej takamej uan monamiktijkej imiuan miakej siuamej kemej yejuan kinekkej. Nejon nenamiktilis tein Dios amo ijkon kitalijka, kichiuak maj kinpianij konemej tel uejueykej uan tel chikaujkej tein motokaytijkej nefilim. Yejuan kichiujkej maj okachi onka tateuilis itech taltikpak. ¿Ueli timonemiliaj keniuj kiyolkokoj Dios keman kiitak ke tel amo kuali moajsiaj taltikpakneminij?

Satepan ke Enoc momikilij, moajsik okse takat yolkuali tein motokaytij Noé. Yejua uan ichankauan mochikaujkej kiyolpaktiskej Dios. Se tonal, Jiova kinemilij kiualkuis se tetsaujkakiouit tein ika kinixpoloskia tein amo yolkualmej. Sayoj ke amo kinekia maj ixpoliui tatakamatkej Noé niono tapialmej. Yejika kiiluij maj kichijchiua se arca oso se ueyak koujkajon. Yejua uan ichankauan monekia kalakiskej ompa, ijkon kemej miak tataman tapialmej. Noé kitakamatik Dios uan kichijchiujtoya arca kemej 40 oso 50 xiujmej. Itech nejon tonalmej, Noé no “tanojnotstinemia ika ten melauak tajtoltsin” (2 Pedro 2:5). Kinnejmachtij taltikpakneminij ke ualaskia Tetsaujkakiouit, sayoj ke amo akin kikakilij. Ajsik tonal keman Noé uan ichankauan ijkon kemej tapialmej, monekik kalakiskej itech arca. Ompa, Dios tatsakuak uan peuak tel kioui.

Ika nejon tetsaujkakiouit tein uejkauak ome poual tonal uan ome poual youal, taape­xonik itech nochi taltikpak. Ixpoliujkej nochin tein amo yolkualmej. Seki metsti satepan, at peuak temoua uan arca motsakuilij itech se tepet. Se xiuit satepan ke tetsaujkakiouik, Noé uan ichankauan uelik kiskej itech arca. Kemej Noé moteltasojkamatia, kimakak Jiova se nemaktil. Dios motenkauak imiuan ke amo kemanok kinixpoloskia ika se tetsaujkakiouit nochi tein yoltok nikan taltikpak. Yejuatsin kitalij mixkosantsin tein kinyekmatiltiskia oso kinelnamiktiskia taltikpakneminij itajtoluan Dios.

Satepan ke panok Tetsaujkakiouit, Dios kinmakak yankuik tanauatilmej. Kiniluij ke ueliskiaj kikuaskiaj imin nakayo tapialmej, sayoj ke esti amo. No kinnauatij maj momoyauanij noyampa taltikpak. Sayoj ke miakej kiixnamikkej nejon tanauatil, mosentilijkej itech se altepet uan peuak kichijchiuaj se uejkapan kali. Kinixyekanak se takat tein motokaytij Nemrod. Sayoj ke Dios amo kinkauak. ¿Keniuj kintsakuilij? Kichiuak maj sepasaj tajtouanij miak tataman tajtolmej nochin tein nemiaj itech nejon altepet, tein motokaytij Babel uan satepan Babilonia. Kemej amo ueliaj moajsikamatiaj, kikaujkej tekit uan momoyaujkej.

​(Motaksaltia itech Génesis capítulos 6 a 11 uan itech Judas 14, 15.)