Jesús kitetapouij iTekiuajyo Dios

KEYEJ ualajka Jesús nikan taltikpak? Yejua kijtoj: “Moneki nitetapouitiuj [...] kuali tanauatilmej ika itekiuajyo Dios, porin yejua ika nechualtitankej” (Lucas 4:​43, NM). Maj tikitakan naui taman tein tamachtij ika iTekiuajyo Dios.

1. Jesús eskia Tekiuaj. Jesús moteixmatiltij kemej Mesías tein moijtojka ualaskia (Juan 4:​25, 26). Uan no, kijtoj ke yejua katka Tekiuaj tein Dios kiitaltijka tanauatijkej Daniel. Kiniluij itatitaniluan oso itatojtokakauan tein okachi iuan tekitikej, ke satepan ‘motaliskia kemej se rey’ uan yejuan teuantitoskiaj itech se oloch taltikpakneminij tein tekiuajtiskiaj iuan (Mateo 19:​28). Kinnotsak kemej “amo ueyi oloch ichkamej”. No ika tajtoj ‘okseki ichkamej’ tein amo teuantitoskiaj imiuan nejon tekiuanij (Lucas 12:​32, NM; Juan 10:​16).

2. ITekiuajyo Dios kichiuaskia maj onka sayoj tein melauak. Satanás kimouispolojtok itokay Dios, maski nion tepitsin onkaya keyej. Yejika Jesús kinextij ke iTekiuajyo Dios kiueyitalis itokay, tein kijtosneki, kichiuas maj nesi ke nion tepitsin melauak nochi taman tapantilis tein peuak kichiuiliaj keman taixnamikkej ompa Edén (Mateo 6:​9, 10). Uan no, Jesús kinextij ke itech iTekiuajyo Dios amo onkas tachichikouilis, ta kinmachtij nochin takamej uan siuamej ijkon kemej tein kipiayaj tomin uan tein amo. Uan maski kiualtitankej maj kinmachtiki sayoj israelitas, kitemoj keniuj kinpaleuis samaritanos uan tein amo katkaj judíos. Jesús nion tepitsin katka kemej taixyekananij itech taneltokalis tein senkis tachichikotasojtayaj uan tachikoitayaj.

3. ITekiuajyo Dios amo poujtoskia nikan taltikpak kampa taixyekana Satanás. Jesús nemik itech tonalmej keman judíos semi mokuejmolojtoyaj porin yejuan moajsiaj imako okse tekiuajyot tein okseko kayot katka. Sayoj ke yejua amo keman mokauak maj kikalakikan itech política (Juan 6:​14, 15). Keman iuan tajtojtoya se tekiuaj, kiyekiluij: “Notekiuajyo amo poui nikan taltikpak” (Juan 18:​36, NM ). Uan imomachtijkauan kiniluij: ‘Namejuan amo nanpoujtinemij ok iuan in taltikpakuanij’ (Juan 15:​19). Uan no, amo kinkauilij maj kikuikan teposmej tein ika tateuiskiaj niono maski ika kipaleuiskiaj (Mateo 26:​51, 52).

4. Cristo taixyekanaskia ika netasojtalis. Jesús motenkauak ke kinpaleuiskia itatojtokakauan maj mokixtilikan miak taman tein kintajyouiltijtoya (Mateo 11:​28-​30). Uan ijkon kichiuak. Kinyolmajxitij keniuj kiixnamikiskiaj netekipacholmej, keniuj monekia kiitaskej tomin, keniuj mouikaskej imiuan oksekin uan keniuj kiajsiskiaj yolpakilis (Mateo, capítulos 5 a 7). Kemej Jesús nochin kintasojtaya, akin yeski kinekia motokis iuan, porin kiyekmatiaj ke kuali kinseliskia uan kinkakiskia. ¿Melauj ke tinochin tiknekij tikpiaskej se tekiuaj kemej Jesús?

Uan no, tein Jesús kichiuak ika ichikaualis Dios, kinextij tein kichiuaskia iTekiuajyo Dios. ¿Toni nejin? Maj tikitakan.

​(Motaksaltia itech amaixmej Mateo, Marcos, Lucas uan Juan.)