TAMACHTILIS ITECH IPEUJYAN AMAIX | ¿KEYEJ MONEKI MAJ JESÚS TECHMAKIXTI?
¿Keyej moneki maj techmakixtikan?
“Takat, akin yoli itechkopa siuat, inemilis amo uejkaua uan semi motekipachoua. Ijkon kemej se xochit tein kisa uan kitekij, uan motatia kemej yekauil uan ixpoliui.” (Job 14:1, 2)
Taltikpakneminij nochipa kitemouanij amo keman ueuentsintiaskej. Sayoj ke tein melauj tinochin timomikiliaj. Job kijtoj nejon tajtolmej tein yekinika moajsij, panoua eyi mil xiujmej uan kisentokaj melaujkej hasta axkan ijkon kemej ijkuak moijkuilojkej.
Tinochin senkis tiknejnekij tinemiskej nochipaya. Biblia kijtoua ke Dios kitalij nejon tanejnekilis itech toyolo, ijkon kemej tiknejnekiskej tikajsikamatiskej toni kijtosneki se nemis nochipaya (Eclesiastés 3:11). ¿Yeskia taixejekol maj se Dios akin techtasojta techmakani se tanejnekilis tein amo ueliskia tikpiaskej? Komo tiontanankilia ke amo, kuali yetok. ITajtol Dios kijtoua ke mikilis se tetauelitakej uan kijtoua ke “senkis tamis” (1 Corintios 15:26, TNM).
Tikyekmatij ke mikilis se tetauelitakej. Porin akin kuali taixejekoua amo kineki mikis. Ta, keman tikitaj ke teisa uelis techijtakos, senkis tikcholuiaj. Uan keman tikokolispeuaj, tiktemouaj maj techpajtikan. Tikchiuaj nochi tein moneki porin amo tiknekij timomikiliskej.
¿Yekmelauj uelis ixpoliuis nejin tetauelitakej tein miak xiujmejya moajsini? Kemaj. ToTachijchiujkauj Jiova, amo techchijchiuak maj tinemikan sayoj seki xiujmej. Yejuatsin amo kinekia maj timomikilikan. Ta, kinekia maj tinemikan nochipaya nikan taltikpak, uan tein yejuatsin kiixtalia, kichiua (Isaías 55:11).
¿Keniuj kiixtalia Dios kiixpolos mikilis? Miak xiujmejya taltikpakneminij kitemouanij kiixpoloskej, sayoj ke amo uelinij. Uan hasta axkan kisentokaj kitemouaj. Tamatinij kichijchiuanij pajti uan vacunas tein ika kitsakuilianij seki kokolismej. No momachtijtokej keniuj chijchiujtok nochi tein yoltok. Miakkan, taltikpakneminij okachi miak xiujmej nemij axkan ke cien xiujmej achto. Maski ijkon, amo uelinij kiixpolouanij mikilis. Kemej kijtoua Biblia, “nochin mokepaj talnex” (Eclesiastés 3:20).
Sayoj ke moajsij kuali tanauatilmej: tikyekmatij ke tamatilis tein kipiaj taltikpakneminij amo uelis kijkuanis nejon kuejmol. Jiova kichiuaniya tein moneki uan ijkon uelis techijkuanilis mikilis, uan itechkopa Jesucristo senkis kiixpolos.