Keman mochiua se ueyi tekokojkayot oso tayokol

Maski tikonchiuas nochi tein tapaleuis xionyolpaki iuan monamik uan iniuan mochankauan, kemansa panos tein amo mochiaya uan nejon kichiuas amo xionyolpaki (Eclesiastés 9:11). Sayoj ke Dios techmaka tein techpaleuis keman tikpanoskej ouijkayomej. Komo nankichiuaj itayolmajxitilis Biblia tein moajsi itech nejin taxelol, tejuatsin uan mochankauan uelis nankixikoskej hasta ouijkayomej tein okachi tetajyouiltiaj.

1 XIONTAKUAUJTAMATI IUAN JIOVA

TEIN BIBLIA KIJTOUA: “Xikpanoltilijtiyakan Dios nochi namoyolkuejmololisuan porin Yejuatsin semi [...] [kineki] namechyekpixtinemis” (1 Pedro 5:7). Nochipa xikonelnamiki ke Dios amo yejua akin kichiua xikonpia kuejmolmej (Santiago 1:13). Komo tionmotokia iuan, yejuatsin kiitas keniuj mitsonpaleuis (Isaías 41:10). “Iixpan yejuatsin xiktapokan namejuan nanmoyolo.” (Salmo 62:8.)

Okse taman tein no mitsonyolseuis yejua tikonixtajtoltis uan tionmomachtis Biblia mojmostaj. Komo ijkon tikonchiua, tikonitas ke “Totajtsin Dios techyolseuijtinemi” itech nochi tataman tajyouilis (2 Corintios 1:3, 4; Romanos 15:4). Jiova motenkaua mitsonmakas “yolseuilis ten kachi kuika uelilis hasta amo uelis se kajsikamatis ok de keniu” (Filipenses 4:6, 7).

TEIN UELIS TIKONCHIUAS:

• Xikontajtani Jiova maj mitsonpaleui xionyolseujto uan maj kuali xiontanemili

• Xikonita nochi tein uelis tikonchiuas uan ijkon uelis tikonixpejpenas tein okachi kuali

2 XIONMOYEKPIA TEJUATSIN UAN MOKALYETOUANIJ

TEIN BIBLIA KIJTOUA: “Iyolo akin taajsikamati kiselia taixmatilis, uan inakas tamatkej kitemoua kiajsis taixmatilis” (Proverbios 18:15). Xikontemo tikonmatis keniuj momachiliaj uan toni kinpoloua sejse mokalyetouanij. Xiontajto iniuan uan xikonkaki tein kijtouaj (Proverbios 20:5).

¿Uan komo momikilia se akin tikontasojta? Amo xionmopinaujmati tikonijtos tein tikonmachilia. Xikonelnamiki ke hasta Jesús “peuak mochojchoktia” (Juan 11:35; Eclesiastés 3:4). No motelneki tionmoseuis uan kuali tionkochis (Eclesiastés 4:6). Ijkon okachi amo ouij tikonixnamikis ouijkayot.

TEIN UELIS TIKONCHIUAS:

• Nochipa xiontajto iniuan mokalyetouanij, amo xionmochia hasta maj pano se ueyi ouijkayot. Ijkon, keman nankipiaskej kuejmolmej, kuali momachiliskej keman tajtoskej mouan

• Xiontajto iniuan akin kipanouanij se ouijkayot kemej tein tikonpanotok

3 XIKONTEMO NEPALEUIL TEIN MONEKIS

TEIN BIBLIA KIJTOUA: “Se yekmelauj tetasojikniuj nochipa tetasojta, uan mochiua se teikniuj keman se kipanoua tajyouilis” (Proverbios 17:17). Akin mitsontasojtaj kinekiskej mitsonpaleuiskej, sayoj ke xa amo kimatiskej keniuj kichiuaskej. Xikonilui keniuj uelis mitsonpaleuiskej (Proverbios 12:25). Uan no, xikontemo akin kiajsikamatij tein kijtoua Biblia maj mitsonpaleuikan xikonchikaua mokuali uikalis iuan Dios. Ika inepaleuil iTajtol Dios tein mitsonmakaskej, tikonxikos ouijkayot (Santiago 5:14).

Komo tikontemoua tionmouikas iniuan akin yekmelauj takuaujtamatij iuan Dios uan itech tein yejuatsin motenkaua kichiuas, tikonpias nepaleuil tein moneki. No mitsonyolchikauas tikonpaleuis akin kinekij mosenkauaskej. Xikonilui ke tiontakuaujtamati iuan Jiova uan itech tein motenkaua kichiuas. Nochipa xikontemo tikonpaleuis oksekin uan amo xionmouejkatili iniuan akin mitsontasojtaj uan moka motekipachouaj (Proverbios 18:1; 1 Corintios 15:58).

TEIN UELIS TIKONCHIUAS:

• Xiontajto iuan se akin kuali tionmouika uan xikonkaua maj mitsonpaleui

• Xikonijto tein yekmelauj tikonpanotok uan tein mitsonpoloua