Tein mokui keman tikitaj Tein timomachtiaj itech nechikol Tonemilis uan toTanojnotsalis
6-12 METSTI MARZO
TAMACHTILIS TEIN KIPIA BIBLIA | JEREMÍAS 1-4
Tein moixtajtoltia itech Biblia
(Jeremías 4:1-10) “Komo tikneki timokepas, Israel, yejua nejin tein kijtoua Jiova, uelis timokepas nouan. Uan komo tikinijkuania motiotsitsin tein tetajyaltijkej noixpan, amo ticholojtinemisok. 2 Uan komo timotenkaua: ‘¡Yekmelauj kemej Jiova nemi ika melaujkayot!’, altepemej motechkopa kiseliskej tatiochiualis uan yekmelauj moyolpaktiskej”. 3 Porin yejua nejin tein Jiova kiniluia takamej akin nemij Judá uan Jerusalén: “Xitameuakan kampa uelis nantatokaskej, uan amo xitatokakanok kampa uitstaj. 4 Ximoneskayotikan iixpan Jiova, uan xikijkuanikan tein kichiua maj amo nesi ke nantaneskayotilmej itech nanmoyolo, namejuan takamej akin nanpouij Judá uan akin nannemij Jerusalén; uan ijkon amo kisas nokualanyo kemej tit uan yekmelauj xotas uan amo akin uelis kiseuis porin tel amo kuali tein nankichiuaj”. 5 Xikteixmatiltikan ompa Judá, uan xikmoyauakan hasta Jerusalén uan chikauak xikijtokan uan xikpitsakan kuakoujomit itech nochi altepet. Chikauak xitsajtsikan uan xikijtokan: “Ximosentilikan, uan maj tikalakikan itech xolalmej tein kinyoualoua tepamit. 6 Xikajokuikan se neskayot tein kinextijtos kampa moajsi Sión. Xiktemokan nepaleuil, uan amo ximotsakuilikan”. Porin nikualkuis se tetsauit kampa ika norte, tein tel tauejuelos. 7 Yejua ualkisani kemej se tekuani tein kisa xiujtsalan, akin kinixpolojtok altepemej ualkisani kampa moajsia; uan ijkon kichiuas maj moxolal momoujti. Moxolaluan mochiuaskej tepamit taxitinil kampa amo akin nemis. 8 Yejua ika, ximotakentikan ika tojmit. Ximomaakan nanmoyolixko uan xitayokolchokakan, porin iueyi kualanyo Jiova amo mokepani. 9 “Uan itech nejon tonal, yejua nejin tein kijtoua Jiova, yolkuetauis tekiuaj, uan no yolkuetauiskej ueyichiuanimej; uan tiopixkamej motelmoujtiskej uan tanauatianij kimoujkaitaskej.” 10 Uan nikijtoj: “¡Ay, Jiova toUeyi Taixyekankauj! Yekmelauj tikajkayauani nejin xolal uan Jerusalén, keman tikijtoj: ‘Nankipiaskej yolseuilis’, sayoj ke espada tikpiaj itech totoskak”.
13-19 METSTI MARZO
TAMACHTILIS TEIN KIPIA BIBLIA | JEREMÍAS 5-7
Tein moixtajtoltia itech Biblia
(Jeremías 5:26–6:5) ”’Porin itech noxolal moajsinij takamej akin tel amo yolkualmej. Kisentokaj tachiaj ika nejmachkayot kemej ijkuak totokitskijkej moichtakatatia. Kitalianij se tamekauilis tein temiktia. Kinkitskiaj takamej. 27 Kemej se jaula tein pexontok ika totomej, ijkon nanmokalijtik pexontok ika takajkayaualis. Yejua ika nanmochiuanij ueyichiuanimej uan tominpianij. 28 Nanmotomauanij uan nanpetaninij. No nankichiuanij tein tel amo kuali. Amo nankipaleuianij nojnel akin ipopaj momikilijya, uan ijkon kuali kisas tein nankichiuaskej, uan amo nankinpaleuiaj akin kipanouaj tatasojtilis’”. 29 “¿Amo moneki nikintajtanis maj tanankilikan noixpan keyej kichiuaj nejin taman?, yejua nejin tein kijtoua Jiova. ¿Amo moneki niktatsakuiltis se altepet tein kichiua nejon? 30 Se taman tein se kimoujkaita, se taman tein tel amo kuali mochiuani itech xolal: 31 Tanauatianij kiteixmatiltiaj tein amo melauak, uan tiopixkamej amo kuali kitekitiltiaj tanauatil tein kipiaj. Uan noxolal ijkon kiuelita. Sayoj ke, ¿toni nankichiuaskej keman tamis nejon?”
6 Xiktemokan nepaleuil, nanikoneuan Benjamín, uejka kampa moajsi Jerusalén; uan xikpitsakan kuakoujomit ompa Teqoa. Uan itech Bet-hakerem xiktalikan se neskayot ika tit; porin tajyouilis uitse kampa ika norte, se ueyi tetsauit. 2 Iichpoch Sión tamati kemej se siuat akin kuakualtsin akin moneki semi se kiyekpias. 3 Kiajsikoj ichkatajpianij uan ichkamej. Yejuan kiyoualojkej ika inintakenkaluan. Sejsemej kinyekanaj iichkauan tein kinyekpiaj. 4 “¡Xikchiua tein mitspaleuis xikteui! ¡Ximoajokui, uan maj nepantaj tikteuikan!”. “¡Titeikneltijkej, porin tapoyaujtokya, porin kisentoka tayoua!” 5 “Ximoajokuikan, uan maj youak tikteuikan uan maj tikixpolokan kalmej tein kinchijchiujkej uejkapan.”
20-26 METSTI MARZO
TAMACHTILIS TEIN KIPIA BIBLIA | JEREMÍAS 8-11
Tein moixtajtoltia itech Biblia
(Jeremías 11:6-16) Uan Jiova nechiluij: “Xiktematilti nochi nejin tajtolmej itech xolalmej tein pouij Judá uan itech iojuan Jerusalén, uan xikijto: ‘Xikakikan nejin netenkaualis uan xikchiuakan. 7 Porin senkis nikinnejmachtij nanmouejkaujtatuan itech tonal keman nikinkixtij ompa Egipto, uan hasta axkan, niksentoka nikinnejmachtia sepa uan oksepa, uan nikiniluia: “Xiktakamatikan notajtol”. 8 Sayoj ke yejuan amo nechkakkej nion kinekkej takakiskej, ta sejsemej kisentokakej kichiujkej takuauak ininyolo tein amo kuali; yejua ika nikixtalij nejin netenkaualis tein nikinnauatij maj kitakamatikan, sayoj ke yejuan amo kitakamatkej’”. 9 Uan no, Jiova nechiluij: “Moajsini ke takamej ompa Judá uan no akin nemij Jerusalén ichtaka kiixejekojkej taixnamikiskej. 10 Kichiuanij tajtakolmej tein kichiuayaj ininuejkaujtatuan akin yekinika moajsikej, akin amo kinekkej kitakamatiskej notajtoluan. Yejuan kitemouanij okseki tiotsitsin uan ijkon kinueyichiuaskej. Ichan Israel uan ichan Judá kitapanauilianij netenkaualis tein nikchiuak iniuan iuejkaujtatuan. 11 Yejua ika, yejua nejin tein kijtoua Jiova: ‘Xikita, nikinualkuiliti se tatsakuiltilis tein amo uelis kicholouiliskej. Keman yejuan nechnotsaskej maj nikinpaleui, amo nikinkakis. 12 Uan xolalmej tein pouij Judá uan akin nemij ompa Jerusalén kitemoskej ininnepaleuil tiotsitsin tein kinmakaj tapialmej tachichinolmej, sayoj ke yejuan amo kinmakixtiskej keman tajyouijtoskej. 13 Porin motiotsitsin momiakilianij kemej moxolaluan, Judá; ijkon kemej tel miak ojmej tein kipia Jerusalén, tiktaliani tel miak altares kampa tikueyichiua nejon tein tepinaujtij, altares kampa tikmaka tapialmej tachichinolmej Baal’. 14 ”Uan tejua, amo xinechtataujti maj nikpaleui nejin xolal. Amo xichoka nion xinechtataujti maj nikpaleui, porin amo nikakis keman nechtataujtiskej maj nikinpaleui ijkuak kipanotoskej tajyouilis. 15 ”¿Keniuj moixeuia akin niktasojta moajsis itech nokalijtik, ta miakej kichiujtokej tein tel amo kuali? ¿Uan ika toni nemaktil tein yektik nankichiuaskej maj amo namechtatsakuilti, keman ualas tajyouilis? ¿Tiyolpakis itech nejon tonal? 16 Jiova se tonal mitstokaytij olivo tein kualtsin xochiujtok, tein kipia kuali takilot. Chikauak kakistik keman kixotaltilij tit uan kipostekik imakoujyo.
27 METSTI MARZO HASTA 2 METSTI ABRIL
TAMACHTILIS TEIN KIPIA BIBLIA | JEREMÍAS 12-16
Tein moixtajtoltia itech Biblia
(Jeremías 13:15-27) ”Xitakakikan, uan xiknejmachkakikan. Amo ximoueyimatikan, porin Jiova tajtouani. 16 Xikueyipanchiuakan Jiova nanmoDios, achto ke kiualkuis tayouayanilot uan achto ke nanmometsteloskej itech tepemej keman tapoyauis. Uan nankichiaskej maj onka tanex uan yejua kiualkuis tayouayanilot; kichiuas maj senkis tayouayanijtik. 17 Uan komo amo tikneki titakakis, niichtakachokas porin timoueyimati. Nitelchokas uan noixtololouan ixayojkisaskej; porin iichkauan Jiova kinuikakej. 18 ”Xikilui tekiuaj uan siuatekiuaj: ‘Ximotalikan okachi tani, porin nanmocorona kuakualtsin tein nankipiaj itech nanmotsontekon uetsis’. 19 Xolalmej tein moajsij kampa ika sur kintsakkej, uan amo moajsi nion akin maj kintapo. Judá kiuikakej. Nochi xolal kiuikakej. 20 ”Ximoixajokui uan xikinita akin ualajtokej kampa ika norte. ¿Kani yetokej ichkamej tein mitsmakakej, mokualtsintsin ichkamej? 21 ¿Toni tikijtos keman mitstatsakuiltiskej akin tel kuali iniuan timouikak yekinika? ¿Amo tikpias tekokojkayot tein kipia se siuat keman kipiati ikonetsin? 22 Uan keman tikijtos itech moyolo: ‘¿Keyej nechpanouani nochi nejin?’, yejua porin tel uejueyi motajtakoluan yejua ika mitskuilianij mokueyuan; uan semi kikokouanij mokotsuan. 23 ”¿Ueli se cusita mochiuas chijchipauak?, ¿oso se leopardo kichiuas maj amo kuikuiltikok? Komo ueli, no ueliskia nankichiuaskej tein kuali, namejuan akin namechmachtianij xikchiuakan tein amo kuali. 24 Yejua ika namechxinis ijkon kemej sakat itech ejekat tein tepitsa taluakyan. 25 Yejua nejin tein mitsnamiki, tein nimitstamachiuilij, kijtoua Jiova, porin tinechelkauani uan tiksentoka titakuaujtamati itech tein amo melauak. 26 Yejua ika, nikajokuis mokuey moixpan, uan moitas mopinaujkayo, 27 moauilnemilis uan keniuj titsajtsi kemej tapial tein kitemoua tapialtetat, uan keniuj timonamaka itech auilnemilis. Itech tepemej, itech ixtauat, nikitani keniuj pitsotik timonejnemiltia. ¡Tel amo kuali tein mitspanos Jerusalén! ¿Hasta kemanian tiksentokas ika mopitsotik tachiualis?”