Tein mokui keman tikitaj Tein timomachtiaj itech nechikol Tonemilis uan toTanojnotsalis
6-12 METSTI FEBRERO
TAMACHTILIS TEIN KIPIA BIBLIA | ISAÍAS 47-51
Tein moixtajtoltia itech Biblia
(Isaías 51:12-23) “Nejua Akin namechyolchikaua. ¿Keyej tikmouiliti se taltikpaktakat akin momikilis uan ikoneuj taltikpaknenkej akin kuetauis kemej xoxoktik xiuit? 13 ¿Keyej tikelkaua Jiova moTachijchiujkauj, Akin kipatauak iluikak uan kitsinpeualtij taltikpak? Uan nochi tonal tikmouilijtoya akin mitsixnamikia, kemej yeskia yejua ueliskia mitsixpolos. ¿Axkan, kani moajsi ikualanyo akin mitsixnamiki? 14 Akin ilpitok ika cadena niman kikajkauaskej; yejua amo momikilis nion kalakis itech taltekoch, uan amo no kipolos pan. 15 Sayoj ke nejua Jiova nimoDios, akin kiajkotamota ueyiat uan ijkon kakistiskej olas, Jiova akin kinixyekana tateuianij yejua itokay. 16 Niktalis notajtoluan itech motenoj, uan ika iyekauil nomay nimitstsakuas, uan ijkon niktalis iluikak, uan niktalis tein kitsinpeualtis taltikpak uan nikiluis Sión, ‘Tejua tinoxolal.’ 17 ¡Xiijsa! ¡Xiijsa! Ximeua, Jerusalén, tejua akin titayini imako Jiova icopa tein kipia ikualanyo. Titayini icopa; titamitayik icopa tein se kimoujkaita. 18 Nion semej ikoneuan tein kipiak kiuikak, uan nion semej ikoneuan akin kiiskaltij kimajchanak. 19 Nejon ome taman mitspanok. ¿Akoni mitsiknelis? ¡Ixpoliuilis uan tajyouilis, mayanalis, uan neteuilis! ¿Akoni mitsyolseuis? 20 Mokoneuan ixtayouakej. Motekaj inakastan ojti kemej koujtajichkamej ijkuak kinmekauiaj. Yejuan pexontokej ika ikualanyo Jiova, ika itatsakuiltilis moDios.” 21 Xikaki nejin, ika kualtakayot, siuat akin titajyouijtok uan tiuintitok, sayoj ke amo ika vino. 22 Yejua nejin tein kijtoua moTeko Jiova, moDios akin kipaleuia ixolal: “¡Xikita! Nimitsmakuiliti copa tein se kimoujkaita, copa, tein kinextia kualanyot; amo kemanok titayis. 23 Niktaliti ininmako akin mitstajyouiltiaj, akin mitsiluianij: ‘Ximoixakateka uan ijkon uelis motech tinejnemiskej’, ijkon tikchiuak maj mopanko kemej yeskia tal, kemej ojti kampa papanouayaj.”
13-19 METSTI FEBRERO
TAMACHTILIS TEIN KIPIA BIBLIA | ISAÍAS 52-57
Tein moixtajtoltia itech Biblia
(Isaías 57:1-11) Akin yolkuali momikiliani, sayoj ke nion akin kitalia nejon itech iyolo. Uan takamej akin amo kikauaj Dios kinmiktianij, maski nion akin kiajsikamati keyej tajyouia akin yolkuali. 2 Yejua kalaki ika yolseuilis; moseuia kampa kochi, nochin akin melaujkanemij. 3 “Uan namejuan, xiualpankisakan, ikoneuan se siuat akin kitekitiltia naualot, ikoneuan se takat akin auilnemi uan se siuat akin auilnemi: 4 ¿Akoni ika timokejkeloua? ¿Akoni tiktapouilia motenoj uan tikixtilia monenepil? ¿Amo namejuan nantekoneuan nantajtakolchiuanij, nantekoneuan takajkayauanij, 5 akin auilnemij itampa koujmej tein uejueykej uan semi maxiujyoujkej, akin kinmiktiaj ininkoneuan kampa atauit, uan itampa tepejxit? 6 ”Iuan tet alaxtikej tein moajsij atauit ompa timoajsis. Yejua, yeski tein tikselis. Uan yejuan tikintoyauilij vino tein ika tikinueyichiuak, tikinmakak se netetayokolil. ¿Moneki maj nejin nechyolseui? 7 Itech se ueyi tepet tein uejkapan tikchijchiuak mocama. Ompa no tipankisak tiktemakato se netetayokolil. 8 Uan iikampa puerta uan inajnakastan tiktalij teisa tein mitselnamiktis. Tinechkauak uan timonextij uan peuak titejko; tikchiuak ueyi mocama. Uan tikchiuak se netenkaualis iniuan. Uan tiktasojtak inincama. Uan tikitak ininnakayo tein kipiaj takamej. 9 Uan peuak titemoua kampa Mélec ika aceite, uan ika miak tein ajuiyak. Uan tikintitanik uejka motanauatijkauan, ijkon nochi temok itech taltekoch. 10 Itech miak moojuan timochikauani. Amo tikijtouani: ‘¡Amo onkak nechialis!’. Oksepa tikajsik chikaualis. Yejua ika amo timosenkauani. 11 ”¿Akoni tikmouilij uan akoni peuak tikmoujkatoka, yejua ika peuak titakajkayaua? Nejua amo tinechelnamikik. Amo teyi tiktalij itech moyolo. ¿Amo teyi nikijtojtoya uan niktatijtoya tein panotoya? Uan nion nejua tinechmoujkatokak.
20-26 METSTI FEBRERO
TAMACHTILIS TEIN KIPIA BIBLIA | ISAÍAS 58-62
Tein moixtajtoltia itech Biblia
(Isaías 62:1-12) Niksentokas nitajtos porin niktajtouis Sión, uan nikchiuas tein kipaleuis Jerusalén hasta maj imelaujkayo petani ijkon kemej se tanex, uan maj inemakixtilis xota kemej se okot. 2 “Uan altepemej yekmelauj kiitaskej momelaujkayo, siuat, uan nochin tekiuanij moueyipanchiualis. Uan yekmelauj mitsnotsaskej ika se yankuik tokayit, tein itenoj Jiova kijtos. 3 Uan timochiuas se corona tein kualtsin imako Jiova, uan se kuailpika tein kiixnextia tanauatil itech imako moDios. 4 Amo kijtoskejok ke tejua se siuat akin senkis kikaujkej; uan amo kijtoskejok ke taseltijkan motalpan. Sayoj ke, tejua mitsnotsaskej: NoYolpakilis moajsi Iuan, uan motalpan: kitokaytiskej siuat akin namikej. Porin Jiova motech moyolpaktis, uan motalpan moaxkatiliskej kemej se siuat akin namikej. 5 Porin ijkon kemej se telpoch monamiktia iuan se ichpoch akin amo kiixmati takat, mokoneuan monamiktiskej mouan. Uan kemej yolpaki se novio porin kipia inovia, moDios yolpakis porin mitspia. 6 Itech tepamit tein mitsyoualoua, Jerusalén, nikintaliani tanejmachtianij. Nochi tonal uan nochi youal, moneki kisentokaskej tajtoskej. ”Namejuan, akin ika nantajtojtokej Jiova, xiksentokakan xitajtokan, 7 uan amo xikauakan maj moseui hasta maj senkis kiyektali Jerusalén, kemaj, hasta maj kichiua maj taltikpak kiueyitali.” 8 Jiova motenkauani ika iyekmay uan ika imay tein chikauak: “Yekmelauj amo nikinmakasok motrigo kemej takual akin mitstauelitaj, nion tayiskej analtekojkayomej movino tein yankuik, tein ika timotekitiliani. 9 Ta, akin kiololoskej kikuaskej, uan yekmelauj kiueyichiuaskej Jiova; uan akin kinechikoskej tayiskej itech nopatios tein yektik”. 10 Xipanokan, xipanokan kalampa itech puertas. Xikyektalikan ojti kampa panos xolal. Xikixmelauakan, xikixmelauakan patauak ojti. Xikajchiuakan tet. Xiktalikan se taman tein kiitaskej xolalmej. 11 ¡Xikita! Jiova kitematiltiani hasta kampa okachi uejka itech taltikpak: “Xikiluikan iichpoch Sión: ‘¡Xikita! Monemakixtilis yetok nouan. ¡Xikita! Netetayokolil moajsi iuan, uan taxtauil tein yejua kitemaka moajsi iixpan’”. 12 Uan kitokaytiskej xolal tein yektik, akin Jiova kiojpakakouak; uan mitsnotsaskej, se Xolal tein Amo Kikaujkej.
27 METSTI FEBRERO HASTA 5 METSTI MARZO
TAMACHTILIS TEIN KIPIA BIBLIA | ISAÍAS 63-66
Tein moixtajtoltia itech Biblia
(Isaías 63:1-10) ¿Akoni nejin akin ualeuak ompa Edom tein poui Bozrá, akin uitse ika itilmaj tein petani itapal, ika itaken tein kikualnextia, uan nejnemi ika iueyi chikaualis? “Nejua, akin nitajtoua ika melaujkayot, akin kipia miak chikaualis tein ika temakixtia.” 2 ¿Keyej chichiltik motilmaj, uan keyej moita kemej akin tatsojtsoniksak kampa kipatskaj uva? 3 “Niktsoniksak uva noselti, amo akin itech xolal moajsik nouan. Uan niksentokak nikintsoniksak itech nokualanyo, uan niksentokak nikintsojtsoniksak itech nokualanyo. Uan notilmaj kiajsik esti, uan nochi notilmaj mopitsotilij. 4 Porin tonal keman nimomakepas yetok itech noyolo, uan xiuit keman akin nikinojpakakouas ejkokya. 5 Uan niksentokak nikita, sayoj ke nion akin moajsia maj tapaleui; semi nimomoujtij maj amo akin kijtouani ke tapaleuiskia. Yejua ika nomay nechmakixtij, uan nokualanyo nechpaleuij. 6 Niksentokak chikauak nikintsojtsoniksa xolalmej itech nokualanyo, uan nikinuintij ika nokualanyo uan ininesyo toyauik talpan.” 7 Ika nitajtos iueyi netasojtalis Jiova tein amo tami, uejueyi taman tein Jiova kichiuani, nochi tein Jiova toka kichiuani, miak taman tein kuali tein ika kipaleuiani ichan Israel porin teiknelia uan porin ueyi inetasojtalis tein amo tami. 8 Uan yejua kijtoj: “Yekmelauj yejua noxolal, tekoneuan akin amo tekauaskej”. Yejua ika mochiuak inintemakixtijkauj. 9 Keman yejuan tajyouijtoyaj yejua no tajyouiaya. Uan akin kiteixmatiltiaya itanauatil kimakixtij. Ika inetasojtalis uan iteiknelilis yejua kinojpakakouak, uan kinajokuik uan kinuikak nochi ne uejkauj tonalmej. 10 Sayoj ke yejuan kiixnamikkej uan kichiujkej maj iyektikatsin iespíritu moyolkokouani. Axkan yejua peuak kintauelita; uan yejua peuak kinixnamiki.