Tein mokui keman tikitaj Tein timomachtiaj itech nechikol Tonemilis uan toTanojnotsalis
2-8 METSTI ENERO
TAMACHTILIS TEIN KIPIA BIBLIA | ISAÍAS 24-28
Tein moixtajtoltia itech Biblia
(Isaías 28:1-13) ¡Tetayokoltij ininueyi corona tauananij akin pouij Efraín, uan xochit uaktok tein ika mokualtsintilia tein moajsi itsontekon itech tamanis kampa tel taonkak akin kintanini tayil tein teuintij! 2 ¡Xikita! Jiova kipia aksa akin tel chikauak. Kemej se ueyi tetsaujkakiouit ika tesiuit tein tel kakisti, kiouaejekat tein taixpoloua, kemej se ueyi kiouaejekat tein tel kakisti, tein taapexontia, yejuatsin ika miak chikaualis kitamotas tani. 3 Kitsojtsoniksas ininueyi corona tauananij akin pouij Efraín. 4 Uan xochit uaktok tein ika mokualtsintilia tein moajsi itsontekon itech tamanis kampa tel taonkak moneki yeski kemej higo tein yoktsi achto ke peuas chikauak tonas, tein keman aksa kiita, kitoloua niman ke kipia imako. 5 Itech nejon tonal, Jiova akin kinixyekana tateuianij mochiuas kemej se corona tein kinextia ueyipanchiualis uan kemej se corona tachijchiuj ika xochit tein kinkualtsintilia akin mokauaj itech ixolal, 6 uan kemej espíritu tein tamelaua akin motalia kampa tamelauaj, uan kemej se ueyi chikaualis akin kitsakuiliaj tateuilis itech puerta. 7 Uan yejuan no, porin tayij tein teuintij youij itech se ojti tein amo kuali. Tiopixkat uan tanauatijkej... yanij itech se ojti tein amo kuali porin tayij tein teuintij, moixpolouanij porin uintitokej, senkis yanij kampa amo kuali porin tel tayij; amo kiitaj kani youij, amo uelij taixejekouaj. 8 Porin nochin mijsotanij itech mesas uan senkis motapitsotiliani... nochi toyaujtok. 9 ¿Akoni se kimachtis tamatilis uan akoni se kiajsikamatiltis tein mokakini? ¿Akin amo kinmakajok leche, akin amo kinchichitiajok? 10 Porin “tanauatil itech tanauatil, tanauatil itech tanauatil, tamachiuj itech tamachiuj, tamachiuj itech tamachiuj, tepitsin nikan, tepitsin nepa”. 11 Porin inintenkopa akin amo ueli yektajtouaj uan ika okse taman tajtol yejua kinnojnotsas nejin xolal. 12 Yejua kiniluiani: “Nikan uelis nanmoseuiskej. Xikauakan maj moseui akin tel sioujtok. Nikan uelis nanmoyolseuiskej”, sayoj ke yejuan amo kinekkej takakiskej. 13 Uan yejuan, itajtol Jiova yeski: “Tanauatil itech tanauatil, tanauatil itech tanauatil, tamachiuj itech tamachiuj, tamachiuj itech tamachiuj, tepitsin nikan, tepitsin nepa”, uan ijkon keman nejnemiskej, yejuan mometsmekaniaj uan uetsij uan mopostekij uan kinkitskiaj.
9-15 METSTI ENERO
TAMACHTILIS TEIN KIPIA BIBLIA | ISAÍAS 29-33
Tein moixtajtoltia itech Biblia
(Isaías 30:22-33) Uan namejuan nankipitsotiliskej tein kipiaj ipanian namotiotsitsin tein chijchiujtokej ika plata uan ipanian tein chijchiujtok ika oro. Tikintamotas ijkon kemej se siuat kitamota tilmaj tein kikui ijkuak esmeya uan tikiniluis: “¡Xiakan!”. 23 Uan yejua yekmelauj kiualkuis kiouit tein kipaleuis tatet tein tiktoka talpan, uan, pan tein kitemaka tal yeski tel miak uan uelik. Itech nejon tonal motapialuan kikuaskej sakat itech ixtauat kampa taueyikan. 24 Uan kuakuejmej uan asnos tein uejueykej tein kinkuij ijkuak tameuaj kikuaskej xiuit tein uakik iuan sakat tein kiuelililtiaj ika acedera xiuit, tein kiajkopixouaj ika pala uan ika bieldo. 25 Uan itech nochi tepemej tein uejueykej ikuapan moneki onkas ameyalmej, kampa motalos at, itech tonal keman momijmiktiskej ijkuak uetsiskej uejueyi kalikximej. 26 Uan itanex chikauak metsti yeski kemej itanex tonaltsin tein semi petani; uan itanex tonaltsin yeski chikojpa okachi chikauak, kemej itanex chikome tonalmej, itech tonal keman Jiova kipajtis kampa takokol ixolal uan kipajtis ueyi takokol tein mochiuak keman kintatsakuiltij. 27 ¡Xikita! Itokay Jiova uejka ualeujtok, ika ueyi kualanyot uan ika mixti tein etikej. Uan itenoj, senkis kitematiltia tatsakuiltilis, uan inenepil kemej yeskia tit tein nochi kitamia. 28 Uan iespíritu kemej ueyiat tein ajsi hasta itech se ikechko, uan kintsetselos altepemej keman kinixpolos; uan altepemej kipiaskej se tepos itech ininkamako tein kinuika itech se amo kuali ojti. 29 Namejuan nankipiaskej se tatsotson kemej tein mokuikatiaj youak keman mochipauaj porin mochiuati se iluit, uan tiyolpakis kemej aksa akin nejnemi ika se flauta keman pankisa itech tepet tein iaxka Jiova, iTepetat Israel. 30 Uan Jiova kichiuas maj mokaki iueyi tajtol uan kinextis imay ijkon kemej kiualkui kualanyot, uan tit tein nochi kitamia uan se kiouaejekat ijkuak tapepetani uan tesiuit tein uejueyi kemej tet. 31 Ika itajtol Jiova, Asiria senkis momoujtis; yejua kiuijuitekis ika se takot. 32 Uan keman Jiova kiuitekis Asiria ika itakouj tein ika kitatsakuiltis yekmelauj mokakis panderetas uan arpas; ijkon kemej kiteuis ika imay itech neteuilis. 33 Porin ininTófet moyektalijya; no kiyektalilijkejya tekiuaj. Yejua kinepanouani miak kouit kampa uejkatan uan patauak. Ika tel miak tit uan kouit. Iijiyo Jiova, kemej miak azufre, kichichinos.
16-22 METSTI ENERO
TAMACHTILIS TEIN KIPIA BIBLIA | ISAÍAS 34-37
Tein moixtajtoltia itech Biblia
(Isaías 36:1-12) Itech xiuit catorce keman Ezequías tekiuajtia, Senaquerib akin tekiuajtia Asiria pankisak kinteuito xolalmej tein pouiaj Judá tein kinyoualouaya tepamit uan peuak moaxkatilia. 2 Ompa tekiuaj asirio kititanik Rabsaqué iniuan miak tateuianij akin moajsiaj Lakís maj kiitati tekiuaj Ezequías ompa Jerusalén. Yejuan motsakuilijkej kampa kisentiliaj at, itech ojti kampa tapakaj. 3 Ompa kinamikitoj Eliaquim ikoneuj Hilquías, akin kiixyekana kaltekiuaj, uan tajkuilojkej Sebná, uan Joah ikoneuj Asaf akin kiamataliaya nochi. 4 Ompa, Rabsaqué kiniluij: “Ika kualtakayot, xikiluikan Ezequías: ‘Yejua nejin tein kijtoua tekiuaj, ueyi tekiuaj asirio: “¿Itech toni titakuaujtamati? 5 Tikijtoua: ‘Nikmati keniuj nitateuis uan nikpia chikaualis’ sayoj ke nenkaj motajtol. ¿Akoni iuan titakuaujtamati, yejua ika timoixeuia tinechixnamikis? 6 ¡Xikita! Titakuaujtamati itech nejin akat tein xamaktik, Egipto, komo se takat iuan mopaleuia, yekmelauj kimakokoskia uan kimakoyoniskia. Ijkon mochiua Faraón akin tekiuajti Egipto iniuan nochin akin itech takuaujtamatij. 7 Uan komo tinechiluia: ‘Tejuan titakuaujtamatij iuan Jiova toDios’, ¿amo yejua ne akin tepekuapan kampa taueyichiuayaj uan altares Ezequías kinajchiuak uan kiluia Judá uan Jerusalén: ‘Itech nejin altar moneki nanmoixpiloskej?”’. 8 Axkan, ika kualtakayot, ximotatani iuan noteko tekiuaj asirio, nimitsmakas ome mil caballos, uan tikitaskej ox uelis tikinajsis akin ininpanko yaskej. 9 ¿Keniuj ueliskia tikchiuas maj mitsmouili se taixyekankej tein amo semi ueyichiujkej tein kipia noteko, keman tejua, titakuaujtamati iuan Egipto porin kipia carros uan takamej tein kikuij caballos? 10 Uan axkan, ¿amo nechnauatij Jiova maj nikixpoloki nejin xolal? Yejua Jiova nechiluij: ‘Xipankisa itech nejin xolal, uan xikixpolo’”. 11 Ijkuak, Eliaquim uan Sebná uan Joah kiluijkej Rabsaqué: “Xitajto, ika kualtakayot, iniuan motekitikauan ika tajtol arameo, porin timitsajsikamatij; amo ika tajtol hebreo porin kikakiskej akin moajsij ajko itech tepamit”. 12 Sayoj ke Rabsaqué kijtoj: “¿Nechtitanik noteko maj sayoj nikiluiki moteko uan tejua nejin tajtolmej? ¿Amo no nechtitanik maj nikiniluiki akin moajsij tepankuako akin kikuaskej ininkuit uan tayiskej ininaxix namouan?”.
23-29 METSTI ENERO
TAMACHTILIS TEIN KIPIA BIBLIA | ISAÍAS 38-42
Tein moixtajtoltia itech Biblia
(Isaías 40:6-17) ¡Xikaki! Aksa kijtojtok: “¡Xitsajtsi!”. Uan okse tajtanik: “¿Toni chikauak niktematiltis?”. “Nochin taltikpakneminij kemej xiuit xoxoktik, uan nochi netasojtalis tein amo tami kemej xochit tein moajsi ixtauat. 7 Xiuit xoxoktik uaki, xochit kuetaui, porin iespíritu Jiova kipitsa. Tein melauj taltikpakneminij sayoj xiuit xoxoktik. 8 Xoxoktik xiuit uaki, xochit kuetaui; sayoj ke itajtol toDios uejkaua nochipaya.” 9 Xipankisa itech se ueyi tepet, siuat akin tikualkuilia kuali tanauatilmej Sión. Chikauak xitajto, siuat akin tikualkuilia kuali tanauatilmej Jerusalén. Chikauak, amo ximoui. Xikinilui xolalmej tein pouij Judá: “Nikan yetok namoDios”. 10 ¡Xikita! ToTajtsin Jiova akin okachi Ueyichiujkej ualas ika ueyi chikaualis, uan imay taixyekanas. ¡Xikita! Inetetayokolil yetok iuan, uan taxtauil tein yejua kitemaka moajsi iixpan. 11 Kemej ichkatajpixkej kinyekpias iichkauan. Ika imay kinnechikos ichkamej; uan iyolixko kinuikas. Kinyekanas ika nejmachkayot ichkatenamej tein tatamakatokej. 12 ¿Akoni kitamachiuani at ika imay, uan kitamachiuani iluikak ika imay, uan ika se tamachiuj talnex tein kipia taltikpak, uan kitamachiua ietiyo tepemej itech se balanza? 13 ¿Akoni kitamachiuani chikaujkayot tein kipia iespíritu Jiova, uan akoni uelis kiyolmajxitis kemej se itamachtijkauj? 14 ¿Akoni kitajtania maj kipaleui maj taajsikamati, oso akoni kimachtia maj nejnemi itech ojti tein melauak, oso kimachtia tamatilis, oso kinextilia ojti tein teuika itech yekmelauj taajsikamatilis? 15 ¡Xikita! Altepemej tamatij kemej sentachalan at itech se atakuiloni; uan kemej kanauak talnex itech balanza kintamachiuaj. ¡Xikita! Talmej tein moajsij atatajkoyampa yejuatsin kinajokui kemej talnexpokti. 16 Hasta koujmej tein kipia Líbano amo kichiua maj kisentoka xotato tit, uan koujtajtapialmej tein ompa nemij amo ajsij ijkuak kitemakaj tapialmej tachichinolmej. 17 Nochi altepemej kemej yeskia amo yetoskiaj iixpan; kinita ke nion teyi chiuanimej, kemej nion teyi yeskiaj.
30 METSTI ENERO HASTA 5 METSTI FEBRERO
TAMACHTILIS TEIN KIPIA BIBLIA | ISAÍAS 43-46
Tein moixtajtoltia itech Biblia
(Isaías 46:1-13) Bel moixpiloua, Nebo uetsi. Inintiotsitsin mochiuanij inintamamal tapialmej, tapialmej tein tamamaj, kemej tamamal tein semi etik tein kiuikaj tapialmej tein sioujtokej. 2 Yejuan moixpilouaj uan mokelpachouaj; amo uelij kichiuaj maj amo semi etik tamamal, uan yejuan kintsakuatij okseko. 3 “Xinechkakikan, ichan Jacob, uan nochin akin nanmokauaj itech ichan Israel, namejuan akin namechpaleuiani ijkuak nanyolkej uan keman ayamo nanyoliaj. 4 Hasta keman tiueuentsintias nejua amo nimopatas; hasta keman tikuapochinias nejua niksentokas nimitspaleuis. Nejua nikchiuas, uan nimitsuikas uan nimitsmakixtis. 5 ”¿Akoni iuan nankijtoskej ke nitamati, oso nanechitaskej kemej yejua uan ijkon tiixtamatiskej se iuan okse? 6 Moajsij akin kikixtiaj miak oro itech ininmorral, uan kitamachiuaj plata itech balanza. Kitakeuaj se akin tekiti ika teposmej uan ika kichijchiua se tiotsin. Ompa motankuaketsaj, kemaj, kiueyichiuaj. 7 Kiuikaj ininajkoltipan, kiuikaj uan kitaliaj kampa kitachijchiuilijkej, uan amo moolinia. Kampa moajsi amo moolinia. Kinotsaj uan amo tanankilia; akin tajyouijtok amo ueli kipaleuia. 8 ”Xikelnamikikan, uan ijkon nanmoyolchikauaskej. Xiktalikan itech nanmoyolo, tajtakolchiuanij. 9 Xikelnamikikan tein ne uejkauj mochiuak, ke nejua niDios uan amo moajsi okse. Nejua niDios, uan amo moajsi okse kemej nejua. 10 Akin achtook kitematiltia keniuj tamis teisa tein peua, uan tel achtook kitematiltia tein ayamo mochiuani. Akin kijtoua: “Notayolmajxitilis nochipa yetos, uan nikchiuas nochi tein nechyolpaktia”. 11 Akin kampa kisa tonaltsin kinotsa se totot tein mopankajkaua keman kikitskia itakual; itech se uejka altepet kinotsa takat akin kichiuas tein nikixtalijtok. Nikijtojya uan nikchiuas. Nikixtalijya uan no ijkon nikchiuas. 12 ”Xinechkakikan, namejuan akin nanyoltakuaujkej, namejuan akin uejka nanmoajsij itech melaujkayot. 13 Niktokiani nomelaujkayo; amo uejka yetok, uan nemakixtilis amo uejka yetok. Uan yekmelauj nitamakixtis itech Sión; Israel, nokualtsinyo.”