Dios mitsyoleua ximochiua xiitasojikniuj

Dios kineki ximochiua xiitasojikniuj. ¿Tikmatia ika uelis timochiuas tiitasojikniuj tein okachi Ueyichiujkej itech iluikak uan taltikpak? Ne uejkauj nemik Abraham, kitokaytijkej itasojikniuj Dios (Santiago 2:23). Itech Biblia kijtoua ika sekin takamej uan siuamej no mochiujkej itasojikniuan Dios uan kiselijkej uejueyi tatiochiualismej. Axkan tonalmej, miakej taltikpakneminij semanauak taltikpak mochiujtokej itasojikniuan Dios. Uan tej no uelis timochiuas tiitasojikniuj Dios.

Okachi kuali tikpias Dios kemej motasojikniuj uan amo tikpias kemej motasojikniuj se taltikpaknenkej. Dios amo keman kinkaua itasojikniuan tein amo kikauaj (Hebreos 13:5). Okachi kuali maj timochiuakan tiitasojikniuan Dios uan amo maj tikpiakan miak tomin oso talmej. Keman mikij tein kitelpiaj tomin oso talmej, oksekin taltikpakneminij mokauaj ika nochi nejon. Sayoj ika itasojikniuan Dios kipiaj se teisa tein kitelpia ipatiuj uan amo akin uelis kinkuilis (Mateo 6:19).

Acha yetoskej aksamej tein amo kinekiskej xiksentoka ximomachti tein Dios tamachtia. Uelis kichiuaskej motasojikniuan oso mokalyetouanij (Mateo 10:36, 37). Komo aksa mitskejkeloua oso mitstemojmoujtia, ximotajtani: «¿Akoni nikneki nikyolpaktis, taltikpakneminij oso Dios?». Sayoj ximonemili: komo aksa mitsiluiskia amo xitakuaok, ¿tikchiuaskia? Amo. Moneki titakuaskej uan ijkon uelis tinemiskej. No ijkon, Dios uelis kichiuas xinemi nochipaya. Yejika, xiksentoka ximomachti keniuj uelis timochiuas tiitasojikniuj Dios, uan amo xikaua maj aksa mitstsakuili (Juan 17:3).