Tein mokui keman tikitaj Tein timomachtiaj itech nechikol Tonemilis uan toTanojnotsalis
1-7 METSTI ABRIL
TAMACHTILIS TEIN KIPIA BIBLIA | 1 CORINTIOS 7-9
“Keman amo se monamiktia, se netetayokolil”
w11 15/1 pág. 18 § 3
¿Keniuj uelis kikuiskej ininchikaualis akin amo monamiktiaj?
3 Nesi ke akin amo monamiktiaj okachi ueli kichiuaj miak taman, kemej tanojnotsaskej, mouikaskej iniuan oksekin uan okachi motokiskej iuan Jiova (1 Cor. 7:32-35). Yejua ika, miakej tokniuan kiixtaliaj amo monamiktiskej. Oksekin kemaj kiixtalijtoyaj monamiktiskej. Sayoj ke, keman kipanokej seki taman, kitataujtijkej Jiova, kuali kinemilijkej tein kinekiaj uan kiajsikamatkej ke Jiova kinpaleuiskia maj amo momachilikan ininselti. Yejua ika, senkis kiixtaliaj kisentokaskej ininselti (1 Cor. 7:37, 38).
w08 15/7 pág. 27 § 1
Tein moixtajtoltia itech amatajkuilolmej Corintios
7:33, 34. ¿Toni “ten ongak nikan taltikpak” okachi ika motekipachouaj tokniuan namikuanij? Amo kijtosneki nochi tein amo kuali tein moneki amo tikchiuaskej, ta kijtosneki nochi tein namikuanij ika moneki moixpanoltiskej, kemej tein kikuaskej, tein motakentiskej oso kani nemiskej (1 Juan 2:15-17).
w96 15/10 pág. 12 § 14
Akin ininselti: Okachi ueli kitekitiliaj Jiova
14 Komo tokniuj akin amo monamiktia kitayekanaltia itanejnekilis okachi amo “kuali kichiuas” ke akin monamiktia, porin amo kitayekanaltia iTekiuajyo Dios, ta kitayekanaltia okseki taman (Mateo 19:12). Akin amo monamiktia moneki tanemilis “sayo tech itekiu den Totekotsin, uan yejua no ojkachi ok kitemoa keniu kipaktijtiyas” uan ‘kachi ok kitekitilijtiyouj Totekotsin uan maj amo teyi tensa kitakaualtitiuj’. Nejin kijtosneki ke moneki okachi kitekitilis Jiova uan Jesucristo. Ijkon, tokniuan akin amo monamiktiaj okachi kuali kichiuaskej ke akin monamiktiaj.
Maj tiktemokan tamachtilis ika nejmachkayot
¿Toni kiniluia Biblia namikuanij tein kitsayanaj amat imin ixpan tekiuanij oso mokakauaj?
Uan no, namikuanij uelis kipanoskej seki taman tein tel panouaya ouij, uan akin kichiua kemej Cristo kinemilis kikauas oso hasta kitsayanas amat imin ixpan tekiuanij maski amo auilnemi inamik. Keman mochiuas nejon, Biblia kijtoua ke akin kinemilis yas, “maj amo monamikti iuan okse tagat, oso maj oksepa moyoltali uan maj sen yetinemiti iuan” (1 Corintios 7:11). Kemaj, akin kichiua nejon, amo uelis peuas kiixmatis okse aksa uan kinemilis monamiktis iuan (Mateo 5:32). Maj tikitakan seki taman tein tel panouaya ouij kipanouaj namikuanij tein kiniuika maj mokakauakan.
Nion tepitsin kineki kintekipanos ichankauan. Miakej tetakauan amo kintekipanouaj imin chankauan, amo porin amo uelij ta porin amo kinekij, uan nejon kiniuika maj tajyouikan. ¿Toni kiniluia Biblia? “Aksa taneltokakej ten amo kinixpanoltijtiuj ichankauan [...], yejua ne kisekokauak ya ne takuaujtamatilis [...]. Uan kachi ok yejua kimajpeuaskia in Tajtoltsin de Dios, [...] [ke] nekes ten amo taneltokanij.” (1 Timoteo 5:8.) Komo tetakauj nion tepitsin kineki mopatas, tenamik monekis kinemilis ox monekis maj mokauakan imin ixpan tekiuanij, uan ijkon uelis kinpaleuis maj kuali yetokan ikoneuan uan yejua. Axkan, keman kiteluiliskej tetakauj tein momachtia ke amo kineki tatekipanos, tayekananij kuali kiitaskej nejon kuejmol, ta nejon uelis kiuikas maj kikalankixtikan itech nechikol.
Kitelteuia. Se tenamik tein peua tel tateuia uelis kikokos inamik oso kimiktis. Komo tenamik tein tateuia se itaixpantijkauj Jiova, tayekananij moneki kiitaskej nejon kuejmol. Ta akin tel eliuis kualani uan tateuia, uelis kiuikas maj kikalankixtikan itech nechikol (Gálatas 5:19-21).
Tel ouij kikisa maj kiueyichiua Dios. Moajsij tenamikuan tein kitemouaj keniuj kichiuaskej maj imin namik amo kitekitilikan Jiova, oso kiyejyekouaj kinchikaujkauiskej maj kitapanauilikan itanauatiluan Dios. Keman ijkon panos, tenamik tein kitekitilia Dios moneki kiitas ox monekis maj mokakauakan, uan ijkon uelis ‘kitakamatis Totajtsin Dios uan amo tagayot’ (Hechos 5:29).
Toni moneki tikchiuaskej achto ke timonamiktiskej
6 Moneki se yekyolmajsitos uan ijkon uelis se kichiuas nejon tein se motenkaua. Yejua ika, Pablo kinyolmajxitia akin kichiuaj kemej Cristo ke okachi kuali maj amo monamiktikan keman semi telpochmej oso semi ichpochmejok, porin itech nejon xiujmej okachi kinejnekij motekaskej iuan aksa uan nejon uelis kichiuas maj amo kuali taixejekokan (1 Corintios 7:36). Telpochmej uan ichpochmej ijsiujka mopata inintanemilil ijkon kemej moskaltijtiyouij. Miakej akin monamiktiaj keman semi telpochmej oso semi ichpochmejok kiitaj ke tein kinpoloua uan tein kinejnekij yejuan uan ininnamik mopata satepan ke panouaj seki xiujmej. Tein miakkan mochiua kiyeknextia ke akin monamiktiaj keman semi telpochmej oso semi ichpochmejok uelis okachi amo kipiaskej yolpakilis uan kitsayanaskej amat ininixpan tekiuanij ke akin monamiktiaj satepan. Yejua ika maj amo timoijsiuilikan. Tein tikpanoskej toselti ijkon kemej timoskaltiskej uelis techpaleuis keman tikpiaskejya tonamik maj tikmatikan okseki taman tein kichiuas maj tikpiakan kuali taixejekolis uan maj okachi tikmatikan tikchiuaskej tein moneki. No uelis techpaleuis maj okachi kuali timoixmatikan tejuan, ta nejon se taman tein tel tapaleuia maj kuali timouikakan iuan tonamik.
8-14 METSTI ABRIL
TAMACHTILIS TEIN KIPIA BIBLIA | 1 CORINTIOS 10-13
“Jiova amo tekaua”
Tein tajtanij akin taixtajtoltiaj
Tatitanil Pablo kijkuiloj ke Jiova amo kikauas maj tikpiakan tayejyekolis okachiok ke tein uelis tikxikoskej (1 Cor. 10:13, TNM). ¿Kijtosneki nejin ke Jiova achto kiita hasta kani uelis titaxikoskej uan satepan kiixpejpena ouijkayomej tein tikpanoskej?
▪ Komo tanankilil yeskia kemaj, ¿keniuj techijtakoskia? Maj tikitakan se neskayot. Ikonetsin se tokniuj takat momiktij. Peuak motajtania ox Jiova kimattoyaya tein panoskia uan ox kiixtalijkaya ke yejua uan inamik kixikoskiaj nejon ouijkayot. Tetayokoltij tikijtoskej ke itech nejin tonalmej timiakej tikpanoskej uejueyi ouijkayomej. Sayoj ke ¿moneki tiknemiliskej ke Jiova kichiua maj techpano oso maj amo techpano seki taman?
Komo tikitaj tein kijtoua 1 Corintios 10:13, tikajsikamatiskej ke Biblia amo tamachtia ke Jiova achto kiita hasta kani uelis titaxikoskej uan satepan kiixpejpena toni ouijkayomej tikpanoskej. Maj tikitakan naui taman keyej ijkon tikijtouaj.
Yekinika, Jiova techkaua maj toselti taixpejpenakan. Yejuatsin kineki maj tikixpejpenakan toni tikchiuaskej (Deut. 30:19, 20; Jos. 24:15). Komo tikixpejpenaj tein kiyolpaktia, uelis titakuaujtamatiskej ke yejuatsin techixyekanas (Prov. 16:9). Sayoj ke komo amo kuali titaixpejpenaj, titajyouiskej (Gál. 6:7). Komo Jiova kiixpejpenaskia ouijkayomej tein monekis tikxikoskej, ¿tikijtoskiaj ke yekmelauj toselti titaixpejpenaj?
Ojpatika, Jiova amo techmatampauia keman panoua “tachiualis tein amo momattok” (Ecl. 9:11). Aksa uelis kipanos se taman tein amo kuali porin moajsia kampa mochiuak teisa tein amo momattoya. Jesús ika tajtoj keman momikilijkej 18 taltikpakneminij porin kinpechij se ueyi tepamit. Yejua senkis kinextij ke Dios amo kichiujka maj momikilianij (Luc. 13:1-5). Amo taixejekol se kinemilis ke achto ke panos se taman tein amo kuali Dios kiixpejpena akoni nemis oso akoni momikilis.
Expatika, tisejsemej moneki tiknextiskej ke amo tikauaskej Jiova. Satanás kijtoj ke sayoj tiktekitiliaj Jiova porin techmaka miak taman uan ke tikauaskej komo tikpanouaj ouijkayomej (Job 1:9-11; 2:4; Apoc. 12:10). Komo Jiova techmatampauiskia keman tikpanoskej seki taman ouijkayomej, ueliskia moitas ke melauak tein Satanás kijtoj.
Naujpatika, Jiova kiixpejpena amo kimatis nochi tein techpanos satepan. Melauak ke komo yejuatsin kineki, uelis kimatis toni panos satepan (Is. 46:10). Sayoj ke Biblia kijtoua ke onkak seki taman tein Jiova kiixpejpena amo kimatis (Gén. 18:20, 21; 22:12). ¿Keyej? Porin yejuatsin tetasojtakej uan melauak, uan kipoujkaita maj toselti tiuelikan titaixpejpenakan (Deut. 32:4; 2 Cor. 3:17).
Komo ijkon, ¿toni kijtosnekia Pablo keman kijtoj ke Jiova amo kikauas maj tikpiakan tayejyekolismej okachiok ke tein uelis tikxikoskej? Pablo kijtosnekia keniuj techpaleuia Jiova keman tikpanotokej ouijkayomej, amo tein kichiua achto ke tikpanoskej. Komo titakuaujtamatij iuan Jiova, yejuatsin techpaleuis maj tikxikokan tein yeski ouijkayot (Sal. 55:22). Maj tikitakan axkan ome taman keyej Pablo uelik kijtoj ke Dios amo kikauas maj tikpiakan tayejyekolismej okachiok ke tein uelis tikxikoskej.
Yekinika, porin tein yeski ouijkayot tein tikpiaskej, “ipa kipanouaj taltikpakneminij”. Nejin kijtosneki ke ouijkayomej ipa se kipanoua itech nejin taltikpak kampa taixyekantok Satanás. Sayoj ke komo titakuaujtamatij iuan Jiova, uelis tikxikoskej tayejyekolismej uan amo tikauaskej (1 Ped. 5:8, 9). Itech seki tajkuilolmej achto ke tiajsiskej itech 1 Corintios 10:13, Pablo kijtoua seki tayejyekolismej tein kipanokej israelitas keman yetoyaj taluakyan (1 Cor. 10:6-11). Israelitas akin takuaujtamatkej iuan Jiova uelik taxikojkej. Sayoj ke akin amo iuan takuaujtamatkej amo kitakamatkej uan kikaujkej.
Ojpatika, porin “Dios amo tekaua”. ¿Toni kijtosneki nejin? Komo itech titanemiliaj keniuj Jiova nochipa kinyekpiani itekitikauan, tikitaskej ke yejuatsin amo tekaua uan ke kinpaleuia “akin kitasojtaj” uan “kitakamatij itanauatiluan” (Deut. 7:9). Uan no, Jiova nochipa kichiua tein motenkaua (Jos. 23:14). Yejua ika uelis tikyekmatiskej ome taman. Yekinika, ke Jiova amo kikauas maj se tayejyekolis mochiua tel ouij kemej amo uelis tikxikoskej. Uan ojpatika, ke yejuatsin ‘kitalis keniuj tikisaskej’.
¿Keniuj Dios ‘kitalia keniuj tikisaskej’ akin iuan titakuaujtamatij? Melauak ke yejuatsin uelis techijkuanilis ouijkayomej. Sayoj ke Pablo kijtoj ke Jiova ‘kitalia keniuj tikisaskej’ tein techpaleuis maj uelis titaxikokan. Nejin techmachtia ke miakpa Jiova techtalilia keniuj tikisaskej keman techmaka chikaualis tein techpaleuia ika miak taman maj tiksentokakan tiktakamatikan. Maj tikitakan seki.
▪ Jiova “techyolseuia itech nochi totayejyekolis” (2 Cor. 1:3, 4, TNM). Yejuatsin techyolseuia ika Biblia, iyektikatsin espíritu uan takeual takuaujtamach uan tamatkej (Mat. 24:45; Juan 14:16; Rom. 15:4).
▪ Jiova uelis techixyekanas ika iyektikatsin espíritu (Juan 14:26). Yektikatsin espíritu uelis techpaleuis maj tikelnamikikan tein panok ne uejkauj uan tayolmajxitilis tein kitemaka Biblia tein techpaleuis maj kuali titaixpejpenakan.
▪ Jiova uelis techpaleuis ika ángeles (Heb. 1:14).
▪ Jiova uelis kichiuas maj tokniuan techpaleuikan. Yejuan uelis techyolchikauaskej keman toka kichiuaskej teisa oso ika inintajtoluan (Col. 4:11).
¿Toni techmachtia tein kijtoj Pablo itech 1 Corintios 10:13? Ke Jiova amo kiixpejpena ouijkayomej tein tikpanoskej. Uan ke komo iuan titakuaujtamatij, tikxikoskej tein yeski ouijkayot. Jiova nochipa kitalis keniuj tikisaskej uan ijkon amo keman tikauaskej.
Maj tiktemokan tamachtilis ika nejmachkayot
w04 1/4 pág. 29
Tein tajtanij akin taixtajtoltiaj
¿Keyej moijtoua itech 1 Corintios 10:8 ke itech se tonal momikilijkej 23,000 israelitas porin auilnenkej sayoj ke itech Números 25:9 moijtoua ke momikilijkej 24,000?
Onkak miak taman tein uelis kichiuas maj mopata tein kijtouaj nejin ome versículos. Se, yejua ke xa momikilijkej kemej 23,000 hasta 24,000, uan yejua ika senkis moijtoj kanachimej.
Okse yejua tein kijtoj tatitanil Pablo. Akin nemiaj Corinto, semi auilnemiaj. Yejua ika kinnejmachtij tokniuan ika tein kinpanok israelitas ompa Sitim. Yejua kijkuiloj: “Ma amo se auilnentinemi iuan oksekin namikuani keme kichiutinenke ne touejkautatuan. Uan ika porin ninauilnemilis Dios kintatsakuiltij. Uan yejuan momikilijke sempoal uan eyi mil tagayot tech se tonal san”. Pablo sayoj ininka tajtoj akin Jiova kinixpoloj porin auilnenkej, uan kijtoj ke katkaj 23,000 (1 Corintios 10:8).
Sayoj ke, itech Números capítulo 25, moijtoua ke “Israel mosentilij itech itaueyichiualis Baal tein moajsia itech tepet Peor, uan Jiova tel kualanik iuan Israel”. Satepan moijtoua ke Jiova kinauatij Moisés maj kinmiktiani ‘nochin akin kinixyekanayaj israelitas’. Ompa, Moisés kinnauatij tamelauanij maj kichiuanij nejon. Satepan, “inintatsakuiltilis israelitas motsakuilij” keman Finehás ika yolchikaualis kimiktij se israelita akin kiuikaka se siuat kayot Madián itech xolal. Satepan, moijtoua: “Nochin akin momikilijkej itech tatsakuiltilis katkaj 24,000” (Números 25:1-9).
Nesi ke itech amatajkuilol Números no ininka motajtoua ‘akin kinixyekanayaj israelitas’ akin tamelauanij kinmiktijkej, uan no israelitas akin Jiova kinmiktij. Tamelauanij xa kinmiktijkej kemej mil taixyekananij uan yejua ika xa ajsik 24,000 akin momikilijkej. Nejon taixyekananij no kichiujkej tein amo kuali, porin ‘mosentilijkej itech itaueyichiualis Baal tein moajsia itech tepet Peor’ xa porin auilnenkej, kiiluichiuilijkej oso porin kinkaujkej israelitas maj kichiuanij nejon.
Se amatajkuilol kijtoua ke tajtol “mosentilij” xa kijtosneki “se mouikas iuan aksa”. Israelitas katkaj iaxkauan Jiova, sayoj ke amo kiueyichiujkejok porin ‘mosentilijkej itech itaueyichiualis Baal tein moajsia itech tepet Peor’. Kemej setecientos xiujmej satepan, Dios kinauatij tanauatijkej Oseas maj kiniluiani israelitas: “Yejuan yajkej iuan Baal tein moajsia itech tepet Peor; yejuan motemaktijkej kichiuaskej nejin taman tein tepinaujtij, uan peuak tetajyaltiaj ika nejon taman tein kitasojtayaj” (Oseas 9:10). Nochin akin ijkon kichiujkej monekia maj Dios senkis kintatsakuiltiani. Yejua nejon tein Moisés kiniluij israelitas. Yejua kijtoj: “Nanmoixtololouan kiitakej tein Jiova kichiuak ika tein panok iuan Baal tein moajsia itech tepet Peor; Jiova moDios kiixpoloj motech akin yeski takat akin kitojtokak Baal tein moajsia itech tepet Peor” (Deuteronomio 4:3).
Tein tajtanij akin taixtajtoltiaj
¿Moneki se tokniuj siuat mokuapikis keman kitemaka se nemachtil ika Biblia iixpan se tokniuj takat tanojnotskej?
▪ Itech tamachtilis “Preguntas de los lectores” tein kisak itech amaix La Atalaya 15 de julio de 2002, moijtoj ke se tokniuj siuat monekia mokuapikis keman tamachtiskia iuan se tokniuj takat tanojnotskej maski ayamo moauiaya. Sayoj ke, keman tiktemojkej okachi tikmatiskej nejin taman, tikitakej ke moneki tikpataskej nejon tein achto moijtojka.
Se tokniuj siuat moneki mokuapikis keman tamachtis iuan se tokniuj takat tanojnotskej akin moauijya. ¿Keyej? Nejon tekit sayoj moneki kichiuas se takat. Sayoj ke, keman tokniuj siuat mokuapiki kinextia ke kipoujkaita kemej Dios kiixtalijtok maj motaixyekana itech nechikol (1 Cor. 11:5, 6, 10). Tokniuj siuat no uelis kiluis tokniuj takat maj yejua tamachti komo kiita ke uelis kichiuas.
Sayoj ke, komo tokniuj siuat tamachtiti iuan se tokniuj takat akin ayamo moauia uan akin amo inamik, itech Biblia amo moijtoua ke moneki mokuapikis. Sayoj ke, seki tokniuan siuamej xa kinekiskej mokuapikiskej porin ijkon amo kinkuejmolos inintanemilil.
22-28 METSTI ABRIL
TAMACHTILIS TEIN KIPIA BIBLIA | 1 CORINTIOS 14-16
“Dios ‘tayekantinemis ipan nochi ten ongak’”
Tein kichiuaniya Tekiuajyot itech yekinika cien xiujmej
15 Keman Tekiuaj Mesías kinixpolosya akin kitauelitaj Dios nikan taltikpak, kinpankajkauas Satanás uan iamokuali ejekauan itech se ueyi taltekoch kampa yetoskej mil xiujmej (Apoc. 20:1-3). Keman kinijkuaniskej, Tekiuajyot peuas kichiuas maj taltikpakneminij kinpaleui inemilis Jesús tein kitemakak uan kijkuanis tein itajtakol Adán kiualkuik. Tekiuaj kinajokuis tel miakej akin momikilijkej uan kiixtalis maj motamachti noyampa taltikpak uan ijkon uelis kiixmatiskej Jiova (Apoc. 20:12, 13). Taltikpak mochiuas se xochital, ijkon kemej katka xochital Edén. Uan nochin taltikpakneminij akin tatakamatiskej amo kipiaskejok tajtakol.
16 Keman tamis iTekiuajyo Cristo tein uejkauas Mil Xiuit, itanejnekilis Jiova mochiuasya. Ijkuak Jesús kimakas iPopaj Tekiuajyot (xikonixtajtolti 1 Corintios 15:24-28). Amo monekisok maj onka aksa akin techtajtouis iixpan Jiova. Nochin ikoneuan Dios itech taltikpak uan iluikak mouikaskej iuan toTajtsin kemej ichankauan.
kr pág. 237 § 21
Tekiuajyot kichiua itanejnekilis Dios itech taltikpak
21 Maski axkan timomikiliaj porin tikokolispeuaj uan tikpiaj tajtakol, ¿toni panos ika mikilis? Nejon kemej yeskia se taixnamikkej tein amo ueli tiktanij (1 Cor. 15:26). Sayoj ke ¿uelis Jiova kitanis mikilis? Xikonita tein kijtoj Isaías: “Yejuatsin kitamis mikilis nochipaya, uan toTajtsin Jiova akin okachi Ueyi Taixyekankej yekmelauj kinuachilis ininixayo nochin” (Is. 25:8). Xionmonemili: ¡Amo akin tayokoyasok porin momikilij aksa, amo onkaskejok taltekochmej nion amo akin chokasok! Tinochin titelyolpakiskej keman tikitaskej keniuj Jiova kinajoktiyas akin momikilijkejya (xikonixtajtolti Isaías 26:19). Yekmelauj yolseuiskej miakej millones akin tayokoyakej porin aksa momikilij.
Tikpiaskej yolseuilis itech mil xiuit... ¡uan nochipaya!
17 Pablo tel kuali kinextij keniuj yeski keman tamis mil xiuit ijkuak kijtoj ke “Yejuatsin tayekantinemis ipan nochi ten ongak”. ¿Toni kijtosneki nejon tajtolmej? Achto ke Adán uan Eva tajtakoskiaj, poujtoyaj iniuan ichankauan Dios tein moajsi iluikak uan taltikpak, uan senyetoyaj uan yolseujkanemiaj iniuan. Jiova akin okachi Ueyi Taixyekankej, kiixyekanaya nochi tein kichijchiuak, kemej ángeles uan taltikpakneminij. Yejuan ueliaj kiueyichiuayaj uan monojnotsayaj iuan, uan yejuatsin kintatiochiuiaya. Kemej tikitaj, “Yejuatsin [tayekantinemia] ipan nochi ten ongak”.
Maj tiktemokan tamachtilis ika nejmachkayot
w12 1/10 pág. 9, recuadro
¿Kintakaualtij tatitanil Pablo maj amo tajtokan siuamej?
Tatitanil Pablo tayolmajxitij ‘maj amo tajtokan siuamej taneltokanij kampa mosentiliaj’ (1 Corintios 14:34). ¿Toni kijtosnekik? ¿Kinemiliaya ke amo ueliskiaj tamachtiskiaj? Amo, ta miakpa kuali ika tajtoj tamachtilis tein kitemakayaj siuamej (2 Timoteo 1:5; Tito 2:3-5). Itech se amat tein Pablo kinijkuilouilij akin kayomej Corinto, kinyolmajxitij maj amo tajtouanij keman okse itatojtokakauj Cristo tajtojtoskia. Nejin amo sayoj kiniluij siuamej, ta no akin tajtouayaj tataman tajtolmej uan akin katkaj tanauatianij (1 Corintios 14:26-30, 33). Sekin siuamej tein kichiuayaj kemej Cristo, kintelyolpaktiaya tein momachtijtoyaj uan xa kitakotonaltiayaj tamachtijkej porin kinekiaj kichiuiliskej netajtanilmej, kemej momattoyaj kichiuaskej ompa itech nejon tonalmej. Yejua ika, kemej Pablo kinekia maj nochi mochiua kemej moneki, kinyolchikauak “ma kintajtoltikan niyokichuan ompa ninchan” (1 Corintios 14:35).
it-1 pág. 1221
Amo palanis
Akin tekiuajtiskej iuan Jesús amo sayoj kinajokuij kemej espíritus ika nemilis nochipaya, ta no Dios kinmaka nemilis tein amo keman tamis uan tein amo keman palanis. Kemej amo keman kikaujkej Jiova ijkuak kipiayaj nemilis tein palani, kiseliaj nemilis kemej espíritus tein amo keman uejueliuis, ijkon kemej Pablo kijtoj itech 1 Corintios 15:42-54. Yejua ika, nemilis tein amo keman tami kijtosneki ke nochipa nemiskej uan amo akin uelis kinixpolos. Uan nemilis tein amo palani kijtosneki ke Dios kinmaka nemilis tein amo keman uejueliuis nion ixpoliuis. Nesi ke Dios kinchijchiua kemej ininselti uelis kipiaskej ininchikaualis uan ijkon amo monekis maj aksa kinmakato chikaualis. Sayoj ke oksekin akin Dios kinchijchiuak iluikak uan taltikpak kemaj moneki maj kinmakato ichikaualis. Nejin kinextia ke Dios semi takuaujtamati inintech. Sayoj ke, maski amo moneki maj aksa kinmakato chikaualis uan maski kiseliaj nemilis tein aksa amo keman uelis kiixpolos, moneki mokauaskej maj Dios kinixyekana. Ijkon kemej Jesucristo, akin kinixyekana, kisentokaj kichiuaj itanejnekilis ininTajtsin uan kitakamatij (1Co 15:23-28; no xikonita alma; inmortalidad).
29 METSTI ABRIL HASTA 5 METSTI MAYO
TAMACHTILIS TEIN KIPIA BIBLIA | 2 CORINTIOS 1-3
“Jiova yejua Dios akin teyolseuia”
“Ximochoktijtiyakan iuan nekes ten [...] chokaj”
4 “Totajtsin Dios [akin] nachipa techyoliknelijtinemi” no kimachiliani tayokol keman momikilianij itekitikauan, kemej Abrahán, Isaac, Jacob, Moisés uan tekiuaj David (Núm. 12:6-8; Mat. 22:31, 32; Hech. 13:22). Biblia kijtoua ke Dios kineki maj ejko tonal keman oksepa kinmakas ininnemilis (Job 14:14, 15). Ijkuak, yejuan yolpakiskej uan amo keman kokolispeuaskej. Jiova no kiitak keman kimiktijkej iKonetsin akin semi kitasojta (Prov. 8:22, 30). Amo ueli tiknemiliaj ueyi tayokol tein kimachilij Jiova (Juan 5:20; 10:17).
“Ximochoktijtiyakan iuan nekes ten [...] chokaj”
14 Nochi nejon uelis kichiuas maj ouij techkisa tikmatiskej toni tikiniluiskej akin tel tayokoxtokej. Maski ijkon, Biblia kijtoua ke “inintajtoluan tamatinij tepajtia” (Prov. 12:18). Miakej tokniuan kiajsij keniuj kinyolseuiskej oksekin itech folleto Cuando muere un ser querido. Maski ijkon, miakpa, okachi uelis titapaleuiskej komo tikchiuaj tein kijtoua nejin tayolmajxitilis: “Ximochoktijtiyakan iuan nekes ten moyolkokoaj uan chokaj” (Rom. 12:15). Gaby, akin inamik momikilij, kijtoua ke kemansa sayoj ueli kinextia keniuj momachilia keman choka. Uan no kijtoua: “Yejua ika nechyolseuia maj notasojikniuan nouan chokakan. Maski ijkuak niteltayokoxtok, amo nimomachilia notelselti”.
Maj tiktemokan tamachtilis ika nejmachkayot
Tein tajtanij akin taixtajtoltiaj
¿Toni kijtosneki ‘tenilil’ uan ‘neskayot’ tein Dios kinmaka taixpejpenalmej? (2 Cor. 1:21, 22.)
▪ Tenilil oso netetayokolil. Se amatajkuilol kijtoua ke tajtol griego tein mokepa kemej “tenilil” itech 2 Corintios 1:22, kikuij tanamakanij uan tekiuanij. Nejon tajtol kijtosneki taxtauil tein se kitemakateua keman se kikoua teisa oso tein ika se kinextia ke se kiixtauas nochi tein moneki. Ijkon se kinextia ke senkis se kikouas teisa uan satepan uelis se tajtanis ininixpan tekiuanij maj temakakan. Keman yektikatsin espíritu kimatiltia se tokniuj ke taixpejpenal, kemej yeskia kiselia se ‘tenilil’ oso netetayokolil. Sayoj ke, itech 2 Corintios 5:1-5, moijtoua ke senkis kiselia itaxtauil keman Dios kimaka nemilis tein amo palanis ompa iluikak uan nemilis tein amo keman tamis (1 Cor. 15:48-54).
Itech tajtol griego tein axkan mokui no mokui se tajtol kemej nejon keman ika tajtouaj anillo tein kinextia ke aksa monamiktiti. Yejua ika, nejon neskayot kuali kinnamiki taixpejpenalmej, porin yejuan kemej yeskia siuat akin mochiuas inamik Cristo (2 Cor. 11:2; Apoc. 21:2, 9).
▪ Neskayot oso sello. Ne uejkauj, kitaliliayaj sello teisa uan ika monextiaya ke se tal katka iaxka aksa oso ika motematiltiaya okseki taman. Keman Dios kitalilia sello se tokniuj ika iyektikatsin espíritu kemej yeskia kineskayotia ke iaxkaya (Efes. 1:13, 14). Taixpejpenalmej akin amo keman kikauaj Jiova senkis kipiaj sello tepitsin achto ke momikiliskej oso achto ke peuas okachi ueyi tajyouilis (Efes. 4:30; Apoc. 7:2-4).
w10 1/8 pág. 23
¿Tikonmatia?
¿Toni kijtosnekia tatitanil Pablo keman kijtoj: “Dios [...] techchiualtia ma tiktamitanilikan in amokuali Satanás”?
▪ Itech 2 Corintios 2:14-16, tatitanil Pablo kijkuiloj: “Totajtsin Dios [...] techchiualtia ma tiktamitanilikan in amokuali Satanás ika ichikaualis de Cristo Jesús. Uan Totajtsin Dios kinextilijtinemi in taltikpakuani de keniu yejuan uelis kixmatiyaske in Tajtoltsin de Dios ika por tejuan totanojnotsalis. Uan ne totanojnotsalis de Cristo, yejua ne kinejneuilia keme yeskia se kualtsin auiyakayot ten nochi taajuialia nouiyampa. Uan tejuan tiitaneltokakauan de Cristo uan tiknejneuiliaj [...] ne ajuiyakayot ten Cristo kikuik para kimouistilis Dios, yejua ne mosensoua inpan nochi nekes ten makiske ya uan inpan nochi nekes ten ayamo makisaj. Uan [...] mochiua keme se ajuiyakayot ten kualkui in mikilis para nochi nekes ten ixpoliuiske. Pero para tejuan ten timakiske, ne ajuiyakayot de Cristo techkemiloki uan techmakak ne nemilis sen nachipa”.
Yejua ika, ¿toni kijtosneki ijkuak moijtoua ke Dios “techchiualtia ma tiktamitanilikan in amokuali Satanás”? Pablo ika tajtojtoya keman romanos iluichiuayaj ijkuak tateuianij panouayaj iixpan akin kinixyekanaya uan ijkon kiueyitaliayaj. Ijkuak, kinnextiayaj akin kinkitskijkaj uan no tein kinkuilijkaj. Yejua ika, romanos semi kinueyitaliayaj tateuianij uan akin kinixyekanaya. No kintemaktiayaj miak kuakuejmej akin no kinpanoltiayaj iixpan taixyekankej. Uan miakpa, ompa kinmiktiayaj taltikpakneminij akin kinkitskijkaj.
¿Uan toni kijtosnekia tatitanil keman ika tajtoj “ajuiyakayot ten Cristo kikuik” tein ika monextiaya ke sekin kisentokaskiaj nemiskiaj sayoj ke oksekin momikiliskiaj? Itech amatajkuilol The International Standard Bible Encyclopedia, moijtoua ke nejin neskayot xa kijtosneki keman romanos kichichinouayaj kopal keman tateuianij panouayaj iixpan akin kinixyekanaya. Uan no, moijtoua ke keman akin tataniaj kijnekuiaj kopal kinelnamiktiaya ke tatankaj, sayoj ke akin kinkitskiayaj kampa tateuitoj kinelnamiktiaya ke xa kinmiktiskiaj.