¿Keniuj uelis kuali nitaixpejpenas?

Tein Biblia kijtoua

Biblia semi techpaleuia keman moneki maj kuali titaixpejpenakan porin techpaleuia maj tikpiakan tamatilis uan maj kuali tiknemilikan tein tikchiuaskej (Proverbios 4:5). Kemansa senkis techiluia toni moneki tikchiuaskej. Sayoj ke kemansa techyolmajxitia tein techpaleuis maj kuali titaixpejpenakan.

Itech nejin tamachtilis tikitaskej nejin:

• Tayolmajxitilis tein mitsonpaleuis kuali xiontaixpejpena

• ¿Monekiskia nikpatas teisa tein nikixpejpenakya?

• ¿Toni uelis nikchiuas komo amo kuali nitaixpejpenak uan amo ueliok nikpata?

Tayolmajxitilis tein mitsonpaleuis kuali xiontaixpejpena

• Amo xionyolijsiui. Biblia kijtoua: “Akin tamatkej kuali kiita kani taksas” (Proverbios 14:15). Komo tionyolijsiui keman tikonixtalis tein tikonchiuas, xa seki taman amo itech tiontanemilis. Yejua ika kuali xikonnemili toni okachi tapaleuis (1 Tesalonicenses 5:21).

• Amo xiontaixpejpena keman amo kuali tionmomachilia. Biblia tamachtia ke tamouilil maj totech titakuaujtamatikan porin uelis timokajkayauaskej (Proverbios 28:26; Jeremías 17:9). Yejua ika, amo kuali yetok xikonixtali tikonchiuas teisa keman tionkualantok, tionmotekipachojtok, tiontayokoxtok, semi tionsioujtok oso tionijsiujtok (Proverbios 24:10; 29:22).

• Xikontajtani Dios maj mitsonmaka tamatilis (Santiago 1:5). Dios kiuelita technankilis keman tiktajtaniaj teisa kemej nejon. Yejuatsin se tepopaj tetasojtakej akin kineki kinpaleuis ikoneuan maj amo kipiakan kuejmolmej. Yejua ika, “yejua Jehová akin kitemaka tamatilis; itech itenoj kisa taixmatilis uan kuali taixejekolis” (Proverbios 2:6).a Dios techpaleuia maj kuali titanemilikan ika tayolmajxitilis tein moajsi itech iTajtol, Biblia (2 Timoteo 3:16, 17).

• 

  Xionmomachti tein mitsonpaleuis. Biblia kijtoua ke “akin tamatkej takaki uan kiselia okachi tamachtilis” (Proverbios 1:5). Yejua ika, para kuali titaixpejpenaskej moneki kuali timomachtiskej. ¿Kani uelis tikonajsis tamachtilis tein mitsonpaleuis uan maj takuaujtamach?

  Yekinika, xikontemo toni kijtoua Biblia ika tein mitsontekipachoua. Kemej Dios techchijchiuak kimati toni okachi techpaleuis. Yejua ika, iTajtol kipia okachi kuali tayolmajxitilis (Salmo 25:12). Kemansa, Biblia kipia tanauatilmej tein senkis techiluiaj toni moneki tikchiuaskej (Isaías 48:17, 18). Uan kemansa, tein Biblia techyolmajxitia techpaleuia maj tikmatikan toni tikixpejpenaskej. Kemej amo senkis techiluia toni moneki tikchiuaskej, no uelis itech titanemiliskej tein tikuelitaj achto ke titaixpejpenaskej. Para tikonajsis tajkuilolmej itech Biblia tein mitsonpaleuiskej, uelis tikontemos tamachtilis itech nejin página kampa timoteixmatiltiaj. Amo moneki tikonixtauas.b

  Kemansa no monekis tiontatemos okseko kampa takuaujtamach. Kemej neskayot, komo tikonkouati teisa tein tel patiyoj kuali yeskia xikontemo tikonmatis seki taman, kemej akoni kichijchiuak, ox mitsonpatiliskej komo uejueliuik, tein moneki tikonchiuas para tikonkepas uan okseki taman. Uan no, xikonita ox tein tikonkouati yejua tein yekmelauj tikontemojtok.

  Biblia kijtoua: “Amo kuali kisa tein moixtalia mochiuas keman amo moteixejekoltia” (Proverbios 15:22). Yejua ika, achto ke tikonixpejpenas teisa xiontajto iniuan akin uelis tiontakuaujtamatis. Kemej neskayot, komo moneki tikonixpejpenas keniuj tionmopajtis, kuali yeskia xikonitati se tapajtijkej (Mateo 9:12). Kemansa no mitsonpaleuis komo tiontajtoua iniuan akin no kipanokej tein tikonpanotok. Sayoj ke xikonelnamiki ke tejuatsin moneki tikonixpejpenas tein tikonchiuas uan ke tejuatsin tikonselis tein panos ika tein tikonixpejpenas (Gálatas 6:4, 5).

• 

  Xikonita tein uelis panos. Keman tionmomachtisya nochi tein moneki, xikonijkuilo tein uelis tikonchiuas uan tein kuali uan tein amo kuali tein uelis panos. Satepan xikonnemili tein xa panos keman tikonixtalis se taman (Deuteronomio 32:29). Kemej neskayot, ¿keniuj mitsonijtakos tejuatsin, mokalyetonij uan oksekin? (Proverbios 22:3; Romanos 14:19). Komo itech tiontanemilia nejin netajtanil uan itech tajkuilolmej tein kipia Biblia tikonixpejpenas tein kinpaleuis nochin.

• Xikonixpejpena tein tikonchiuas. Kemansa amo tikixpejpenaj tikchiuaskej teisa porin tiomeyolouaj. Keman ijkon panoua, xa amo tikseliskej tein kuali tein ueliskia panos oso xa okachi ouij techkisas tikyektaliskej tein tikpanotokej. Sayoj ke moneki teisa tikixtaliskej tikchiuaskej, porin komo amo tikchiuaj kemej yeskia amo kuali titaixpejpenaskiaj. Biblia kimelaua nejin keman ika tajtoua aksa akin tatoka: “Akin kiitstok ejekat amo tatokas uan akin kiitstok mixti amo kiololos tatok” (Eclesiastés 11:4).

Xikonelnamiki ke komo hasta kuali tiontaixpejpena xa amo senkis kuali kisas. Kemansa monekis tikonkauas seki taman oso xa mochiuas tein amo tikonchiaya (Eclesiastés 9:11). Yejua ika kuali xionmomachti uan xikonixpejpena tikonchiuas tein xa okachi kuali kisas.

¿Monekiskia nikpatas teisa tein nikixpejpenakya?

Seki taman tein tikixtaliaj ueliok tikpataj. Xa tein tikonpanotoya mopatak oso xa tikonitak ke amo mochiuak tein tikonchiaya. Komo ijkon panoua, oksepa kuali xikonnemili tein tikonchiuas uan xikontemo okse taman tein okachi mitsonpaleuis.

Sayoj ke seki taman tein tikixtalijkej tikchiuaskej amo moneki tikpataskejok (Salmo 15:4). Kemej neskayot, Dios kichia maj akin monamiktijkejya kichiuakan tein motenkaujkej itech tonal keman monamiktijkej (Malaquías 2:16; Mateo 19:6).c Yejua ika, keman kipiaj kuejmolmej moneki mochikauaskej kiyektaliskej uan amo mokauaskej.

¿Toni uelis nikchiuas komo amo kuali nitaixpejpenak uan amo ueliok nikpata?

Moneki tikajsikamatiskej ke tinochin se tonal amo kuali titaixpejpenaskej (Santiago 3:2). Taixejekol maj timotajtakoltikan uan maj tiknemilikan maj amo ijkon titaixpejpenanij (Salmo 69:5). Kemansa kuali yetok maj amo kuali timomachilikan komo nejon techpaleuia maj amo oksepa amo kuali titaixpejpenakan (Proverbios 14:9). Sayoj ke Biblia techiluia ke semi tamouilil komo semi timotajtakoltiaj, porin uelis semi timotekipachoskej uan timotayokoltiskej (2 Corintios 2:7).d Xikonelnamiki ke “Jehová teiknelia uan kineki tapaleuis” (Salmo 103:8-13). Yejua ika, komo amo kuali tiontaixpejpenak uan amo ueliok tikonpata, xionmochikaua amo oksepa tikonchiuas uan xikontemo tikonyektalis.