Tiktekitiliaj Dios akin semi ‘techyoliknelia’

1. ¿Toni xa tikelnamikij keman itech titanemiliaj aksa akin teiknelia?

KEMAN itech titanemiliaj aksa akin teiknelia, xa itech titanemiliaj se taltikpaknenkej akin kiuelita kitemakas tein kipia uan kualtakat. Xa tikelnamikij tein kichiuak samaritano akin Jesús ika tajtoj itech se neskayot. Nejin takat kiiknelij se judío akin kitachtekijkaj. Samaritano “kiueyiyoliknelij” judío, uan netasojtalis kiolinij maj kipaleuiani (Luc. 10:29-37). Itech nejin neskayot moita se taman tein Jiova kinextia: teiknelilis. Yejuatsin techiknelia porin techtasojta, uan mojmostaj technextilia ika miak taman.

2. ¿Keniuj no se kinextia ke se teiknelia?

² Teiknelilis no ueli se kinextia keman amo se kitatsakuiltia se taltikpaknenkej maski kinamikiskia maj se kichiua. Jiova semi techikneliani, ta kemej kijtoj se salmista, “amo techchiuiliani tein technamiki” (Sal. 103:10). Sayoj ke kemansa, Jiova moneki kimelauas akin tajtakolchiua.

3. ¿Katiyejua netajtanilmej tiknankiliskej itech nejin tamachtilis?

³ Itech nejin tamachtilis tikitaskej keniuj kinankilia Biblia nejin eyi netajtanilmej: ¿keyej teiknelia Jiova?, ¿uelis se kimelauas aksa uan no se kinextilis teiknelilis? Uan ¿toni uelis techpaleuis maj titeiknelikan?

KEYEJ TEIKNELIA JIOVA

4. ¿Keyej teiknelia Jiova?

⁴ Porin tetasojta. Tatitanil Pablo kijkuiloj ke Dios “tel ueyi techyoliknelij”. Keman kijkuiloj nejin, ika tajtojtoya ke Dios kinmaka itekitikauan taixpejpenalmej tatiochiualis maj nemikan iluikak maski tajtakolejkej (Efes. 2:4-7). Sayoj ke Jiova amo sayoj kiniknelia tokniuan taixpejpenalmej. Itech se salmo, David kijtoj: “Jiova yolkuali iniuan nochin, uan iteiknelilis moita itech nochi tein kichijchiuak” (Sal. 145:9). Kemej Jiova kintasojta taltikpakneminij, kinnextilia teiknelilis nochipa keman kiita ke kinamiki.

5. ¿Keyej kimatia Jesús ke Jiova teiknelia?

⁵ Jesús kuali kimati ke Jiova semi kiuelita teiknelis, porin miak xiujmej nemik iuan iTajtsin ompa iluikak achto ke ualaskia nikan taltikpak (Prov. 8:30, 31). Miakpa kiitak keniuj kinnextiliaya teiknelilis taltikpakneminij maski tajtakolejkej (Sal. 78:37-42). Keman Jesús tamachtiaya, miakpa kijtoj ke Jiova semi teiknelia.

6. ¿Toni neskayot kijtoj Jesús tein techpaleuia maj tikmatikan ke Jiova teiknelia?

⁶ Kemej tikitakej itech tamachtilis 40, Jesús kijtoj se neskayot tein ika kinekia tamachtis ke Jiova semi kiuelita teiknelis. Telpoch akin ika tajtoj “kitamipojpoloto nochi nitomin tech in auilnemilis” (Luc. 15:13). Satepan moyolnonotsak, moyolyemanij uan mokepak ichan. ¿Toni kichiuak ipopaj keman kiitak ke mokepak? Jesús kijtoj: “Kuak ne telpokat ajsitiaya ichan itajtsin, ijkuakon itajtsin konitak uan kiueyiyoliknelij. Uan ne tetat motaloj kinamikito ikoneu uan kikekechnauato uan kitennamik”. Ipopaj amo kipijpinaujtij, ta niman kiiknelij, kitapojpoluij uan kikauak maj mokepani ichan. Maski nejin telpoch semi tajtakolchiujka, ipopaj kitapojpoluij porin moyolnonotsak. Tepopaj teiknelijkej akin Jesús ika tajtoj kiixnextia Jiova. Ika nejin neskayot, Jesús tamachtij ke iTajtsin kineki kintapojpoluis akin tajtakolchiuaj uan yekmelauj moyolnonotsaj (Luc. 15:17-24).

7. ¿Keniuj moita ke Jiova semi tamatkej ijkon kemej kinextia teiknelilis?

⁷ Porin semi tamatkej. Jiova nochipa kiixtalia kichiuas tein tapaleuia. Biblia kijtoua ke “tamachilis ten ualeutok de Dios” kipia teiknelilis uan kichiua tein kuali (Sant. 3:17). Ijkon kemej se tepopaj tetasojtakej, Jiova kimati ke iteiknelilis nochipa kinpaleuia ikoneuan (Sal. 103:13; Is. 49:15). Kinpaleuia maj ueli kichiakan tein kuali maski tajtakolejkej. Kemej semi tamatkej, kinnextilia teiknelilis nochipa keman kiita ke kinamiki, sayoj ke no kimati kemanian amo kinamiki maj kinnextili. Yejuatsin amo kinextia teiknelilis komo ijkon tapaleuijtoskia maj mochiua tein amo kuali.

8. ¿Toni moneki mochiuas kemansa, uan keyej?

⁸ Maj tiknemilikan ke se tokniuj auilnemi maski kimati ke amo kuali. ¿Toni monekiskia tikchiuaskej? Tatitanil Pablo kijkuiloj: “Amo iuan ximouikatinemikan” (1 Cor. 5:11). Akin tajtakolchiuaj uan amo moyolnonotsaj kinkalankixtiaj itech nechikol. Ijkon moneki mochiuas porin nejon kinyekpia okseki tokniuan, uan no se kinextia ke se kitakamati itanauatiluan Dios. Sayoj ke sekin kinemiliaj ke keman se tokniuj kikalankixtiaj itech nechikol amo moita iteiknelilis Dios. Maj tikitakan ox melauj nejon.

¿YEKMELAUJ KINEXTILIAJ TEIKNELILIS AKIN KIKALANKIXTIAJ ITECH NECHIKOL?

9, 10. Kemej kijtoua Hebreos 12:5, 6, ¿keyej ueli tikijtouaj ke keman kikalankixtiaj itech nechikol akin tajtakolchiuak kinextiliaj teiknelilis? Xikonijto se neskayot.

⁹ Keman itech se nechikol tanauatiaj ke se tokniuj amo itaixpantijkauok Jiova, semi titayokoyaj. Xa timotajtaniaj ox kinamikia maj kikalankixtianij. ¿Yekmelauj kinextiliaj teiknelilis akin kikalankixtiaj itech nechikol? Kemaj. Komo tokniuan tayekananij amo kimelauaskiaj, amo kinextijtoskiaj tamatilis, teiknelilis nion netasojtalis (Prov. 13:24). ¿Uelis mopatas akin amo moyolnonotsa komo kikalankixtiaj itech nechikol? Kemaj. Miakej akin tajtakolchiujkaj kiajsikamatkej ke tein kiixtalijkej tokniuan tayekananij, yejua tein kinpaleuij maj kiajsikamatinij ke amo kuali tein kichiujkej, kinpaleuij maj mopatanij uan maj mokepanij iuan Jiova (xikonixtajtolti Hebreos 12:5, 6).

¹⁰ Maj itech titanemilikan nejin neskayot. Se ichkatajpixkej kiita ke semej iichkauan kikuik se taman kokolis. Yejua kimati ke sayoj uelis pajtis komo kiajchiua uan kiuika okseko. Sayoj ke ichkamej kiuelitaj sekosaj yetoskej, uan keman kinajchiuaj amo kiuelitaj. ¿Kijtosneki ke ichkatajpixkej amo kitasojta ichkatsin keman kiajchiua porin kineki maj pajti? Amo. Kimati ke komo kinkaua iniuan okseki ichkamej uelis kinmauas. Yejua ika kiajchiua, porin ijkon kinyekpia okseki ichkamej (no xikonita Levítico 13:3, 4).

11. 1) ¿Keyej akin kikalankixtijkej itech nechikol kemej yeskia se ichkat tein mokokoua? 2) ¿Toni nepaleuil kipiaj akin kinkalankixtijkej itech nechikol?

¹¹ Ueliskia tikijtoskej ke akin kikalankixtijkej itech nechikol kemej yeskia nejon ichkat, porin kemej amo kuali mouikaok iuan Jiova kemej yeskia mokokoua (Sant. 5:14). Ijkon kemej se taltikpaknenkej uelis kinmauas oksekin kokolis tein kipia, akin amo kuali mouikaok iuan Jiova uelis kichiuas maj oksekin no kichiuakan tein amo kuali. Yejua ika, xa monekis kikalankixtiskej itech nechikol. Ijkon Jiova kinextia ke kintasojta okseki itekitikauan akin amo kikauaj, uan no uelis kipaleuis akin kikalankixtijkej maj moyolnonotsa. Yejua uelis kisentokas yas nechikolmej, kampa kiselis tamachtilis tein kipaleuis maj oksepa kichikaua itakuaujtamatilis. No uelis kiselis amaixmej tein ika momachtis uan uelis kiitas JW Broadcasting^®. Uan keman tokniuan tayekananij kiitaskej ke kipatatokya seki taman, kemansa uelis kiyolmajxitiskej uan kipaleuiskej maj oksepa kuali mouika iuan Jiova uan maj oksepa mochiua itaixpantijkauj.b

12. ¿Keniuj tokniuan tayekananij uelis kinextiskej netasojtalis uan teiknelilis keman akin tajtakolchiuak amo moyolnonotsa?

¹² Moneki tikelnamikiskej ke sayoj kinkalankixtiaj itech nechikol akin amo moyolnonotsaj. Tokniuan tayekananij kimatij ke nejin se taman tein moneki kuali kinemiliskej. Uan no kimatij ke keman Jiova temelaua kichiua “kemej kinamikis” (Jer. 30:11). Kintasojtaj tokniuan uan amo kinekij kichiuaskej nion teyi tein uelis kichiuas maj amo kuali mouikakanok iuan Jiova. Sayoj ke kemansa moneki kikalankixtiskej akin tajtakolchiuak. Ijkon kinextiaj netasojtalis uan teiknelilis.

13. ¿Keyej itech nechikol tein moajsia Corinto monekik kikalankixtiskej se tokniuj?

¹³ Maj tikitakan tein kichiuak tatitanil Pablo itech yekinika siglo keman se tokniuj takat akin tajtakolchiuak amo moyolnonotsak. Nejin tokniuj akin nemia Corinto auilnentoya iuan inamik ipopaj. ¡Semi amo kuali tein kichiujtoya! Jiova kiniluijka israelitas: “Takat akin moteka iuan inamik ipopaj, kipinaujtia ipopaj. Takat uan siuat moneki mikiskej” (Lev. 20:11). Pablo amo uelia kiniluiaya tokniuan maj kimiktianij nejon takat, sayoj ke kemaj kiniluij maj kikalankixtianij itech nechikol. Nejon takat amo tapaleuijtoya itech nechikol, porin sekin hasta kinemiliayaj ke tein kichiujtoya amo katka se ueyi tajtakol (1 Cor. 5:1, 2, 13).

14. ¿Keniuj Pablo kinextilij teiknelilis takat akin kikalankixtijkaj itech nechikol, uan keyej? (2 Corintios 2:5-8, 11).

¹⁴ Satepan, Pablo kimatik ke nejon takat amo kichiujtoyaok tein amo kuali uan ke yekmelauj moyolnonotska. Maski kichiujka maj amo kuali ika tajtouanij nechikol, Pablo kiniluij tayekananij ke amo kinekia semi kitajyouiltis. Yejua ika kiniluij maj kichiuanij nejin: “Xiktapojpoluikan uan xikyojyoltalikan”. Uan kiniluij keyej: “Para ma yejua ma mosenkaua ya tech ne tayokoyalis uan ma amo moueyiyoltayokoltijto ok”. Pablo kiiknelij takat akin moyolnonotska. Amo kinekia maj semi motayokoltiani, porin nejon ueliskia kichiuas maj mosenkauani (xikonixtajtolti 2 Corintios 2:5-8, 11).

15. ¿Keniuj tayekananij kinextiaj kuali taixejekolis keman kimelauaj se tokniuj?

¹⁵ Ijkon kemej Jiova, tayekananij no kiuelitaj kinextiskej teiknelilis. Kimelauaj se tokniuj keman kiitaj ke moneki, sayoj ke kinextiaj teiknelilis keman kiitaj ke kinamiki. Komo amo kimelauaskiaj akin tajtakolchiuak amo kinextijtoskiaj teiknelilis, ta kikaujtoskiaj maj mochiua tein amo kuali. Sayoj ke ¿sayoj tayekananij moneki kinextiskej teiknelilis?

TONI UELIS TECHPALEUIS MAJ TITEIKNELIKAN

16. Kemej kijtoua Proverbios 21:13, ¿toni kichiua Jiova iniuan akin amo kinextiaj teiknelilis?

¹⁶ Nochin tiitekitikauan Jiova tiknekij titeikneliskej kemej yejuatsin. ¿Keyej? Se taman, porin yejuatsin amo kikaki ininnetataujtiluan akin amo teikneliaj (xikonixtajtolti Proverbios 21:13). Kemej tiknekij maj Jiova kikaki tonetataujtiluan, amo tikintajyouiltiaj oksekin. “Keman motsajtsilia akin kineki maj kipaleuikan” nochipa tikpaleuiaj. Uan no, timochikauaj tikchiuaskej tein techmachtia nejin tajkuilol: “Nekes ten amo teikneliaj, yejuan nojonkes Dios kinixkomakas pero amo ika teiknelilis” (Sant. 2:13). Komo tiyolyemankej uan tikelnamikij ke semi moneki maj techiknelikan, okachi tiknekiskej tikinikneliskej oksekin. Uan okachiok tiknekij tikikneliskej akin tajtakolchiujka uan mokepa itech nechikol.

17. ¿Keniuj kinextij tekiuaj David ke yekmelauj teikneliaya?

¹⁷ Itech Biblia tikajsij neskayomej tein techmachtiaj maj tikiniknelikan oksekin uan maj amo tikintajyouiltikan. Maj itech titanemilikan tekiuaj David, akin miakpa kinextij ke yekmelauj teikneliaya. Maski Saúl kinekia kimiktis, David kiiknelij nejin tekiuaj akin Dios kiixtalijka uan amo keman kitemoj momakepas oso kichiuilis tein amo kuali (1 Sam. 24:9-12, 18, 19).

18, 19. ¿Kemanian David amo kinextij teiknelilis?

¹⁸ Sayoj ke David amo nochipa teiknelij. Kemej neskayot, keman Nabal, se takat akin amo yolkuali katka, kiuijuikaltij David uan amo kinekik kinmakas tein kikuaskiaj yejua uan takamej akin iuan yajtinemiaj, David semi kualanik uan kijtoj ke kimiktiskia Nabal uan nochin takamej akin nemiaj ichan. Sayoj ke kemej Abigaíl, inamik Nabal, katka kualtakat uan amo yolijsiuia, niman kinuikilij tein kikuaskiaj. Yejua ika David amo kimiktijok Nabal nion takamej akin nemiaj ichan (1 Sam. 25:9-22, 32-35).

¹⁹ Okse tonal, tanauatijkej Natán kitapouij David ke se takat akin tominpiaya kiichtekilij okse takat akin amo teyi kipiaya se ichkatsin tein semi kitasojtaya. David semi kualanik uan kiluij: “¡Itokaykopa Jiova, Dios akin yoltok, nikijtoua ke takat akin kichiuak nejon moneki mikis!” (2 Sam. 12:1-6). David kimatia ke tanauatil tein kiselijka Moisés kijtouaya ke komo se taltikpaknenkej kiichtekia se ichkat, monekia kikepas naui (Éx. 22:1). Sayoj ke keman kijtoj ke nejon takat kinamikia mikis kinextij ke amo teikneliaya. Tein melauj, Natán kiluij nejin neskayot porin kinekia kipaleuis maj kiajsikamatini ke yejua kichiujka okachi uejueyi tajtakolmej, uan Jiova semi kiiknelijka. Sayoj ke David amo kiiknelij takat akin Natán ika tajtoj (2 Sam. 12:7-13).

20. ¿Toni techmachtia tein kichiuak David?

²⁰ Maj tikelnamikikan ke keman David semi kualanik kijtoj ke Nabal uan nochin takamej akin nemiaj ichan monekia mikiskej. Uan satepan kijtoj ke kinamikia mikis takat akin Natán ika tajtoj. David semi yolkuali katka. Komo ijkon, ¿keyej kijtoj ke takat akin Natán ika tajtoj kinamikia mikis? Maj tiknemilikan keniuj moajsia David itech nejon tonalmej. Ijkuak, amo kuali momachiliaya porin kichiujka tein amo kuali. Keman se tokniuj nochipa amo kuali ininka tajtoua oksekin, kinextia ke amo semi kuali mouikaok iuan Jiova. Jesús tanejmachtij nejin: “Amo xikinixkomaktinemikan uan amo no xikintelchiutinemikan aksame, [...] para ma Dios amo no namechixkoma[ka]s uan amo namechtelchiuas. Porin Dios namechixkomakas uan namechtelchiuas ika ne tamachiu tenika namejuan nankikuij para nankixkomakaj uan nankintelchiuaj aksame” (Mat. 7:1, 2). Yejua ika, maj amo tikintajyouiltikan oksekin uan maj timochikauakan semi titeikneliskej ijkon kemej kichiua Dios.

21, 22. ¿Keniuj uelis tiknextiskej ke titeikneliaj?

²¹ Teiknelilis amo sayoj se kimachilia, ta se kinextia keman se kinpaleuia oksekin. Tinochin uelis tiknemiliskej akoni uelis tikpaleuiskej itech nechikol, kampa titanojnotsaj oso semej tochankauan. Xa uelis tikitaskej ke onkak miak taman kemej uelis tiknextiskej ke tikinikneliaj. ¿Tikixmatij aksa akin xa moneki maj se kiyolseui? ¿Uelis tikuikiliskej aksa teisa tein kikuas oso tikpaleuiskej ika okse taman? ¿Uelis tikyolchikauaskej oso tikyolseuiskej se tokniuj akin yankuixtok mokepak itech nechikol? ¿Uelis tikinmatiltiskej oksekin tein kichiuas iTekiuajyo Dios? Tanojnotsalis se taman kemej okachi uelis tikinnextiliskej oksekin ke tikinikneliaj (Job 29:12, 13; Rom. 10:14, 15; Sant. 1:27).

²² Komo tiktemouaj keniuj uelis tikinpaleuiskej oksekin, tikitaskej ke onkak miak taman kemej uelis tiknextiskej teiknelilis. Komo tiknextiaj nejin kualneskayot, tikyolpaktiskej toTajtsin Dios akin “tel ueyi techyoliknelij”.