Toni mitsonpaleuis oksepa kuali xionmouika iuan Jiova

Xijxiujtika, miakej akin kinkalankixtijkaj itech nechikol mokepaj. Maj tiknemilikan keniuj “nepa eluiyaktsinko” yolpakij keman se tokniuj mokepa (Luc. 15:7, 10). Komo tejuatsin tionmokepak itech nechikol, uelis tikonneltokas ke Jesús, ángeles uan Jiova semi yolpakij. Sayoj ke xa ouij mitsonkisas oksepa peuas kuali tionmouikas iuan Jiova. ¿Katiyejua ouijkayomej uelis tikonpias uan toni uelis tikonchiuas?

SEKI OUIJKAYOMEJ

Miakej akin mokepaj itech nechikol amo kuali momachiliaj. Komo tejuatsin ijkon mitsonpanoua, xa tikonajsikamatis keniuj momachilij tekiuaj David. Maski Jiova kitapojpoluijkaya, kijtoj: “Semi nechtekipachoua miak nepololmej tein nikpia” (Sal. 40:12; 65:3). Se tokniuj akin mokepa iuan Jiova, xa miak xiujmej kisentokas amo kuali momachilis oso mopinaujmatis. Kemej neskayot, Isabelle,a akin mokepak itech nechikol panoua 20 xiujmej satepan, kijtoj: “Ouij nechkisaya nikneltokas ke Jiova ueliskia nechtapojpoluis”. Komo amo kuali tionmomachilia, nejon uelis kichiuas oksepa amo kuali xionmouika iuan Jiova (Prov. 24:10). Amo xikonkaua maj mitsonpano nejon.

Oksekin kintekipachoua maj amo ueli kichiuakan nochi tein kinpaleuis maj oksepa kuali mouikakan iuan Jiova. Satepan ke Antoine mokepak itech nechikol, kijtoj: “Amo nikelnamikiaok nochi tein nikchiuaya oso tein nimomachtijka keman niktekitiliaya Jiova”. Xa sekin akin ijkon momachiliaj amo semi mochikauaj kitekitiliskej Jiova.

Maj tiktalikan se neskayot. Komo se kali uejueliuik satepan ke kiouaejekak, akin iaxka nejon kali xa semi motekipachos porin amo ijsiujka uelis kiyektalis uan monekis chikauak tekitis. No ijkon, komo amo kuali tionmouikaok iuan Jiova porin tikonchiuak se ueyi tajtakol, xa tikonnemilis ke monekis semi tionmochikauas oksepa kuali tionmouikas iuan Jiova. Sayoj ke tikonselis nepaleuil.

Jiova techyoleua maj tikchiuakan nejin: “Xiualakan uan maj tikyektalikan kuejmolmej” (Is. 1:18). Tejuatsin tionmochikauakya tikonchiuas tein mitsonpaleuis oksepa kuali xionmouika iuan Jiova, uan yejua ika yejuatsin mitsontasojta. Xikonnemili: ika tein tikonchiuak, Jiova uelis kinextis ke Satanás se takajkayaujkej (Prov. 27:11).

Kemej tionmokepakya iuan Jiova iuan tionmotokijya, uan yejuatsin kijtoua ke no mouan motokis (Sant. 4:8). Semi kuali maj oksekin kiitakan ke tionmokepakya itech nechikol, sayoj ke moneki tikonchiuas okseki taman. Moneki tikonsentokas tikonchikauas netasojtalis tein tikonpialia moTajtsin uan moTasojikniuj, Jiova. ¿Keniuj uelis tikonchiuas?

XIKONIXTALI TIKONCHIUAS SEKI TAMAN

Xikonixtali tein yekmelauj uelis tikonchiuas. Xa tikonelnamikiok seki taman tein yekinika tionmomachtij, kemej akoni Jiova uan tein kijtoua ke kichiuas satepan. Sayoj ke axkan no moneki tikonchiuas okseki taman tein mitsonpaleuis maj mochikaua motakuaujtamatilis. Kemej neskayot, moneki nochipa tiontanojnotsas, tionyas nechikolmej uan tionmosentilis iniuan okseki tokniuan. Maj tikitakan seki taman tein uelis tikonixtalis tikonchiuas.

Nochipa xikontataujti Jiova. Komo tikonsentoka amo kuali tionmomachilia, yejuatsin kiajsikamati ke xa ouij mitsonkisa tikontataujtis (Rom. 8:26). Maski ijkon, xikonsentoka xikontataujti uan xikonilui ke semi tikonneki kuali iuan tionmouikas (Rom. 12:12). Se tokniuj takat akin monotsa Andrej, kielnamiki: “Semi amo kuali nimomachiliaya uan semi nimopinaujmatia. Sayoj ke satepan ke nikchiuaya netataujtil okachi kuali nimomachiliaya”. Komo amo tikonmati toni tikonijtos keman tikontataujtis Jiova, itech xiontanemili netataujtilmej tein kichiuak tekiuaj David keman moyolnonotsak, tein moajsij itech Salmos capítulo 51 uan 65.

Nochipa xionmomachti Biblia. Nejin mitsonpaleuis okachi xiontakuaujtamati iuan Jiova uan okachi xikontasojta (Sal. 19:7-11). Se tokniuj takat akin monotsa Felipe, kijtoj: “Kemej amo nochipa nikixtajtoltiaya nion nimomachtiaya Biblia, amo semi nitakuaujtamatikok iuan Jiova uan nikchiuak tein amo kuali. Kemej amo niknekia oksepa nikyolkokos, nikixtalij nochipa nikixtajtoltis uan nimomachtis Biblia”. Tejuatsin no uelis ijkon tikonchiuas. Komo amo tikonmati toni tionmomachtis, uelis tikontajtanis se tokniuj akin semi kuali mouika iuan Jiova maj mitsonpaleui.

Xikontemo oksepa kuali tionmouikas iniuan tokniuan. Keman seki tokniuan mokepaj itech nechikol kintekipachoua maj amo kuali kinitakan. Larissa kijtoj: “Semi nimopinaujmatia. Nikmachiliaya ke semi nikinyolkokojka tokniuan. Uan uejkauak ijkon nimomachilij”. Uelis tiontakuaujtamatis ke tokniuan tayekananij uan okseki tokniuan kinekij mitsonpaleuiskej oksepa kuali xionmouika iuan Jiova (xikonita recuadro “Tein uelis kichiuaskej tokniuan tayekananij”). Yejuan semi yolpakij porin tionmokepak uan kinekij xionyolpaki (Prov. 17:17).

¿Keniuj uelis okachi tionmouikas iniuan tokniuan? Xionyoui nochi nechikolmej uan nochipa xiontanojnotsa iniuan tokniuan. ¿Keniuj mitsonpaleuis komo tikonchiua nejin? Félix kijtoj: “Tokniuan kichixtoyaj maj nimokepa. Nikmachilij ke semi nechtasojtaj. Nochin nechpaleuijkej maj nikmachili ke oksepa nimoajsia itech nechikol, ke Jiova nechtapojpoluijka uan ke ueliskia niksentokas niktekitilis” (xikonita recuadro “Tein tejuatsin uelis tikonchiuas”).

AMO XIONMOSENKAUA

Keman tionmochikaujtos oksepa kuali tionmouikas iuan Jiova, Satanás kisentokas kichiuas xikonpia kuejmolmej tein kemej yeskia kiouaejekat (Luc. 4:13). Komo tikonneki tiontaxikos, axkan okachi xikonchikaua mokuali uikalis iuan Jiova, tein kemej yeskia kali tein kiouaejekat kiuejuelojka.

Jiova kijtoua toni kichiuas iniuan iichkauan akin mouejkatilijkej: “Tein poliujkej nikintemos, tein oksekopa yajkej nikinkepas, tein mokokojkej nikinpajtis uan tein amo chikaujkej nikinchikauas” (Ezeq. 34:16). Jiova kinpaleuiani miakej itekitikauan maj oksepa kuali mouikakan iuan. Yejua ika, uelis tiontakuaujtamatis ke yejuatsin no kineki mitsonpaleuis okachi kuali xionmouika iuan.