Xikinilui tayekananij maj mitspaleuikan

1. ¿Keniuj kinextia Jehová ke kintasojta nochin itekitikauan?

JEHOVÁ semi kintasojta itekitikauan uan kinyekpia kemej se ichkatajpixkej kinyekpia iichkauan. Yejua kitemakak iKonetsin para maj ininka momikili uan kinnauatij tayekananij maj kuali kinyekpiakan (Hech. 20:28). Dios kiixtalij Jesús maj taixyekana itech nechikol. Uan tayekananij mokauaj maj Jesús kinixyekana uan yejuan techpaleuiaj maj kuali timouikakan iuan Jehová (Is. 32:​1, 2).

2. ¿Akonimej Jehová okachi kineki kinpaleuis? (Ezequiel 34:​15, 16).

² Jehová kineki kinpaleuis nochin itekitikauan, sayoj ke okachiok akin tajyouijtokej. Yejua kichiua maj tayekananij kinpaleuikan akin xa tajyouijtokej porin kichiujkej tein amo kuali (xiklero Ezequiel 34:​15, 16). ¿Toni moneki tikchiuaskej komo tiknekij maj techpaleuikan? Dios kineki maj tiktataujtikan, sayoj ke no kineki maj tikiniluikan ‘akin kinyekpiaj tokniuan uan tamachtiaj’ itech nechikol (Efes. 4:​11, 12).

3. ¿Keyej tein tikitaskej itech nejin tamachtilis techpaleuis tinochin?

³ Itech nejin tamachtilis tikitaskej keniuj Jehová kichiua maj tayekananij kinpaleuikan akin amo semi kuali mouikajok iuan. Yejua ika tiknankiliskej nejin netajtanilmej: ¿kemanian moneki tikiniluiskej tayekananij maj techpaleuikan?, ¿keyej moneki ijkon tikchiuaskej? uan ¿keniuj techpaleuiaj? Xa axkan kuali timouikaj iuan Jehová uan amo moneki maj techpaleuikan, maski ijkon tein timomachtiskej techpaleuis tinochin porin okachi tiktasojkamatiliskej Jehová maj yetokan tayekananij. No tikmatiskej toni tikchiuaskej keman monekisya maj techpaleuikan.

¿KEMANIAN MONEKI ‘TIKINNOTSASKEJ’ TAYEKANANIJ?

4. ¿Keniuj tikmatij ke Santiago 5:​14-16, 19, 20 ika tajtoua akin amo semi kuali mouikaok iuan Jehová? (No xikita taixkopimej).

⁴ Santiago, se imomachtijkauj Jesús kijtoj keniuj Jehová kichiua maj tayekananij techpaleuikan, kijkuiloj: “¿Semej de namejuan mokokoua? Maj kinnotsa tayekananij itech nechikol” (xiklero Santiago 5:​14-16, 19, 20). Itech nejin texto Santiago ika tajtojtoya aksa akin moneki oksepa kitemos kuali mouikas iuan Jehová. ¿Keniuj tikmatij? Porin Santiago kiluia akin mokokoua maj kinnotsa tayekananij uan amo tapajtianij. No kijtoua ke akin mokokoua pajti keman kitapojpoluiliaj itajtakoluan. Para maj aksa kuali pajti moneki yas iuan tapajtijkej, kiluis tein kikokoua uan kichiuas tein yejua kiluia. No ijkon, para oksepa kuali timouikaskej iuan Jehová moneki tikinnojnotsaskej tayekananij, tikiniluiskej tein techpanotok uan tikchiuaskej tein techyolmajxitiskej itech Biblia.

5. ¿Keniuj uelis tikmatiskej ox kuali timouikajok iuan Jehová?

⁵ Itech Santiago capítulo 5, techyolchikaua maj tikiniluikan tayekananij maj techpaleuikan keman tikitaskej ke amo semi kuali timouikajok iuan Jehová. Sayoj ke motelneki tiktemoskej maj techpaleuikan achto ke amo kuali timouikaskejok iuan. Uan moneki timoyekpiaskej porin Biblia kijtoua ke uelis tiknemiliskej ke tel kuali timouikaj iuan Jehová maski amo ijkon (Sant. 1:22). Yejua nejon tein kinpanok tokniuan de Sardis, yejuan kinemiliayaj ke kuali mouikayaj iuan Jehová, sayoj ke Jesús kiniluij ke amo kiyolpaktiayajok (Apoc. 3:​1, 2). ¿Keniuj uelis tikmatiskej ox kuali timouikajok iuan Jehová? Komo tikitaj ox tiktasojtaj ijkon kemej tiktasojtayaj keman timoauijkej (Apoc. 2:​4, 5). Maj timotajtanikan: “¿Nikuelitaok nikleros Biblia uan itech nitanemilis? ¿Niouj nochi nechikolmej uan kuali nimomachtia achto ke nias? ¿Nikuelitaok nitanojnotsas oso okachi nikuelita nikchiuas okseki taman? ¿Nikneki nikpias okachi tomin?”. Tein titanankiliskej kinextis ox kuali timouikajok iuan Jehová. Uan komo amo tikpataj tein moneki, xa satepan senkis amo kuali iuan timouikaskejok. Uan komo toselti amo ueli tikchiuaj nion teyi oso tikchiujkejya se taman tein Jehová amo kiuelita, moneki maj tayekananij techpaleuikan.

6. ¿Toni moneki kichiuas se tokniuj komo tel tajtakolchiuak?

⁶ Komo se tokniuj tel tajtakolchiua uan ueliskia kikalankixtiskej de nechikol, moneki iuan tajtos se tayekankej (1 Cor. 5:​11-13). Nejon tokniuj moneki maj kipaleuikan para oksepa kuali mouikas iuan Dios. Jehová sayoj techtapojpoluis komo ‘tiknextiaj’ ke yekmelauj timoyolpatakejya (Hech. 26:20). Uan uelis tiknextiskej nejon komo tikiniluiaj tayekananij ke titajtakolchiujkej.

7. ¿Akonimej tayekananij no moneki kinpaleuiskej?

⁷ Tayekananij amo sayoj kinpaleuiaj akin tel tajtakolchiuaj, ta no akin kinejnekij kichiuaskej tein amo kuali (Hech. 20:35). Xa okachi mitsouijmakas tikixtopeuas tein amo kuali komo achto ke tikixmatis Jehová tikuia droga, tikitaya pornografía oso tiauilnemia. Sayoj ke amo ximoui titajtanis maj mitspaleuikan. Xa uelis titajtos iuan se tayekankej akin tikmati ke mitskakis. Yejua mitsiluis toni uelis tikchiuas para tikixnamikis tein tiknejneki, uan mitselnamiktis ke tikyolpaktis Jehová komo tiksentoka tiktakamati (Ecl. 4:12). Xa amo kuali timomachilia porin tiknejnekiok tein amo kuali, yejua ika tayekananij mitselnamiktiskej ke Jehová kiyolpaktia porin tiktemoj maj mitspaleuikan. Nejon kinextia ke amo motech titakuaujtamati uan ke tikneki tikyolpaktis Jehová (1 Cor. 10:12).

8. Xikmelaua ox moneki nochipa tikintapouiskej tayekananij keman timopolouaj.

⁸ Amo nochipa moneki tikintapouiskej tayekananij keman timopolouaj. Maj tiknemilikan ke tikyolkokoj se tokniuj oso ke semi iuan timokualantij. Komo ijkon mitspanok amo niman xiouj iuan se tayekankej, ta xikchiua tein Jesús tayolmajxitij, iuan xitajto tokniuj uan xikilui maj mitstapojpolui (Mat. 5:​23, 24). Xa no uelis timomachtis toamaixuan kampa ika tajtoua maj okachi se yolnejmach, maj amo se yolijsiui uan maj ueli se motsakuili. Sayoj ke komo ayamo ueli tikmelaua kuejmol, xikilui se tayekankej maj mitspaleui. Itech carta tein tatitanil Pablo kinijkuilouilij tokniuan de Filipos, kiluij se tayekankej maj kinpaleui Evodia uan Síntique maj kiyektalikan kuejmol tein kipiayaj. Uan tejua no uelis mitspaleuis se tokniuj tayekankej itech monechikol (Filip. 4:​2, 3).

¿KEYEJ MONEKI ‘TIKINNOTSASKEJ’ TAYEKANANIJ?

9. ¿Keyej moneki tikinnojnotsaskej tayekananij maski tipinauaskej? (Proverbios 28:13).

⁹ Komo tiknemiliaj ke amo uelisok tikixtopeuaskej tein tiknejnekij oso titeltajtakolchiujkejya, xa monekis tikintapouiskej tayekananij maski tipinauaskej. Maj tikelnamikikan ke Jehová kichiua maj tayekananij techpaleuikan maj kuali iuan timouikakan. Yejua ika keman tikinnojnotsaj tayekananij tiknextiaj ke iuan titakuaujtamatij Dios uan tiktakamatij tein technauatia. Tikneltokaj ke Jehová techpaleuis maj tikixtopeuakan tein amo kuali (Sal. 94:18). Uan tikmatij ke komo tikiniluiaj tayekananij uan amo titajtakolchiuajok, Jehová techiknelis uan techtapojpoluis (xiklero Proverbios 28:13).

10. ¿Toni uelis techpanos komo amo niman tikiniluiaj tayekananij ke titajtakolchiujkej?

¹⁰ Komo tikiniluiaj tayekananij toni tajtakol tikchiujkej, Jehová uelis techtapojpoluis uan oksepa kuali iuan timouikaskej, sayoj ke komo amo teyi tikijtouaj okachi titajyouiskej. Keman tekiuaj David tajtakoj, se tiempo amo teyi kijtoj yejua ika tayokoxtoya uan moyolkokouaya porin kimatia ke amo kuali mouikayaok iuan Jehová (Sal. 32:​3-5). Keman timokokouaj uan amo timopajtiaj okachi titajyouiaj. No ijkon techpanos komo titajtakolchiuaj uan amo niman tikiniluiaj tayekananij, okachi titajyouiskej porin amo kuali timouikaskejok iuan Jehová. Dios amo kineki maj ijkon techpano, yejua ika techiluia maj tikiniluikan tayekananij akin uelis techpaleuiskej maj “tikyektalikan kuejmolmej” (Is. 1:​5, 6, 18).

11. ¿Toni no uelis panos komo amo tikiniluiaj tayekananij keman aksa tajtakolchiua?

¹¹ Komo amo tikiniluiaj tayekananij tajtakol tein tikchiujkej, oksekin no tajyouiskej. Xa tikchiuaskej maj ichikaualis Jehová amo tapaleuiok itech nechikol uan maj amo kuali timouikakanok iniuan tokniuan (Efes. 4:30). Uan no, komo tikmatij ke se tokniuj tajtakolchiuak moneki tikiluiskej maj iniuan tajto tayekananij.a Komo amo kichiua, tejuan moneki tikiniluiskej porin komo amo teyi tikijtouaj no yeski totajtakol (Lev. 5:1). Kemej tiktasojtaj Jehová, tikiniluiskej tayekananij komo se tokniuj tajtakolchiua. Ijkon tikinyekpiaj tokniuan itech nechikol uan no tikpaleuiaj akin tajtakolchiuak maj oksepa kuali mouika iuan Jehová.

¿KENIUJ TECHPALEUIAJ TAYEKANANIJ?

12. ¿Keniuj tayekananij kinpaleuiaj akin amo semi kuali mouikajok iuan Jehová?

¹² Biblia kiniluia tayekananij maj kinpaleuikan akin moneki oksepa kuali mouikaskej iuan Jehová (1 Tes. 5:14). Komo tikchiuak teisa uan amo kuali timouikaok iuan Jehová, tayekananij xa mitstajtaniskej seki taman para kimatiskej toni tiknemilia uan keniuj timomachilia (Prov. 20:5). Xa mitsouijmakas tikinnojnotsas porin amo semi titajtoua oso tipinaua tikiniluis tein panok. Sayoj ke semi tikinpaleuis komo tikintapouia toni mitspanotok. Uan amo ximotekipacho komo amo titajtoj kemej tiknekia (Job 6:3). Tayekananij amo niman kiixtaliskej toni mochiuas, ta mochikauaskej kuali mitskakiskej para kimatiskej toni yekmelauj panok, uan satepan uelis mitsyolmajxitiskej (Prov. 18:13). Tayekananij kimatij ke amo ijsiujka uelis kipaleuiskej se tokniuj, yejua ika xa amo sayoj sepa monekis iuan tajtoskej.

13. ¿Toni no kichiuaskej tayekananij para techpaleuiskej? (No xikita taixkopimej).

¹³ Tayekananij amo kichiuaskej okachi ximoyolkoko, ta yejuan mouan motataujtiskej. Jehová kinkakis keman motataujtiskej uan tikitas keniuj ‘mitspaleuis’ porin semi mitsyolchikauas uan mitsyolseuis. Keman tikinnojnotsas yejuan kemej yeskia ‘mitstaliliskej aceite itokaykopa Jehová’ (Sant. 5:​14-16). Nejin “aceite” kijtosneki tein tamachtia iTajtol Dios. Yejua ika, kuali kikuiskej Biblia para mitsyolseuiskej uan mitspaleuiskej oksepa kuali ximouika iuan Jehová (Is. 57:18). Tein mitsyolmajxitiskej mitspaleuis xiksentoka xikchiua tein Jehová kiyolpaktia. Yejua kichiua maj tayekananij mitsixyekanakan uan maj mitspaleuikan xikchiua tein kuali (Is. 30:21).

14. Kemej kijtoua Gálatas 6:​1, ¿keniuj tayekananij kipaleuiaj se tokniuj akin “chikoyajtok”? (No xikita taixkopimej).

¹⁴ (Xiklero Gálatas 6:1). Keman se tokniuj “chikoyajtok” kinextia ke amo kichiujtok tein Dios kiuelita. Xa porin amo kuali taixpejpenak oso tel tajtakolchiuak. Kemej tayekananij kitasojtaj, ‘kitemouaj kipaleuiskej maj moyektali uan amo kiajuaj’. Itech griego tajtol “moyektali” no kijtosneki keman se tapajtijkej moneki kiyektalis se omit tein kopinik para maj kuali pajti. Ijkon kemej se tapajtijkej yolik kiyektalia iomiyo aksa para maj amo kikoko, no ijkon kichiuaj tayekananij keman kipaleuiaj se tokniuj akin chikoyajtok, amo kinekij okachi kitajyouiltiskej ta mochikauaj kiyolseuiskej. Uan Biblia no kijtoua ke keman tayekananij tayolmajxitiskej moneki kielnamikiskej ke no tajtakolejkej uan uelis mopoloskej. Yejua ika, amo moneki kinemiliskej ke yejuan nochipa kichiuaj tein kuali, ta moneki yeskij yolyemankej uan teikneliskej (1 Ped. 3:8).

15. ¿Toni moneki tikchiuaskej komo tikpiaj se ouijkayot?

¹⁵ Uelis iniuan titakuaujtamatiskej tayekananij itech tonechikol. Yejuan kimatij ke amo moneki kijtojtinemiskej kuejmolmej tein tikpiaj. Kinmachtianij ke moneki techyolmajxitiskej ika Biblia uan amo techiluiskej tein yejuan kinemiliaj, uan ke moneki kisentokaskej techpaleuiskej maj tikixnamikikan ouijkayomej (Prov. 11:13; Gál. 6:2). Nochin tayekananij tatamamej uan sekin okachi miak xiujmejya tapaleuianij ke oksekin, maski ijkon keman tikpiaj se ouijkayot ipa semej uelis tiknojnotsaskej. Sayoj ke, amo moneki tikintajtaniskej miakej tayekananij maj techyolmajxitikan hasta maj semej techilui ke uelis tikchiuaskej tein tiknekij. Komo ijkon tikchiuaskiaj, titamatiskiaj kemej akin kinekij maj kiniluikan tein kikakisnekij uan amo tein Jehová tamachtia (2 Tim. 4:3). Keman tiktapouiskej se tayekankej tein techpanotok, xa techtajtanis ox tikiniluijkejya okseki tayekananij uan toni techyolmajxitijkej. Kemej nejon tayekankej kimati ke amo nochi ueli kichiua iselti, xa kinixejekoltis okseki tayekananij nejon taman (Prov. 13:10).

¿TONI MONEKI TIKCHIUASKEJ TISEJSEMEJ?

16. ¿Toni moneki tikchiuaskej tisejsemej?

¹⁶ Tayekananij techyekpiaj uan techyolmajxitiaj, sayoj ke amo techiluiaj tein moneki tikchiuaskej. Ika tein tikijtoskej uan tein tikchiuaskej, tisejsemej tiknextiliskej Jehová ox tiktasojtaj uan tiknekij tikyolpaktiskej (Rom. 14:12). Yejua techpaleuis maj kuali titaixpejpenakan uan maj amo tikauakan. Yejua ika, tayekananij techpaleuiaj ika Biblia maj tikmatikan keniuj kiita Jehová seki taman uan satepan techkauaj maj toselti titaixpejpenakan. Keman itech titanemiliaj uan tikchiuaj tein techyolmajxitiaj, ueli okachi titanemiliaj kemej Jehová uan kuali titaixpejpenaj (Heb. 5:14).

17. ¿Toni kineki Jehová maj tikchiuakan?

¹⁷ Semi tiktasojkamatij maj Jehová techyekpia ijkon kemej se ichkatajpixkej kinyekpia iichkauan. Jehová kiualtitanik Jesús, akin ‘kuali ichkatajpixkej’ maj techmakixtiki para uelis tinemiskej nochipaya (Juan 10:11). Uan no kinixtalij tayekananij itech nechikolmej para maj techyekpiakan ijkon kemej kijtojka: “Namechmakas ichkatajpianij akin kichiuaskej tein nechyolpaktia, uan yejuan namechixyekanaskej ijkon kemej nikinmachtis uan nikinajsikamatiltis tein moneki” (Jer. 3:15). Yejua ika keman tikmachiliskej ke amo semi titakuaujtamatijok iuan Jehová oso ke moneki oksepa kuali iuan timouikaskej, maj “tikinnotsakan” tayekananij para maj techpaleuikan. Ijkon tikitaskej keniuj Jehová kichiua maj tel kuali techpaleuikan.