Xikontemo Jehová ijkon kemej kichiuak Sansón

1, 2. ¿Keyej semi moneki maj timomachtikan tein kipanok Sansón?

¿TONI tikonnemilia keman oksekin ika tajtouaj Sansón? Xa ke semi chikauak katka, uan nejon melauj, sayoj ke no mopoloj uan yejua ika semi tajyouij. Maski ijkon, Jehová kiitak nochi tein kichiujka Sansón para kitekitilis uan kiixtalij maj moijkuilo itech Biblia nochi tein kipanok para maj techmachti teisa.

² Jehová kiixpejpenak Sansón para maj kichiua miak taman tein ika kipaleuiskia xolal Israel. Miak xiujmej satepan ke momikilij, Jehová kichiuak maj tatitanil Pablo kijkuilouani itokay Sansón iniuan oksekin akin kinextijkej ke semi takuaujtamatiaj (Heb. 11:​32-34). Sansón kitemoj maj Jehová kipaleui hasta keman semi tajyouijtoya. Itech nejin tamachtilis tikitaskej ke tein kichiuak semi techyolchikaua uan techmachtia miak taman.

SANSÓN TAKUAUJTAMATIK IUAN JEHOVÁ

3. ¿Toni tekit monekia kichiuas Sansón?

³ Sansón yolik keman filisteos kinixyekanayaj israelitas uan semi kintajyouiltiayaj (Juec. 13:1). Kemej filisteos tel amo yolkualmej katkaj, semi kintajyouiltiayaj israelitas. Yejua ika Jehová kiixpejpenak Sansón para maj kinpaleuiani uan ijkon ‘filisteos amo kintajyouiltiskiajok’ (Juec. 13:5). ¡Semi ouij tein yaya kichiuati! Yejua ika monekia kitemos maj Jehová kipaleui.

4. ¿Keniuj Jehová kipaleuij Sansón? (Jueces 15:​14-16).

⁴ Maj tikitakan tein panok se tonal keman Sansón kinextij ke takuaujtamatik iuan Jehová. Miakej tateuianij filisteos yajkaj Lehí, tein xa moajsia Judá para kikitskiskej Sansón. Takamej akin nemiaj Judá semi momoujtijkej, yejua ika kitemakakej Sansón. Iikniuan israelitas kiilpijkej ika ome lazos tein yankuikej uan kitemakatoj iniuan filisteos (Juec. 15:​9-13). Sayoj ke “Jehová kimakak ichikaualis Sansón”, uan ijkon uelik momakixtij. Satepan, “Sansón kiajsik itenomiyo se burro tein yekin mikka” uan ika kinmiktij mil filisteos (xikonixtajtolti Jueces 15:​14-16).

5. ¿Keniuj kinextij Sansón ke takuaujtamatia iuan Jehová?

⁵ ¿Keyej Sansón kikuik itenomiyo se burro para ika tateuis? Porin kimatia ke tataniskia komo Jehová kipaleuiskia uan amo tein kikuiskia para ika tateuis. Nejin takat akin amo kikauaya Dios kikuik tein kiajsik para kichiuas tein kiyolpaktia Jehová. Uan tatanik porin mokauak maj Jehová kipaleui.

6. ¿Toni uelis techmachtis tein kipanok Sansón?

⁶ Jehová no techpaleuis maj tikchiuakan tein yeski taman tein technauatis inechikol, hasta komo tiknemiliaj ke amo tiueliskej. Hasta uelis tikmojkaitaskej tein kichiuas para techpaleuis. Komo tionmokaua maj Jehová mitsonpaleui, uelis tikonchiuas tein kiyolpaktia uan mitsonchikauas ijkon kemej Sansón (Prov. 16:3).

7. Xikonijto keyej motelneki tiktemoskej maj Jehová techixyekana.

⁷ Miakej tokniuan takamej uan siuamej akin tapaleuiaj maj mochijchiuakan kalmej kampa titaueyichiuaj, kinextianij ke takuaujtamatij iuan Jehová. Ne uejkauj, inechikol Dios kiixtaliaya keniuj mochijchiuaskej Kalmej kampa tiMosentiliaj uan okseki kalmej, uan ijkon mochijchiuayaj. Sayoj ke kemej peuak okachi momiakiliaj itekitikauan Dios monekik mopatas seki taman. Tokniuan akin kiitaj nejin tekit kitemojkej maj Jehová kinpaleui uan kipatakej kemej mochiuaya seki taman. Peuak kinkouaj kalmej uan kinyekchijchiuaj. Robert, se tokniuj akin seki xiujmejya tapaleuiani keman kinchijchiuaj kalmej itech nochi taltikpak, kijtoua: “Yekinika, ouij techkisak tikseliskej tein moixtalijka. Semi taman katka tein miak xiujmej tikchiujkaj. Sayoj ke tokniuan kinekkej kichiuaskej tein moixtalijka uan moyekitak ke Jehová kitiochiujtoya tein mopataka”. Nejin no kinextia ke Jehová kiixyekana ixolal para maj mochiua tein kineki. Semi kuali maj kemansa timotajtanikan: “¿Nochipa niktemoua maj Jehová nechixyekana uan nikpata tein moneki para okachi kuali niktekitilis?”.

SANSÓN MOKAUAK MAJ JEHOVÁ KIPALEUI

8. ¿Toni kichiuak Sansón keman amikik?

⁸ Xa tikonelnamiki okseki taman tein se kimojkaita tein kichiuak Sansón. Xa keman iselti kiteuij se tekuani uan kimiktij uan satepan kinmiktij 30 takamej filisteos akin nemiaj Asquelón (Juec. 14:​5, 6, 19). Sansón kimatia ke amo ueliskia kichiuas nochi nejon komo Jehová amo kipaleuiskia. Satepan ke kinmiktij mil filisteos uan amikik kinextij ke mokauaya maj Jehová kipaleui. Yejua amo iselti kitemoj at, ta kitajtanij Jehová maj kipaleui (Juec. 15:18).

9. ¿Keniuj Jehová kinankilij Sansón? (Jueces 15:19).

⁹ ¿Keniuj Jehová kinankilij Sansón? Ika se milagro Jehová kichiuak maj kisani at. Keman Sansón tayik, “moyolkuik uan kiyekmatik” (xikonixtajtolti Jueces 15:19). Uan kampa Jehová kichiujka maj kisani at, kisentokaya onkaya hasta miak xiujmej satepan keman Jehová kichiuak maj tanauatijkej Samuel kijkuilouani amatajkuilol Jueces. Xa keman israelitas kiitayaj nejon kinelnamiktiaya ke komo kitemouayaj maj Jehová kinpaleui, yejuatsin ijkon kichiuaskia keman kipiaskiaj ouijkayomej.

10. ¿Toni moneki tikchiuaskej para maj Jehová techpaleui? (No xikonita taixkopimej).

¹⁰ Tejuan no moneki tikchiuaskej kemej Sansón, maski titelueliskej tikchiuaskej teisa oso tikchiuanijya seki taman keman tiktekitiliaj Jehová, moneki tiktemoskej maj yejuatsin techpaleui. Moneki tikajsikamatiskej ke amo nochi ueli tikchiuaj uan ke kuali techkisas teisa sayoj komo Jehová techpaleuia. Ijkon kemej Sansón kuali momachilij keman tayik at tein Jehová kimakaka, tejuan no kuali timouikaskej iuan yejuatsin komo tikseliaj nochi tein techmaka (Mat. 11:28).

11. ¿Keniuj uelis tiktemoskej maj Jehová techpaleui, uan toni techmachtia tein kichiuak se tokniuj takat uan isiuatsin?

¹¹ Maj tikitakan tein kipanok Alexéi, se tokniuj de Rusia akin semi tajyouijtok porin itech nejon altepet kintajyouiltiaj tokniuan. ¿Toni kipaleuiani maj taxiko? Yejua uan isiuatsin kiixtajtoltiaj Biblia uan sentaueyichiuaj. Alexéi kijtoj: “Nimochikaua nikchiuas tein nikixtalij, kemej nimomachtis Biblia uan nikixtajtoltis mojmostaj. Uan no, mojmostaj iuan nosiuatsin tiksenixtajtoltiaj texto tein ixyetok para nejon tonal uan tiksentataujtiaj Jehová”. ¿Toni techmachtia nejin? Amo moneki maj totech titakuaujtamatikan, ta maj tiktemokan maj Jehová techpaleui. Uan nejin uelis tikchiuaskej komo okachi iuan titakuaujtamatij. Yejua ika moneki timomachtiskej Biblia, timotataujtiskej, tiaskej nechikolmej uan titanojnotsaskej. Komo tikchiuaj nochi nejin, Jehová semi techtatiochiuis uan techpaleuis maj tiksentokakan tiktekitilikan. Jehová kipaleuij Sansón uan tejuan no techpaleuis.

SANSÓN AMO MOSENKAUAK

12. ¿Toni tein amo kuali kiixpejpenak Sansón, uan keyej tein achto kichiuaya no taman katka?

¹² Sansón katka tajtakolej kemej tejuan, yejua ika kemansa amo kuali taixpejpenaya. Uan keman se tonal ijkon kichiuak tel amo kuali tein kipanok porin amo kichiuak tein Jehová kinauatijka. Sansón katkaya juez se tiempo keman “semi kiueuelitak se siuat akin monotsaya Dalila. Yejua nemia kampa tal tamanis tein moixmati kemej Sorec” (Juec. 16:4). Achto ke kiixmatiskia Dalila, kinekia monamiktis iuan se siuat filistea. Biblia kijtoua “ke Jehová kichiujtoya maj kinekini iuan monamiktis nejon siuat. Yejua kitemojtoya keniuj kintatsakuiltis filisteos”. Satepan, Sansón yajki Gaza, itech se xolal kampa nemiaj filisteos uan mokauak ichan se siuaauilnenkej. Ijkuak Jehová kichikauak Sansón para maj kiuikani puertas tein ika tatsaktoyaj xolal uan ijkon amo ueliskiaj mopaleuiskej (Juec. 14:​1-4; 16:​1-3). Sayoj ke Dalila amo ueliskia kipaleuis maj kintani filisteos porin xa katka israelita.

13. ¿Toni kichiuak Dalila para kikajkayauas Sansón?

¹³ Filisteos kinekiaj maj Dalila kikajkayaua Sansón. Yejua ika kiluijkej ke kimakaskiaj miak plata, uan yejua kinekik. Xa Sansón semi kitasojtaya Dalila yejua ika amo kiitaya toni yekmelauj kinekia kichiuas. Maski ijkon Dalila miakpa kitajtanij Sansón maj kiluiani keyej tel chikauak katka, hasta ke kikuasioujtij uan kiluij. Semi amo kuali tein kipanok Sansón porin se tiempo tamik ichikaualis uan Jehová amo kitatiochiuiayaok (Juec. 16:​16-20).

14. ¿Toni kipanok Sansón porin kineltokilij Dalila?

¹⁴ Tel amo kuali tein kipanok Sansón porin okachi takuaujtamatik iuan Dalila uan amo iuan Jehová. Filisteos kikitskijkej uan kikixtilijkej iixtololouan. Satepan kitsakkej ompa Gaza kampa achto kikixtijka puertas tein ika tatsakuayaj itech xolal, uan ompa kikuecholtiayaj tatet. Satepan, filisteos kiuikakej Sansón itech se iluit tein kichiuilijkej tatadios Dagón porin kinemiliayaj ke kinpaleuijka maj kikitskikan Sansón. Ompa “kikixtijkej Sansón de kampa tsaktoya para kikejkeloskej” uan kipinaujtiskej (Juec. 16:​21-25).

15. ¿Keniuj Sansón kinextij ke oksepa takuaujtamatia iuan Jehová? (Jueces 16:​28-30; xikonita taixkopin ipeujyan amaix).

¹⁵ Sansón semi mopoloj, sayoj ke kisentokak kitekitilij Jehová. Kisentokak kitemoj keniuj kinteuis filisteos porin yejua nejon tein Jehová kinauatijka (xikonixtajtolti Jueces 16:​28-30). Yejua ika Sansón kitataujtij Jehová: ‘Xinechpaleui maj nikintaxtaualti filisteos’. Dios kikakik inetataujtil uan kichiuak maj oksepa mochiua chikauak. Nejon tonal Sansón kinmiktij okachi miakej filisteos ke achto.

16. ¿Toni techmachtia tein kipanok Sansón?

¹⁶ Maski Sansón tajyouij porin amo kuali taixpejpenak, kisentokak mochikauak kichiuas tein kiyolpaktia Jehová. Tejuan amo no moneki timosenkauaskej komo timopolouaj uan moneki techmelauaskej, oso amo ueli tikchiuajok se tekit itech nechikol. Maj tikelnamikikan ke Jehová amo kinemilia ke amo uelis timopataskejok (Sal. 103:​8-10). Maski timopoloskej, Jehová uelis kichiuas maj tikchiuakan tein kiyolpaktia, ijkon kemej kichiuak iuan Sansón.

17, 18. ¿Keyej mitsonyolchikaua tein kipanok Michael? (No xikonita taixkopimej).

¹⁷ Maj tikitakan tein kipanok se tokniuj telpoch akin monotsa Michael. Yejua tekitia kemej tapaleuijkej itech nechikol, uan katka precursor regular uan nochipa kitekitilijtoya Jehová. Sayoj ke mopoloj uan yejua ika amo uelia kichiuayaok seki tekimej itech nechikol. Yejua kijtoua: “Semi niktekitilijtoya Jehová, sayoj ke sepasan nikmachilij ke amo ueliaok niktekitiliaya. Maski nikmatia ke Jehová amo nechkauaskia, nimotajtaniaya ox ueliskia oksepa nimouikas iuan kemej achto, oso ox oksepa ueliskia nitekitis itech nechikol kemej achto”.

¹⁸ ¡Semi kuali ke Michael amo mosenkauak! Yejua kijtoua: “Nimochikauak okachi nimotokis iuan Jehová. Semi nechpaleuij porin nochipa nikiluiaya tein nikmachiliaya, uan itech nitanemiliaya tein nimomachtiaya”. Satepan, Michael oksepa peuak kichiua seki tekimej itech nechikol, uan axkan tapaleuia kemej tayekankej uan precursor regular. Yejua kijtoua: “Nochi tokniuan uan okachiok tayekananij, semi nechpaleuijkej maj nikita ke Jehová kisentokaya nechtasojtaya. Axkan oksepa ueli niktekitilia yejuatsin uan niyolseujtok. Tein nechpanok nechnextilia ke Jehová ueli kitapojpoluia akin yeski akin yekmelauj moyolpata”. Ijkon kemej Michael, tejuan no uelis tikmatiskej ke maski timopoloskej, uelis tiksentokaskej tiktekitiliskej Jehová. Yejuatsin techtatiochiuis komo amo tikchiuajok tein tikchiuayaj uan tiksentokaj tiktemouaj maj techpaleui (Sal. 86:5; Prov. 28:13).

19. ¿Keniuj mitsonyolchikaua tein kipanok Sansón?

¹⁹ Itech nejin tamachtilis tikitakej seki taman tein kipanok Sansón. Maski katka tajtakolej uan mopoloj keman kineltokilij Dalila, amo mosenkauak uan kisentokak kitekitilij Jehová. Uan Jehová amo no kisenkauak, ta kipaleuij maj kichiuani teisa tein motelnekia. Jehová kisentokaya kiitaya ke Sansón semi takuaujtamatia, yejua ika kichiuak maj no moijkuilouani itokay iniuan okseki itekitikauan akin amo keman kikaujkej, akin ininka motajtoua itech Hebreos capítulo 11. Semi techyolchikaua tikmatiskej ke toTajtsin techtasojta uan kineki techpaleuis maj titaxikokan, okachiok keman tikpiaj ouijkayomej. Yejua ika, maj tikchiuakan kemej Sansón uan maj tiktajtanikan Jehová: “NoUeyi Teko Jehová, nimitstataujtia xinechchikaua” (Juec. 16:28).