TAMACHTILIS 40
¿Keniuj uelis yeski tichipaujkej iixpan Dios?
Xikonnemili ke se temomaj akin kitasojta ikonetsin kiita keniuj yas kaltamachtiloyan. Yejua kiita ox maltijya oso mopakakya, maj chipauak itaken uan maj kuali moita. Nochi nejin kipaleuia maj pakto uan kinextia ke itatuan ika motekipachouaj. Jiova, akin toTajtsin uan techtasojta, no kineki maj tichipaujkanemikan uan maj chipauak tonakayo. Komo tichipaujkej techpaleuia tejuan uan no kuali ika motajtoua Dios.
1. ¿Keniuj uelis yeski tichipaujkej itech tonakayo?
Jiova techiluia: “Xiyolchipauke” (1 Pedro 1:16). Yejua ika moneki tichipaujkanemiskej uan maj chipauak tonakayo. Tiknextiaj ke tichipaujkej itech tonakayo keman timaltiaj, chipauak totaken, tochan uan tocarro, uan keman nochi tayekyetok. No titapaleuiaj keman motachipaua itech Kali kampa tiMosentiliaj. Komo tichipaujkej tikchiuaskej maj oksekin kiueyitalikan Jiova (2 Corintios 6:3, 4).
2. ¿Toni moneki amo tikchiuaskej para yeski tichipaujkej?
Biblia tayolmajxitia: “Ma tiksentokakan tichipaukanentinemikan uan amo [...] ma timokalakijtinemikan tech in tajtakolnemilis” (2 Corintios 7:1). Yejua ika, amo tikchiuaj nion teyi tein kijtakos tonakayo nion totanemilil. Uan kemej tiknekij maj kiyolpakti Jiova tein tiknemiliaj, timochikauaj amo tiknemiliskej tein pitsotik (Salmo 104:34). Uan no, nochipa timochikauaj tikijtoskej tein chipauak (xikonita Colosenses 3:8).
¿Toniok ueliskia kipitsotilis tonakayo oso kichiuas maj amo tichipaujkanemikan? Onkak seki taman tein uelis kipitsotilis tonakayo. Yejua ika, amo titachichinaj, amo tikuaj pajti komo amo techiluia tapajtijkej nion tikuij drogas uan okseki taman kemej nejin. Keman tikixtopeuaj nochi nejin, timoyekpiaj porin ijkon amo tikokolispeuaskej uan tiknextiaj ke tiktasojkamatij maj Dios techtayokoliani tonemilis. No tiknextiaj ke tichipaujkanemij keman tikixtopeuaj seki taman tein pitsotik, kemej se momajmatokas se iselti oso se kiitas auilnemilis (Salmo 119:37; Efesios 5:5). Xa yeski ouij se kikauas nochi nejin, sayoj ke Jiova kineki techpaleuis (xikonita Isaías 41:13).
MAJ OKACHI TIMOMACHTIKAN
Maj tikitakan keniuj kiueyitalia Jiova komo tichipaujkej itech tonakayo uan keniuj amo tikchiuaskejok tein amo kuali.
3. Komo tichipaujkej itech tonakayo kiueyitalia Jiova
Keman tikitaj tanauatilmej tein Jiova kinmakak israelitas ne uejkauj, tikitaj ke kipatiuita maj tichipaujkej. Xikitakan Éxodo 19:10 uan 30:17-19, uan ika xitajtokan nejin:
¿Keniuj nejin versículos techmachtiaj ke Jiova kineki maj tichipaujkej itech tonakayo?
¿Toni moneki tikchiuaskej tein techpaleuis maj nochipa tichipaujkej?
Moneki tiempo uan timochikauaskej para yeski tichipaujkej. Sayoj ke, uelis tikchiuaskej kampa yeski tinemiskej uan tikpiaskej tomin oso amo. Xikitakan VIDEO uan ika xitajtokan nejin:
Komo akin tikinnojnotsaj kiitaj ke chipauak tein tikpiaj, ¿kinpaleuis maj kipoujkaitakan Jiova? ¿Keyej?
4. Xikonkaua amo kuali tachiualismej
Jiova uelis techpaleuis maj tikauakan tein yeski tein amo kuali.
Komo tejuatsin tiontachichina oso tikonkui drogas tikonmati ke semi ouij se kikauas nejon, ¿toni mitsonpaleuis? Xikonnemili keniuj mitsonijtakojtok. Xikitakan Mateo 22:37-39 uan ika xitajtokan keniuj komo aksa tachichina oso kikui drogas kijtakoua...
... kemej mouika iuan Jiova.
... ichankauan uan oksekin.
Xikonnemili toni uelis tikonchiuas para tikonkauas teisa tein mitsonijtakoua.a Xikitakan VIDEO.
Xikitakan Filipenses 4:13 uan ika xitajtokan nejin:
¿Komo aksa kichiua netataujtil, momachtia Biblia uan youi nechikolmej kipaleuis maj kikaua seki taman tein kijtakoua? ¿Keyej ijkon tikonnemilia?
5. Xionmochikaua amo tikonchiuas nion tikonnemilis tein pitsotik
Xikitakan Colosenses 3:5 uan ika xitajtokan nejin:
¿Keniuj tikmatij ke se kiitas auilnemilis, se kititanis teisa kampa moita oso ika motajtoua auilnemilis uan se momajmatokas se iselti semi pitsotik iixpan Jiova?
¿Tikonnemilia ke taixejekol maj Jiova techtajtani maj tichipaujkanemikan? ¿Keyej?
Xikonita keniuj amo tikonnemilis tein pitsotik, xikitakan VIDEO.
Jesús tamachtij ke moneki tikpataskej tein moneki komo tiknekij tichipaujkanemiskej. Xikitakan Mateo 5:29, 30 uan ika xitajtokan nejin:
Jesús amo kijtosnekik ke moneki tikijtakoskej tonakayo, ta ke moneki tikchiuaskej teisa. ¿Toni moneki tikchiuaskej para amo tiknemiliskej tein pitsotik?b
Komo tionmochikaujtok amo tikonnemilisok tein pitsotik, xikonelnamiki ke Jiova kipatiuita tein tikonchiua. Xikitakan Salmo 103:13, 14 uan ika xitajtokan nejin:
Komo tionmochikaujtok amo tikonchiuasok tein pitsotik, ¿tikonnemilia ke nejin versículos mitsonpaleuis xikonsentoka xionmochikaua? ¿Keyej?
¡Amo xionmosenkaua!
Okachi amo ouij se kinemilis “oksepa nikchiuak, okachi kuali maj nimosenkaua”. Sayoj ke xikonnemili nejin, komo aksa akin tsikuini uetsi, amo kijtosneki ke tapolojya oso ke moneki mokepas kampa peuak. No ijkon, komo oksepa tikonchiua tein amo kuali amo kijtosneki ke amo keman tikonkauasok. Uan amo kijtosneki ke amo kipiaok ipatiuj tein tikonchiuania. Nochipa ijkon panoua keman se kineki se kikauas teisa. Yejua ika, ¡amo xionmosenkaua! Jiova mitsonpaleuis xikonkaua tein yeski taman tein pitsotik.
TEIN SEKIN KIJTOUAJ: “Nimomatikya nikchiuas, amo ueli nikaua”.
¿Katiyejua texto tikonnextiliskia para tikoniluis ke Jiova techpaleuia maj tikauakan teisa tein amo kuali?
TEIN TIKITAKEJ
Tikyolpaktiaj Jiova keman tikpiaj chipauak tonakayo, totanemilil uan tichipaujkanemij.
Maj tikelnamikikan
¿Keyej semi moneki maj tichipaujkej?
¿Toni moneki tikchiuaskej para yeski chipauak tonakayo?
¿Toni moneki tikchiuaskej para maj nochipa chipauak tein tiknemiliaj uan tein tikchiuaj?
NO XIKONITA NEJIN
Maski amo tikpiaskej miak tomin, ¿toni uelis tikchiuaskej para yeski tichipaujkej?
Xikonlero seki taman tein mitsonpaleuis amo xiontachichinaok.
Xikonita keniuj teijtakoua komo se kiita auilnemilis.
“Akin kiita auilnemilis: ¿amo kijtakoua oso kemaj?” (Tanejmachtijkej, 1 metsti agosto xiuit 2013)
Xikonita toni kichiuak se takat para amo kiitasok auilnemilis.
“Miakpa oksepa nikchiuak hasta ke nikauak” (Tanejmachtijkej, tapoual 4 xiuit 2016)
a Itech taxelol “No xikonita nejin” tein kipia nejin tamachtilis kampa kijtoua “Cómo dejar de fumar”, okachi moijtoua keniuj tikauaskej se taman tein teijtakoua.
b Para tikonmatis keniuj aksa amo momajmatokasok iselti, xikonita “¿Podré vencer el hábito de la masturbación?” itech capítulo 25 itech amaix Lo que los jóvenes preguntan. Respuestas prácticas (volumen 1).