TAMACHTILIS ITECH IPEUJYAN AMAIX: TONI TECHMACHTIA NESKAYOT TEIN KIKAUAK MOISÉS
¿Akoni katka Moisés?
¿Toni tikonnemilia keman tikonkaki tokayit Moisés?
Se konetsin akin imomaj kitalij itech se chikiuit uan kikauak itech ueyi atenoj Nilo.
Telpoch akin kiskaltij iichpoch Faraón itech altepet Egipto kampa amo teyi kipolouaya sayoj ke amo keman kielkauak ke katka se israelita.
Takat akin katka ichkatajpixkej 40 xiujmej ompa Madián.
Takat akin tajtoj iuan Jiovaa iixpan se uitskoujtaktsoj tein xotatoya.
Takat akin ika yolchikaualis kitajtanij tekiuaj akin moajsia Egipto maj kinkauani israelitas maj kisanij.
Takat akin kimatiltij taixnamikkej Faraón ke kiajsiskia majtakti chauismej.
Takat akin kinixyekanak tel miakej israelitas keman kiskej Egipto.
Takat akin Dios kichiuak maj ueli kixelo ueyiat Chichiltik.
Takat akin kinmaktilij israelitas Majtakti Tanauatilmej tein Dios kimakaka.
MOISÉS kipanok nochi nejon uan okseki tamanok. Yejua ika nejin takat akin amo keman kikauak Dios kitelpoujkaitaj akin kineltokaj Cristo, judíos uan musulmanes.
Kemej tikitaj, Moisés katka se tanauatijkej tein kichiuak uejueyi tachiualismej (Deuteronomio 34:10-12). Sayoj ke maski Dios kimakak tatiochiualis maj kichiuani nochi nejon, no katka taltikpaknenkej kemej tejuan. “Katka se tagat ten kipiaya nemilis keme tejuan”, ijkon kemej tanauatijkej Elías, akin se tonal monextij iuan Moisés keman Jesús moajsia nikan taltikpak (Santiago 5:17; Mateo 17:1-9). Moisés kipanok miak kuejmolmej kemej tein axkan tejuan no tikpiaj uan uelik kixikoj.
¿Tikonuelitaskia tikonmatis toni kipaleuij? Maj tikitakan eyi taman tein kitelnextij itech inemilis uan maj timomachtikan keniuj no ijkon uelis tikchiuaskej.
a Biblia kijtoua ke itokay Dios yejua Jiova.