Yekmelauj yolpakilis Jesus technextilia keniuj tikpiaskej

KEMEJ tikitakej itech achto tamachtilis, Jesús kipiaya yekmelauj yolpakilis itech inemilis uan kimatia keyej nemia. Komo no tiknekij ijkon tinemiskej, moneki tiktojtokaskej neskayot tein kikauak uan tikchiuaskej tein tayolmajxitij.

Kemej ixnesi itech tajkuilol tein achto moijtoj, Jiova technauatia maj tikchiuakan kemej Jesús, tein kijtosneki, maj tikchiuakan itech nochi tonemilis kemej yejua kikauak neskayot uan kemej tamachtij. Komo tikchiuaj, tikpiaskej itatiochiualis Dios uan yekmelauj yolpakilis.

Jesús kitemakak seki tamachtilis tein techyekana uan techpaleuia maj tiktojtokakan neskayot tein kikauak, uan seki moajsi itech tamachtilis tein kitemakak itech se tepet. Maj ika titajtokan eyi uan maj tikitakan keniuj uelis tikchiuaskej itech tonemilis.

TAMACHTILIS TEIN TECHYEKANA: “Yolpakij akin kimachiliaj ke moneki motokiskej iuan Dios” (Mateo 5:3, TNM).

KENIUJ TECHPALEUIA NEJIN TAMACHTILIS:

Jesús kiteajsikamatiltij ke tinochin tichijchiujtokej kemej tikmachiliskej ke moneki timotokiskej iuan Dios. Moneki tikmatiskej itanankililuan netajtanilmej kemej nejin: ¿Keyej tiyetokej nikan? ¿Keyej tel onkak tajyouilis? ¿Kitekipachoua Dios tein tikpanouaj? ¿Onkak nemilis satepan ke timomikiliaj? Sayoj ijkon uelis tikpiaskej yekmelauj yolpakilis. Jesús kimatia ke sayoj itech iTajtol Dios uelis tikajsiskej tanankililmej tein melauak. Itech se netataujtil kiiluij iTajtsin: “Motajtolis yejua ne yek melau tajtolis” (Juan 17:17). ¿Uelis techpaleuis Biblia maj timotokikan iuan kemej tikmachiliaj ke moneki tikchiuaskej?

TEIN YEKMELAUJ MOCHIUAK:

Se telpoch akin monotsa Esa, moajsia iniuan tatsotsonanij tein kintelixmatiaj uan yejua katka akin mokuikatiaya uan yaya mochiuati se ueyi mokuikatijkej itech tatsotson rock. Sayoj ke kemansa kimachiliaya ke teisa kipolouaya. Yejua kijtoua: “Maski nikuelitaya nimoajsis iniuan nejon tatsotsonanij, niknekia nikpias yekmelauj yolpakilis”. Satepan kiixmatik se itaixpantijkauj Jiova. Yejua kijtoua: “Tel miak netajtanilmej nikchiuilij. Yejua nechnankilij ika Biblia uan nikitak ke katka taixejekol tein nikakia, yejua ika niknekik nikmatis okachi uan peuak nimomachtia Biblia iuan”. Tein momachtij ajsik itech iyolo uan kiolinij maj motemakti iuan Jiova. Yejua kijtoua: “Achto nikisaya itech se kuejmol oso ouijkayot uan nimokalakiaya itech okse. Axkan nikpia yekmelauj yolpakilis”.

TAMACHTILIS TEIN TECHYEKANA: “[Yolpakij] ten teyolikneliaj” (Mateo 5:7).

KENIUJ TECHPALEUIA NEJIN TAMACHTILIS:

Teiknelilis kiolinia aksa maj kinpaleui oksekin uan maj kinajsikamati. Jesús kiniknelij akin monekia kiseliskej nepaleuil. Nejon kiolinij maj kinpaleui itech inintajyouilis uan amo kichiaya maj kitajtanianij (Mateo 14:14; 20:30-34). Keman tikchiuaj kemej yejua, tikajsij yekmelauj yolpakilis (Hechos 20:35). Uelis tiknextiskej teiknelilis ika tein tikijtouaj uan ika tein tikchiuaj, keman tikinpaleuiaj akin moneki kiseliskej nepaleuil. Sayoj ke xa tionmotajtania: “¿Yekmelauj okachi kuali nimomachilis komo niteiknelia?”.

TEIN YEKMELAUJ MOCHIUAK:

Maria uan itakauj Carlos kinextiaj teiknelilis. Kemej ipopaj Maria amo nemiok inamik uan nejin xiujmej amo ueli meuaok, kiuikakej ininchan kampa okachi kuali kiyekpiaskej. Miakpa amo uelij kochij nochi youal, uan no kemansa moneki ijsiujka kiuikaskej tapajtiloyan porin okachi chikauak kikui diabétes. Maski kijtouaj ke kemansa semi siouij, yolpakij kemej kijtoj Jesús, porin kuali momachiliaj ijkuak kimatij ke kiyekpiaj kemej moneki.

TAMACHTILIS TEIN TECHYEKANA: “Yolpakij akin yolseujkanemij” (Mateo 5:9, TNM).

KENIUJ TECHPALEUIA NEJIN TAMACHTILIS:

Tajtol griego tein mokepa kemej “yolseujkanemij” kijtosneki “akin kichiua maj onka yolseuilis”. ¿Keniuj techualkuilia yekmelauj yolpakilis komo tikchiuaj maj onka yolseuilis? Se taman, okachi kuali timouikaj iniuan oksekin. Yejua ika, moneki tikchiuaskej tein techyolmajxitia Biblia: “Ximofuerzajuijtiyakan se uan okse hasta kampa nanueliske de nannentinemiske ika yolseuilis [...] iuan nochi taltikpakuani” (Romanos 12:18). Tajtolmej “iuan nochi taltikpakuani”, no kijtosneki tochankauan uan oksekin akin xa no taman taneltokaj. ¿Techualkuilia yekmelauj yolpakilis komo tiyolseujkanemij “iuan nochi taltikpakuani”?

TEIN YEKMELAUJ MOCHIUAK:

Se siuat akin monotsa Nair semi kiouijmakani yolseujkanemis porin kipiani ouijkayomej iniuan oksekin, uan okachiok iniuan ichankauan. Itakauj kikauak kemej kaxtol xiuitya, uan hasta axkan iselti kiniskaltia ikoneuan. Semej ikoneuan kikuia droga, uan kemansa tel kualania uan kimojmoujtiaya yejua uan iikniuj siuat. Nair kiyekmati ke Biblia kipaleuiani maj kipia yolseuilis maski kipanouani uejueyi ouijkayomej. Yejua mochikaua kikuis yemanik tajtolmej uan teajsikamatis okachi kuali ke tateuis uan motajtolteuis ika tein amo moneki (Efesios 4:31, 32). Kemej momachtiani ke moneki kinextis yolseuilis, kipaleuiani maj tel kuali mouika iniuan ichankauan uan oksekin.

TEIN MOCHIUAS AMO UEJKAUA

Komo tiktojtokaj tein ika tamatilis tayolmajxitij Jesús, tikajsiskej yolpakilis itech tonemilis uan kuali timomachiliskej. Sayoj ke no moneki tikmatiskej toni panos satepan uan ijkon tikpiaskej yekmelauj yolpakilis. Porin komo sayoj tikmatij ke satepan tiueuentsintiaskej, tikokolispeuaskej uan timomikiliskej, ¿uelis tikpiaskej yekmelauj yolpakilis? Tetayokoltij tikijtoskej ke axkan yejua nejon tein techpanoua.

Sayoj ke onkak kuali tanauatilmej. Jiova kinpialia miak tatiochiualismej akin mochikauaj “chipaukanemi[skej] ijkon keme Cristo chipaukanemik”. Motenkaua ke amo uejkaua tayektalis nikan taltikpak kampa onkas melaujkayot uan ompa nemiskej nochipaya, uan amo kokolispeuaskejok kemej yekinika kinekia. ITajtol kijtoua: “Yejuatsin kalyetos iuan itaneltokakauan. Uan nochi in tagayot yeske ipueblojkauan [...]. Uan [...] inuan yetinemis [...]. Uan Totajtsin kinelkaualtis de ninchokilisuan [...]. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok. Uan ijkon yeski porin nochi tajtamik ya de ne achtopa onkaya” (Apocalipsis [Revelación] 21:3, 4).

Maria, akin kipia 84 xiujmej uan ika titajtojkej itech yekinika tamachtilis, tel yolpaki porin kichia kiitas maj mochiua nejon tajtolmej. ¿Uan tejuatsin? ¿Tikonuelitaskia tikonmatis okachi ika yekmelauj nemilis tein tikpiaskej keman taixyekantos iTekiuajyo Dios? (1 Timoteo 6:19.) Komo ijkon, timitsonyoleuaj xiontajto iniuan itaixpantijkauan Jiova tein ompakauin nemij oso xikontajkuilouili akin kikixtijkej nejin amaix.a