¿Tiontakuaujtamatis iuan Dios?

XIKONNEMILI ke aksa akin tel kuali iuan tionmouika uan tikontelpoujkaita kichiua se taman tein amo tikonajsikamati. Sekin kijtouaj ke amo kuali tein kichiuak uan kinextij ke tein kiolinij amo kuali katka uan kijtouaj ke semi amo teiknelia. ¿Niman tikonijtos ke melauak tein kijtouaj oso tionmochias maj mitsonmelauili tein panok? Komo yejua amo ompa moajsiskia uan ijkon mitsonmelauilis keyej ijkon kichiuak, ¿tionmochiaskia uan amo niman tikonnemiliskia tein amo kuali?

Achto monekiskia tionmotajtanis: “¿Kuali nikixmati? ¿Keyej niktelpoujkaita?”. Kuali yeskia komo tikonchiua nejon ¿melauj? ¿Amo monekiskia maj no timotajtanikan nejon achto ke tikijtoskej ke Dios semi amo teiknelia?

Xa mitsonouijmaka tikonajsikamatis seki taman tein Dios kichiuani oso kikauani maj pano. Miakej mitsoniluiskej ke yejuatsin semi amo teiknelia uan mitsonchikaujkauiskej no ijkon xikonijto ke tein Dios kiolinia amo kuali. ¿Tionmochias uan amo niman tikonijtouilis Dios ke semi amo teiknelia? Kemaj, komo kuali tikonixmati. Xionmotajtani: “¿Toni kichiuani Dios tein ika nechpaleuiani?”.

Komo tikonpanouani ouijkayomej itech monemilis, xa tikonijtos ke Dios amo mitsonpaleuiani. Sayoj ke xikonnemili: ¿Dios kichiuani xikonpano ouijkayomej, oso mitsontatiochiuiani? Kemej tikitakej, yejua “Satanás naken takitskijtok axkan taltikpak” (Juan 12:31). Yejua ika kichiua maj onka miak tajyouilis nikan taltikpak. ¿Uan amo melauak ke miak kuejmolmej tikpiaj porin titajtakouanij uan mochiua seki taman itech tonemilis tein amo tikchiaj?

Sayoj ke ¿toni kichiuani Dios? Biblia kijtoua ke yejuatsin kichijchiuak iluikak uan taltikpak, uan no tonakayo tein tel kuali chijchiujtok uan hasta kijtoua ke tonemilis moajsi imako (Salmo 124:8; 139:14; Daniel 5:23). ¿Toni kijtosneki nochi nejon?

Kijtosneki ke yejuatsin kichiuak maj tinemikan (Hechos 17:28). Nochi itachijchiualis tein kualtsin tein tikitaj nikan taltikpak, netasojtalis uan maj kuali timouikakan iniuan oksekin, maj ueli tikyekokan teisa, maj tikmachilikan tein tikmatokaj, maj ueli titajnekuikan uan maj titakakikan, nochi nejon Dios techtayokolia (Santiago1:17). ¿Melauj ke nochi nejin tatiochiualismej kinextia ke uelis iuan timoyekuikaskej uan kinamiki maj tiktasojtakan uan maj iuan titakuaujtamatikan?

Maski ijkon, xa mitsonouijmakas tiontakuaujtamatis iuan Dios. Xa tikonnemilis ke amo kuali tikonixmati, uan timitsonajsikamatij. Itech nejin tamachtilismej tein amo uejueyi, amo ueli tikitaj nochi tein sekin kinuika maj kinemilikan ke Dios semi amo teiknelia. Sayoj ke, ¿amo techpaleuiskia maj timochikauakan okachi kuali tikixmatiskej?a Tikyekmatij ke komo ijkon tikonchiua, tikonmatis keniuj yekmelauj tamati yejuatsin. Amo melauak tein kijtouaj ke Dios semi amo teiknelia, ta “yejuatsin tetasojtatinemi” (1 Juan 4:8).