NETAJTANILMEJ TEIN KISAJ ITECH BIBLIA
¿Uelis tikpiaskej nemilis nochipaya?
¿Toni kichiuani Dios tein ika techmakixtis itech mikilis?
Yekinika takat, Adán, nemik tel miak xiujmej; sayoj ke, satepan ueuentsintiak uan momikilij. Nejon tonalmej uan hasta axkan, taltikpakneminij kitemouanij miak taman keniuj kitsakuiliskej maj amo techpano nejon, sayoj ke amo akin uelini. ¿Keyej? Porin titajtakouanij. Adán momikilij porin tajtakoj ijkuak amo kitakamatiok Dios, uan kemej techpanoltilij tajtakol, tejuan no ijkon techpanoua. (Xikonixtajtolti Génesis 5:5 uan Romanos 5:12.)
Uelis tikpiaskej nemilis nochipaya sayoj komo aksa techtaxtauilia (Job 33:24, 25). Taxtauil yejua ipatiuj tein aksa moneki kitemakas uan ijkon kimakixtiaj akin kikitskiaj; uan tejuan, techmakixtiskej itech mikilis (Éxodo 21:29, 30). Jesús techtaxtauilij keman kitemakak inemilis. (Xikonixtajtolti Juan 3:16.)
¿Keniuj uelis tinemiskej nochipaya?
Amo nochin kinajchiuiliskej kokolis uan mikilis. Akin amo kitakamatij Dios, kemej kichiuak Adán, kipoloskej ininnemilis. Sayoj akin kintapojpoluiskej nemiskej nochipaya. (Xikonixtajtolti Isaías 33:24 uan 35:3-6.)
Moneki tikchiuaskej seki taman uan ijkon Dios techtapojpoluis. Moneki tikixmatiskej yejuatsin. Nejin tikchiuaj keman timomachtiaj iTajtol. Biblia techpaleuia maj tikpiakan se kuali nemilis, se kuali uikalis iuan Dios uan se nemilis nochipaya. (Xikonixtajtolti Juan 17:3 uan Hechos 3:19.)