¿Akoni kichijchiuak Dios?

Xikonnemili ke se tepopaj iuan monojnotsa ikonetsin akin kipia chikome xiuit uan kiluia: “Ne uejkauj, Dios kichijchiuak taltikpak uan nochi tein kipia. No kichijchiuak Tonaltsin, Metsti uan sitalimej”. Konetsin tepitsin tanemilia uan satepan kitajtania ipopaj: “¿Uan akoni kichijchiuak Dios?”.

Tepopaj kinankilia: “Amo akin. Dios nochipa nemini”. Moita ke axkan, nejin tanankilil tein amo ouij kinankilia inetajtanil konetsin. Sayoj ke, ijkon kemej moskaltia, kisentoka tanemilia itech nejon taman. Kiouijmaka kiajsikamatis maj nemi aksa akin amo kipiak ipeujyan. Kinemilia: “¿Keniuj uelik mochiuak nejon? Ta hasta iluikak uan taltikpak kipiak ipeujyan”. Yejua motajtania: “¿Kani ualeuak Dios?”.

¿Keniuj kinankilia Biblia nejin netajtanil? No ijkon kemej tepopaj akin yekin ika titajtojkej. Moisés kiluij Jiova: “Achto ke nesiskiaj tepemej, oso tikchiuaskia maj taltikpak nesi uan tal kampa moteltachiua, itech tonalmej tein amo kipia ipeujyan uan hasta itech tonalmej tein amo kipia itamian tejua tiDios” (Salmo 90:1, 2). Tanauatijkej Isaías no kijtoj se taman kemej nejon: “¿Amo tikmati? ¿Amo tikakini? Jiova, Akin kichijchiuak semanauak taltikpak, yejua se Dios akin nemi nochipaya” (Isaías 40:28). Uan amat tein kijkuiloj Judas no kinextia ke Dios nemini “desde ne kuak ayamo teyi ualtsineuaya” (Judas 24, 25).

Nejin textos kinextiaj ke Dios yejuatsin “Totayekankau [...] [akin] nachipa yoltinemis”, ijkon kemej kijtoj tatitanil Pablo (1 Timoteo 1:17). Ika okseki tajtolmej, maski tiknekiskej kemej yeskia okachi uejka timokepaskej itech tonalmej, yejuatsin nochipa nemini. Uan nochipa nemis (Apocalipsis [Revelación] 1:8). Dios amo kipia ipeujyan uan amo kipia itamilis, yejua nejon se taman tein okachi kiixnextia.

¿Keyej semi techouijmaka tikajsikamatiskej nejin tanemilil? Porin tejuan amo miak tonalmej tinemij, uan nejon kichiua maj amo tikitakan tonalmej kemej Jiova kiita. Kemej neskayot, yejuatsin kiita mil xiujmej kemej sayoj se tonal, porin nochipa nemini (2 Pedro 3:8). Maj tikitakan nejin neskayot. Se chapolin tein moskaltijya, nemi kemej 50 tonalmej. ¿Ueliskia kimatis toni kijtosneki se nemis 70 oso 80 xiujmej, tein uejkaua tonemilis? Nion tepitsin. Biblia kijtoua ke iixpan toTachijchiujkauj tejuan titamatij kemej chapolimej. Itanemililuan Jiova okachi uejkapan moajsi ke totanemililuan (Isaías 40:22; 55:8, 9). Yejua ika taixejekol maj onka seki taman kemej yejuatsin tamati tein amo uelis tikajsikamatiskej.

Maski techouijmakas tikajsikamatiskej ke Dios nochipa nemi, nejin tanemilil taixejekol. Komo aksa kichijchiuaskia Dios, nejon aksa yeskia Akin tachijchiuak. Sayoj ke Biblia kiyekijtoua ke Jiova kichijchiuak nochi tein onkak (Apocalipsis 4:11). Uan no, tejuan tikmatij ke itech seki tonalmej amo onkaya iluikak nion taltikpak (Génesis 1:1, 2). ¿Keniuj nesikoj? Taixejekol maj tikijtokan ke yekinika monekia nemis Akin kichijchiuak. Uan no monekia nemis achto ke nemiskia aksa, kemej iKonetsin uan ángeles (Job 38:4, 7; Colosenses 1:15). Moajsikamati ke Dios iselti yetoya achto ke peuaskia tachijchiuaskia. Yejuatsin amo ueliskiaj kichijchiuaskej, porin amo onkaya nion teyi uan amo nemia nion akin, ta sayoj yejuatsin.

Tonemilis, iluikak uan taltikpak kinextia ke moajsi se Dios akin nemi nochipaya. Akin kichijchiuak nochi tein onkak iluikak uan kiitak maj kuali tekiti uan kiixtalij tanauatilmej tein kiyekanaj monekia nemis nochipaya. Sayoj yejuatsin uelik kimakak nemilis nochi okseki taman tein yoltok (Job 33:4).