¿Tikonixmati itokay Dios?

Xikonnemili ke kuali tionmouika iuan aksa uan amo tikonmati katiyejua itokay. Nejon amo uelis panos, ¿melauj? Kemej kijtoj se siuat tein kayot Bulgaria akin itokay Irina, “amo uelis kuali timouikaskej iuan Dios komo amo tikmatij itokay”. Sayoj ke, kemej tikitakej itech yekinika tamachtilis, Dios kineki maj iuan timotokikan. Yejua ika, itech Biblia techiluia itokay: “Nejua niJiova. Yejua nejon notokay” (Isaías 42:8).

Sayoj ke ¿yekmelauj kineki Dios maj tikixmatikan uan maj tikuikan itokay? Xiontanemili itech nejin: itokay Dios, tein moijkuiloua itech hebreo ika naui letra tein moixmati kemej Tetragrámaton, ixnesi kemej 7,000 itech yekinika amatajkuilol itech tajtol hebreo, tein moixmati kemej Antiguo Testamento. Tein melauj, semi okachi ika motajtoua ke okse tokayit. Kemej tikitaj, Jiova kineki maj tikixmatikan itokay uan maj tikuikan.a

Kemej Dios yektik uan kipia miak chikaualis, sekin kinemiliaj ke komo kikuij itokay amo kipoujkaitaj. Tein melauj, amo kuali yeskia komo amo kuali tikuij itokay, ijkon kemej amo kuali tikuiskiaj itokay se akin kuali iuan timouikaj. Sayoj ke, komo kuali tikuij, kuali yetok, ta Jiova kineki maj itekitikauan kipoujkaitakan itokay uan maj kiteixmatiltikan (Salmo 69:30, 31; 96:2, 8). Xikonelnamiki ke Jesús kinmachtij itatojtokakauan maj motataujtikan ika nejin tajtolmej: “ToTajtsin akin tiyetok iluikak, maj moueyitali motokay”. Tikueyitaliaj itokay keman tikteixmatiltiaj, uan nejon okachi techtokia iuan Dios (Mateo 6:9, TNM).

Biblia kinextia ke Dios okachi kinkaki akin ‘tanemiliaj itech itokay’ (Malaquías 3:16). Akin ijkon kichiuas, Jiova iuan motenkaua: “Nikyekpias porin kiixmati notokay. Yejua nechnotsas, uan nejua niknankilis. Iuan niyetos keman tajyouis” (Salmo 91:14, 15). Kemej tikitaj, komo tiknekij kuali timouikaskej iuan Dios, motelneki maj tikixmatikan uan maj tikuikan itokay.