¿Keniuj uelis se kixikos tayokol?

Miak taman tein kijtouaj maj se kichiua keman aksa momikilia, sayoj ke amo nochi tapaleuia. Xa sekin mitsoniluiskej ke amo xionchoka uan amo xikonnexti tein tikonmachilia, sayoj ke oksekin mitsoniluiskej ke senkis xikonnexti. Sayoj ke, tein Biblia kijtoua okachi taixejekol uan mouika iuan tein kiajsinij tamatinij itech totonaluan.

Itech seki xolalmej amo kuali moita maj chokakan takamej. Sayoj ke, ¿tepinaujtij maj se choka senteixtenoj? Sekin akin kitemouaj keniuj kipajtiskej kokolismej itech se itanemilil kijtouaj ke se chokas yejua se taman kemej se kinextia tayokol. Yejua ika, se kimachilis nochi taman tein ika se kinextia tayokol ijkuak aksa momikilia tapaleuia maj se taxiko. Sayoj ke, se kitatis tein se kimachilia uelis okachi teijtakos. Biblia amo kijtoua ke amo kuali yetok maj se choka oso ke takamej amo moneki chokaskej. Xiontanemili itech Jesús. Keman Lázaro akin kuali iuan mouikaya momikilij amo pinauak chokas senteixtenoj, maski yejua uelia oksepa kinmakas nemilis akin momikilijkajya (Juan 11:33-35).

Miakpa, tayokol monextia ika kualanyot, okachi keman akin momikilia kipanoua tein amo mochiaya. Miak taman uelis kichiuas maj aksa kualani, kemej ijkuak aksa akin kipoujkaita kiluia tein kiyolxokolia oso tein amo moneki. Mike akin kayot Sudáfrica, kijtoua: “Sayoj nikpiaya 14 xiujmej keman momikilij nopopaj. Ijkuak, se taixyekankej itech taneltokalis anglicano kijtoj ke Dios kineki maj akin yolkualmej moajsikan iuan ompa iluikak, yejua ika kinuika.a Tein kijtoj kichiuak maj nitelkualani, porin semi tiktasojtayaj nopopaj. Maski panokya sesenta xiujmej, nejon tajtolmej kisentokaj nechyolkokouaj”.

¿Uan komo se kimachilia ke se itajtakol? Komo aksa momikilia keman panoua tein amo mochiaya, akin tajyouijtok uelis kinemilis: “Komo nejua nikchiuaskia nejin taman oso ne okse taman amo momikiliskia”. Oso xa okachi kimachilia ke itajtakol komo achto ke momikiliskia motajtolteuijkej.

Komo tikonmachilia ke motajtakol oso tionkualani, amo xikontati nejon tein tikonmachilia. Xikontapoui se akin kuali iuan tionmouika akin uelis mitsonpaleuis xikonajsikamati ke miakej no ijkon momachiliaj porin momikiliani se akin kitasojtayaj. Biblia techelnamiktia: “Se yekmelauj tetasojikniuj nochipa tetasojta, uan mochiua se teikniuj keman se kipanoua tajyouilis” (Proverbios 17:17).

Akin okachi kuali uelis techpaleuis itech nejon tein tikpanotokej yejua toTachijchiujkauj, Jiova. Xikonilui nochi tein tikonmachilia ‘porin Yejuatsin semi kiyolnejneki de mitsonyekpixtinemisʼ (1 Pedro 5:7). Komo ijkon tikonchiua, tikonitas keniuj okachi kuali tionmomachilis ika “ne yolseuilis ten kachi kuika uelilis hasta amo uelis se kajsikamatis ok de keniu” (Filipenses 4:6, 7). Uan no, xikonkaua maj Dios mitsonyolseui ika iTajtol, Biblia. Uelis tikonijkuilos seki textos tein mitsonyolchikauaskej uan seki uelis tikonelnamikis (xikonita recuadro). Tiontanemilis itech nejon textos okachi uelis mitsonpaleuis keman tayouak, ijkuak tionyetos moselti uan amo uelis tionkochis (Isaías 57:15).

Yankuixtok, se takat akin kipia 40 xiujmej, akin tiktokaytiskej Jack, inamik momikilij porin kipiaya cáncer. Kemansa senkis momachilia iselti, sayoj ke netataujtil semi kipaleuiani. Yejua kijtoua: “Keman nitajtoua iuan Jiova, amo nimomachilia noselti. Miakpa niijsa youak uan amo ueli oksepa nikochi. Satepan keman tepitsin nikixtajtoltia Biblia, itech nitanemilia uan niktapouia Dios tein nikmachilia, niyolseui. Nejon kichiua maj notanemilil uan noyolo kuali moajsikan uan ueli nikochi”.

Se ichpoch akin itokay Vanessa, akin imomaj momikilij porin kipiaya se kokolis, no kiitani keniuj kipaleuiani netataujtil. Yejua kijtoua: “Keman senkis amo kuali nimomachiliaya, nitelchokaya uan miakpa nikijtouaya itokay Dios. Jiova kikakik nonetataujtiluan uan nochipa nechpaleuij”.

Seki tapajtianij akin kitemouaj keniuj se kixikos tayokol kijtouaj ke akin kipanouaj nejon semi kuali maj kinpaleuikan oksekin; uelis tapaleuiskej itech se tekit tein moneki itech xolal. Kichiuaskej nejon uelis kinyolchikauas uan kinpaleuis maj amo semi kimachilikan tekokojkayot (Hechos 20:35). Miakej akin kichiuaj kemej Cristo akin moyolkokojtoyaj kijtouaj ke kinpaleuiskej oksekin kichiuani maj oksepa yolpakikan (2 Corintios 1:3, 4).