Keman momikilia se akin tiktasojtaj

Vanessa, kayot Australia, kijtoua: “Nokniuj takat akin tayekana ijsiujkamikik uan amo uelik niktsakuilij. Seki metsti satepan, keman nikelnamikia, niteltayokoyaya porin nikmachiliaya ke nechtokiliayaj se cuchillo itech noyolo. Kemansa, nitelkualania porin momikilij. Uan no, nimotajtakoltiaya porin amo semi iuan niyetoya.”

KOMO momikilij se akin tikontasojta, xa semi tiontayokoyak, tionmomachilij moselti oso amo tikonmatia toni tikonchiuas. Uan xa hasta tionkualanik, tikonnemilij ke motajtakol tein panok oso tionmouik. Hasta xa tikonnemilij ke amo ueliskiaok tionyolpakis.

Kemansa, uejkaua se tayokoya keman momikilia se tochankauj. Nejon kijtosneki ke se kitasojtaok. Yejua ika, ¿toni uelis teyolseuis?

TEIN SEKIN KINPALEUIANI

Maski tikonnemilis ke amo teyi uelis mitsonyolseuis, xa uelis mitsonpaleuis tein oksekin kichiuanij.

YOLSEUIJ KEMAN CHOKAJ

Sekin uejkaua tayokoyaj uan oksekin amo. Sayoj ke, komo se choka tepaleuia maj se yolseui. Vanessa, akin achto ika titajtojkej, kijtoua: “Nochipa nichokaya. Monekia nikixtis tein nikmachiliaya”. Sofía, akin iikniuj siuat ijsiujkamikik, kijtoua: “Semi nechtayokoltia keman nikelnamiki tein panok. Kemej yeskia nechchipauiliskiaj kampa nitakokol. Semi tetajyouiltia, sayoj ke tepaleuia maj kuali se momachili”.

KIJTOUAJ TEIN KINEMILIAJ UAN TEIN KIMACHILIAJ

Kemansa, xa tikonnekis tionyetos moselti. Sayoj ke, amo uelis tikonxikos tayokol moselti. Jared, se telpoch akin kipia 17 xiujmej uan momikilij ipopaj, kijtoua: “Xa amo kuali nikijtouaya keniuj nimomachiliaya, sayoj ke nechyolseuiaya nitajtos iniuan oksekin”. Janice, akin ika titajtojkej itech yekinika tamachtilis, no kijtoua: “Semi nechyolseuij nitajtos iniuan oksekin. Nechajsikamatkej uan amo nimomachilijok noselti”.

MOKAUAJ MAJ KINPALEUIKAN

Se siuat tapajtijkej kijtoua: “Akin mokauaj maj ininchankauan uan akin iniuan mouikaj kinpaleuikan, okachi amo ouij kinkisa kixikoskej tayokol”. Xikonilui akin iniuan tionmouika keniuj uelis mitsonpaleuiskej. Xa kinekij mitsonpaleuiskej, sayoj ke amo kimatij keniuj kichiuaskej (Proverbios 17:17).

OKACHI MOTOKIAJ IUAN DIOS

Tina kijtoua: “Nonamik ijsiujkamikik porin kikuik cáncer uan amo ueliaok niktapouiaya nochi tein nechtekipachouaya. Yejua ika, nochi peuak niktapouia Dios. Keman niijsaya, niktataujtiaya maj nechmaka chikaualis nochi tonal. Dios nechpaleuij ika miak taman”. Tarsha, akin kipiaya 22 xiujmej keman imomaj momikilij, kijtoua: “Semi nechyolseuiaya nikixtajtoltis Biblia mojmostaj. Nochipa nechpaleuiaya maj niknemili tein kuali”.

KINEMILIAJ KEMAN OKSEPA NEMISKEJ AKIN MOMIKILIJKEJYA

Tina kijtoua: “Yekinika, amo nechyolseuiaya nikmatis ke nonamik uelis oksepa yoltos. Nokoneuan uan nejua tiknekiaj maj touan yetoni. Sayoj ke, axkan ke panokya naui xiuit, nikchia oksepa nikitas. Nejon nechpaleuia maj nitaxiko. Niyolpaki uan niyolseui keman niknemilia ijkuak oksepa nikitas”.

Xa tikonsentokas tiontayokoyas, sayoj ke tein kijtoj Vanessa uelis mitsonyolseuis. Yejua kijtoua: “Xa tikonnemilis ke amo keman tionyolseuis, sayoj ke yolik kuali tionmomachilijtiyas”.

Xikonelnamiki, maski axkan tiontayokoya, uelisok tionyolpakis. Dios mitsonpaleuis kuali xionmomachili tionyetos iniuan akin kuali tionmouika uan xionyolpaki satepan. Amo uejkaua, oksepa kinmakas nemilis akin momikilijkejya. Yejuatsin kineki oksepa xikonita akin tikontasojta. Ijkuak, amo keman tiontayokoyasok.

Tein Biblia kijtoua uelis mitsonpaleuis

Dios kiita keman tiontayokoya

Se akin kijkuiloj Biblia, kiluij Dios: “Xiksentili noixayo itech mokuetaxtekomat. ¿Amo yetokej itech moamatajkuilol?” (Salmo 56:8.)

Xikontapoui Dios tein tikonmachilia

“Iixpan [Dios] nikiluij tein nechtekipachoua [...]. Nimitstsajtsilij, Jiova,a xinechpaleui.” (Salmo 142:2, 5.)

Xikonchia tein kuali

“Dios kinpankixtis yoltokke nochi in animajme [oso mikemej].” (Hechos 24:15.)

Dios motenkaua ke oksepa kinmakas nemilis akin momikilijkejya uan kitelneki kichiuasb (Job 14:14, 15).

a Biblia kijtoua ke itokay Dios yejua Jiova.

b Komo tikonneki tikonmatis okachi keman oksepa kipiaskej nemilis akin momikilijkejya, xikonixtajtolti amaix ¿Toni yekmelauj tamachtia Biblia?, itech capítulo 7, tein kichijchiujkej itaixpantijkauan Jiova uan moajsi itech Internet itech www.jw.org/ncj.