Keman mochiua se tetsauit

Andrew, kayot Sierra Leona, kijtoua: “Amo tikmatiaj toni tikchiuaskej keman tikpolojkej nochi tein tikpiayaj porin taapexonik uan kalakik sokit”.

David, kayot islas Vírgenes, kijtoua: “Satepan ke panok kiouaejekat timokepkej tokalijtik. Amo tikneltokayaj ke tikpolojkej nochi. Noichpoch motankuaketsak uan peuak choka”.

¿NO MOCHIUAK se tetsauit kampa tionnemi? Komo ijkon, xa no tiontayokoyak, tionmotekipachoj, amo tikonmatia tein tikonchiuas uan xa hasta tikonkochitaya tein amo kuali. Miakej semi tayokoyaj uan kinekij mosenkauaskej.

Komo tikonpoloj nochi tein tikonpiaya, xa tikonmachilia ke amo tiontaxikouaok. Xa hasta tikonnemilijtok ke amo uelisok tionyolpakis. Sayoj ke, Biblia kimelaua ke kemaj uelisok tiyolpakiskej uan ke uelis tikchiaskej maj mochiua tein kuali satepan.

BIBLIA TECHPALEUIA MAJ TIKCHIAKAN TEIN KUALI

Eclesiastés 7:8 kijtoua ke okachi kuali keman tami teisa ke keman peua. Komo se tetsauit tauejueloj kampa tionnemi uan moneki tiontayektalis, xa tikonnemilis ke nenkaj yeski. Sayoj ke, komo amo tionyolijsiui uan tionmochikaua, okachi kuali tionyetos.

Biblia kijtoua ke ejkos tonal keman “amo mokakisok [...] chokalis nion tayokol” (Isaías 65:19). Nejon mochiuas keman iTekiuajyo Dios kichiuas maj nikan taltikpak takualtsinkan yeski (Salmo 37:11, 29). Ijkuak, amo keman mochiuaskejok tetsaujmej. Uan no, amo keman titayokoyaskejok nion tikelnamikiskejok tajyouilis. Dios, akin kipia nochi chikaualis, motenkaua: “Tein achto panok amo moelnamikisok, nion yetosok itech nanmoyolo” (Isaías 65:17).

Xikonnemili nejin: toTachijchiujkauj kichiuak nochi tein techpaleuis maj satepan kuali tinemikan porin kineki maj tikpiakan yolseuilis keman yejuatsin taixyekanas (Jeremías 29:11). ¿Melauj ke nejin mitsonpaleuia amo xionmosenkaua? Sally, akin achto ika titajtojkej, kijtoua: “Komo tikonnemilia ke kualtsin tinemiskej keman taixyekanas iTekiuajyo Dios, mitsonpaleuis xikonelkaua tein tikonpanok uan xiontaxiko”.

¿Toni no kichiuas iTekiuajyo Dios? Keman tikonmatis, tikonitas ke amo uejkaua amo mochiuaskejok tetsaujmej uan ke uelisok tionyolpakis maski tiontajyouiani. Hasta maj ejko nejon tonal, tein Biblia tayolmajxitia mitsonpaleuis xiontaxiko.

Tein Biblia kijtoua uelis mitsonpaleuis

Kuali xionkochi

“Ximoseuikan tepitsin.” (Marcos 6:31.)

Tapajtianij kijtouaj ke akin kipanouaj tein tel amo kuali, okachi amo kuali momachiliaj komo amo kuali kochij. Yejua ika, motelneki maj kuali se kochi.

Xikonijto tein tikonmachilia

“Netekipacholis itech iyolo se takat kitayokoltia, sayoj ke se kuali tajtol kiyolchikaua.” (Proverbios 12:25.)

Xiontajto iuan se mochankauj oso iuan aksa akin kuali iuan tionmouika. Yejuan mitsonkakiskej, mitsonyolchikauaskej uan mitsonpaleuiskej.a

Xikonnemili ke mochiuas tein kuali

“Tikchixtoke ne tonal kuak Dios kichijchiuas se yankuik eluiyak uan ne yankuik taltikpak, kampa mochiutos sayo ten kualtsin chipaukanemilis ijkon kemej yejuatsin motenkauak ya.” (2 Pedro 3:13.)

a Komo aksa nochipa motekipachoua oso nochipa motayokoltia, xa monekis kiitaskej tapajtianij.