¿Moajsij ángeles akin amo yolkualmej?

Kemaj moajsij. ¿Kani ualeujkej? Xikonelnamiki ke Dios kinchijchiuak ángeles kemej ueliskiaj taixpejpenaskej. Tepitsin satepan keman Dios kichijchiuak yekinika takat, Adán uan yekinika siuat, Eva, se ángel akin amo kipiaya tajtakol amo kuali taixpejpenak uan kiixyekanak se taixnamikilis. Kichiuak maj Adán uan Eva no kiixnamikikan Dios (Génesis 3:1-7; Apocalipsis [Revelación] 12:9). Biblia amo kijtoua itokay nejin ángel nion toni tekit kipiaya ompa iluikak achto ke taixnamikiskia. Sayoj ke, satepan ke taixnamikik, Biblia kitokaytia Satanás tein kijtosneki “Taixnamikkej”, uan Diablo, tein kijtosneki “Tetakajkayauilijkej”, tokaymej tein kuali kinamikij (Mateo 4:8-11).

Tetayokoltij tikijtoskej, ke ompa amo tamik nejon taixnamikilis. Itech itonaluan Noé, tel miakej ángeles “kisekokauke ninchantsin” ompa iluikak kampa moajsiaj iniuan ichankauan Dios, temokej nikan taltikpak uan monakayotijkej ijkon ueliskiaj auilnemiskej. Uan ijkon, senkis kikaujkej tekit tein Dios kinmakak ijkuak kinchijchiuak (Judas 6; Génesis 6:1-4; 1 Pedro 3:19, 20).

¿Toni kinpanok nejon ángeles akin amo yolkualmej? Keman Dios kichipauak nochi taltikpak ika se Tetsaujkakiouit, kikaujkej ininnakayo uan mokepkej iluikak. Sayoj ke, Dios amo kinkauakok maj nejon ángeles taixnamikinij oso amokuali ejekamej oksepa ‘tekitikan tech nintayekanalis’, ta kinkuilij inintanauatil uan kintatsakuiltij “tech ne tayouayanilot” tein moixmati kemej Tártaro (Judas 6; 2 Pedro 2:4). Amokuali ejekamej mokauanij maj kinixyekana Satanás, “naken kinyekantok in amokuali ejekame”, akin “monextijtinemi [...] keme yeskia se ángel takeual de Dios ten kualkui tanextsin” (Mateo 12:24; 2 Corintios 11:14).

Biblia tamachtia ke itech xiuit 1914, Dios kiixtalij Tekiuajyot imako Mesías, se taixyekanalis ompa iluikak.a Satepan ke moixtalij nejon Tekiuajyot, Satanás uan iamokuali ejekauan kinualpantamotkej nikan taltikpak uan ijkon amo ueliskiaok taijtakoskej ompa iluikak. Maj tel miakej auilnemikan axkan uan maj motelchiua tein amo kuali, kinextia ke amokuali ejekamej senkis kitemouaj momakepaskej uan tauejueloskej (Apocalipsis 12:9-12).

Sayoj ke, maj okachi momiakili pitsotik auilnemilis uan neteuilis, kinextia ke amo uejkaua tamis inintaixyekanalis amokuali ejekamej. Amo uejkaua, iTekiuajyo Dios amo kinkauasok maj taijtakokan, kichiuas maj nejin taltikpak mokepa se xochital uan taixyekanas mil xiujmej. Satepan, amokuali ejekamej kinyejyekoskej taltikpakneminij seki tonalmej sayoj ke amo oksepa kichiuaskejok. Ompa, senkis kinixpoloskej (Mateo 25:41; Apocalipsis 20:1-3, 7-10).