Kinextilij kualtakayot

ICHANKAUAN John nemiaj itech se xolal tein poui Gujarat (India). Ipopaj moauij kemej itaixpantijkauj Jiova sesenta xiujmej achto. Sayoj ke John, imomaj uan makuil iikniuan, ome telpochmej uan eyi ichpochmej, katkaj católicos uan kiixnamikiaj itaneltokalis ininpopaj.

Se tonal, ipopaj kinauatij maj kiuikiliani se amat se tokniuj takat itech nechikol. Nejon kualkan, John momajpiltekik ika se tepos. Maski ijkon, kemej kinekia kitakamatis ipopaj, kitetsiloj imajpil ika se tasal uan yajki kampa ipopaj kinauatijka.

Keman ajsik, kimakak amat inamik nejon tokniuj, akin no katka itaixpantijkauj Jiova. Keman tokniuj siuat kiitak ke John momatekka, kiluij ke kipajtiliskia. Kikuito seki taman tein ika kipajtiliskia, kichipauilij kampa motekik uan kimajpilpikik. Satepan, kitotonilij tsopekat. Ijkuak kichiujtoya nochi nejon, iuan tajtoj ika tein Biblia kijtoua.

John peuak kipata kemej kinitaya itaixpantijkauan Jiova. Yejua ika kichiuilij seki netajtanilmej tokniuj siuat. John kinemiliaya ke Jesús katka Dios uan ke moneki se kichiuilis netataujtil María, sayoj ke ipopaj amo ijkon tanemiliaya. Tokniuj siuat, akin momachtij tajtos gujarati, kimelauilij John itech itajtol tein Biblia tamachtia ika nejon ome taman. Satepan, kimakak folleto “Estas buenas nuevas del reino”.

Keman John kiixtajtoltij folleto, kimatik ke nejon katka tein melauak. Kiitato tiopixkat uan no kitajtanij tein kitajtanijka tokniuj siuat. Sayoj ke tiopixkat kualanik, kitamotilij se Biblia uan kitsajtsilij: “¡Timochiuak tiSatanás! ¿Kani kijtoua Biblia ke Jesús amo Dios? ¿Kani kijtoua ke moneki amo se kichiuilis netataujtil María? ¿¡Kani!?”. John amo uelia kineltokaya maj tiopixkat ijkon kinankiliani, uan kiluij: “Amo kemanok niyas se tiopan”. Uan ijkon panok.

John peuak momachtia iniuan itaixpantijkauan Jiova, kiselij tamachtilis tein melauak uan peuak kitekitilia yejuatsin. Oksekin ichankauan no ijkon kichiujkej. Nestokok kampa John momajpiltekik iyekmakopa, uan keman kiita, kitelelnamiki ke sesenta xiujmej achto kinextilijkej kualtakayot tein kipaleuij maj kiajsini tamachtilis tein melauak (2 Cor. 6:4, 6).